ފާއިތުވި 5 އަހަރު ތެރޭ ކުޅުދުއްފުއްޓަށް އެކަށީގެންވާ ތަރައްގީއެއް ގެނެސްދެވިފައި ނެތްކަމަށް ދިއްދޫ ދާއިރާގެ ކުރީގެ މެމްބަރު ޢަބްދުއްލަޠީފް މުޙައްމަދު ވިދާޅުވެއްޖެއެވެ.
ލަތީފް މިހެން ވިދާޅުވީ ޕީޕީއެމް/ޕީއެންސީގެ ކޯލިޝަނުން ރޭ ކުޅުދުއްފުށީގައި ބޭއްވި "ދިވެހީންގެ ރާއްޖެ" ރައީސް ޔާމީން 2023 ކެމްޕޭނު ޖަލްސާގައި ވާހަކަ ދައްކަވަމުންނެވެ.
ރޭގެ ޖަލްސާގައި ވާހަކަ ދައްކަވަމުން ލަތީފް ވިދާޅުވީ ކުޅުދުއްފުއްޓަށް ރައީސް ޔާމިންގެ ސަރުކާރުގައި ގެނެސްދީފައިވާ ތަރައްގީ ފިޔަވާ މާބޮޑު ތަރައްގީއެއް އެ ސިޓީއަށް ގެނެވިފައި ނުވާއިރު، ފާއިތުވި 5 އަހަރު ތެރޭގައި އެސިޓީގައި ބޮޑު އެއްވެސް މަޝްރޫއެއް ފެށިފައިވެސް ނުވާކަމުގައެވެ.
އިތުރަށް ވާހަކަ ދައްކަވަމުން ލަތީފް ވިދާޅުވީ، ކުޅުދުއްފުށި ސިޓީ ރައްޔިތުންގެ މަޖިލިހުގައި ތަމްސީލުކުރާ ދެ މެމްބަރުންވެސް އިންތިޚާބު ވެގެން އައީ އެމްޑީޕީން ކަމަށްވާއިރު، އަދި އޭގެ އިތުރުން އެ ސިޓީގެ ކައުސިލްވެސް ރައްޔިތުން ދީފައިވަނީ އެމްޑީޕީއަށް ކަމުގައެވެ. އެހެންނަމަވެސް މި ދައުރުގައި އެސިޓީގައި މުހިންމު ބޮޑު އެއްވެސް މަޝްރޫއެއް އެކަށީގެންވާ ގޮތެއްގައި ކުރިޔަށް ގެންދެވިފައި ނުވާކަން ލަތީފް ފާހަގަ ކުރެއްވިއެވެ.
ބޮޑު ތިލަދުންމަތީގައި ކުޅުދުއްފުށްޓަށް ނާންނަ ތަރައްޤީއެއް އަންނާނެ އެހެން ރަށެއް ނޯންނާނެ. ސަބަބަކީ ކުޅުދުއްފުއްޓަކީ އެންމެ އާބާދީ ބޮޑު ރަށް ކަމަށް ވެފައި އަތޮޅުގެ އެހެން ރަށްރަށުން ގިނަ ޚިދުމަތްތަކެއް ހޯދަން އެރަށަން އަންނަން ޖެހޭތީ.
ރޭގެ ޖަލްސާގައި ވާހަކަ ދައްކަވަމުން ލަތީފް ވިދާޅުވިއެވެ.
ލަތީފް ވިދާޅުވީ ކުޅުދުއްފުށި ސިޓީގެ ރައްޔިތުން ތިބީ ރައީސް ޔާމިންއާއެކީ ކަމަށެވެ. ރޭގެ ޖަލްސާގައި އެރަށުގައި ޕީޕީއެމްއަށް ސަޕޯޓުކުރާ ގިނަ ބަޔަކު ބައިވެރިވެފައި ވެއެވެ.
