ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ޝުރުޢީ ކޯޓުތަކަށް ނުފޫޒު ފޯރުވާ ތަނެއް ނުފެންނަ ކަމަށާއި، މިވެރިކަމުގައި މުޅި ރާއްޖެެއަށް އުފާވެރިކަން ގެނެސްދީފައިވާކަމަށް އެމްޑީއޭގެ ލީޑަރު އަހުމަދު ސިޔާމް މުހައްމަދު ވިދާޅުވެއްޖެއެވެ.

ރިޔާސީ އިންތިޚާބުގައި ރައީސް ޞާލިހު ދެވަނަ ދައުރަކަށް އިންތިޚާބު ކުރުމަށް ބައިއަތު ހިފާފައިވާ ސިޔާމް ގެންދަވަނީ ރައީސް ޞާލިހާއިއެކު ކެމްޕެއިންގައި އަމަލީގޮތުންވެސް ބައިވެރިވަމުންނެވެ. ރައީސް ޔާމީނާއިކު ގާތް ގުޅުމެއް މީގެ ކުރިން އޮތް ސިޔާމް ވަނީ ނުސީދާ ގޮތަކަށް ނިމިދިޔަ ވެރިކަމާއި މިވެރިކަމާއި ހުރި ތަފާތު އަޅާކިޔަ ކުރީ ސަރުކާރަށް ފާޑު ވިދާޅުވެފައެވެ.

ކުރީގެ އެކުވެރިޔާ ރައީސް ޔާމީން ޖަލުގައި ތަންފީޒު ކުރަމުންދާ ހުކުމުގެ ސަބަބުން އިންތިޚާބުގައި ވާދަކުރުމުގެ ފުރުސަތު ވަނީ ބަންދުވެފައެވެ. ޔާމީންގެ ހުކުމާއި ގުޅިގެން އިދިކޮޅު ފަރާތްތަކާއި، ސިޔާސީ އިދިކޮޅު ލީޑަރުން ދަނީ ރައީސް ޔަމީންނަށް މިނިވަން އިންސާފުވެރި ޝަރީއަތެއް ލިބެންޖެހޭކަމަށް ވިދާޅުވެފައެވެ. އަދި ޝަރީއަތަށް ސަރުކާރުން ނުފޫޒު ފޯރުވާކަމަށް ތަކުރާރުކޮށް ދަނީ ވިދާޅުވަމުންނެވެ.

މިވާހަކަތަކާއި ގުޅިގެން ސިޔާމް މިއަދު ކުރެއްވި ޓުވީޓުގައި ވިދާޅުވީ ރައީސް ޞާލިހުގެ މިސަރުކާރުން އަދި ޚުދު ރައީސް ޞާލިހު ޝަރުއީ ދާއިރާއަށް ނުފޫޒު ފޯރުވާ ތަނެއް ނުފެންނަކަމަށެވެ. ފެނިގެން ދަނީ މިވެރިކަމުގައި ހަމަހަމަކަން ގާއިމް ކުރެވިގެންދާކަމަށެވެ. ދައުލަތް ހިންގުމުގައި އިރުއިރުކޮޅާ މުހިންމު މަޤާމުތަކުން މީހުން ވަކިކޮށް، ބަދަލު ކުރާތަން ނުފެންނަ ކަމަށް ސިޔާމް ވިދާޅުވިއެވެ.

މުޅި 5 އަހަރުގެ ދައުރު ނިންމާލީ އެންމެ ނާއިބު ރައީސްއަކާއެކު، މުހިއްމު މިނިސްޓްރީތަކުގެ މިނިސްޓަރުން ބަދަލެއް ނުކުރައްވާ، ކޯޓުތަކަށް ނުފޫޒު ފޯރުވާތަނެއް ނުފެނޭ، މުޅި ގައުމު ހަމަޖެހިއްޖެ، ފަތުރުވެރިން ކުރި ޒިޔާރަތް ރިކޯޑް އަދަދަށް، އާއިލާތަކަށް އުފާވެރިކަން. މިކަންކަމުން ރަމްޒުކޮށްދެނީ ރައީސް އިބްރާހިމް މުހައްމަދު ޞާލިހުގެ ހިންގުންތެރިކަމާ، ކެތްތެރިކަމާ، ހިކްމަތްތެރިކަން.

– ސިޔާމް ވިދާޅުވިއެވެ.

ސިޔާމް ރައީސަށް ތާއީދު ކުރެއްވި ފަހުން ސިޔާމް މުހައްމަދުގެ ކުންފުނި، ސަން ޓްރެވެލްސް އިން ހިލްޓަންއަށް ދެއްކުމަށް ސިންގަޕޫރުގެ އާބިޓްރޭޝަނުން ކޮށްފައިވާ ހުކުމަށް ތާއިދުކޮށް އެ ފައިސާ 14 ދުވަހުގެ ތެރޭގައި ދެއްކުމަށް ސިވިލް ކޯޓުން ސަން ޓްރެވަލްސްގެ މައްޗަށް ކުރި އަމުރު ތަންފީޒުކުރުން ފަސްކުރުމުގެ ވަގުތީ އަމުރެއް ވަނީ ނެރެފައެވެ.

ސަން ޓްރެވެލް އިން ހިލްޓަނަށް 24 މިލިއަން ޑޮލަރު ބަދަލުގެ ގޮތުގައި ދެއްކުމަށް ސިންގަޕޫރު އާބިޓްރޭޝަނުން ހުކުމްކޮށްފައިވަނީ ނ. މެދުފުށީގައި ސަންއިން ހަދާފައިވާ އިރުފުށި ރިސޯޓް ހިންގަން ހިލްޓަނާ އެކު ހެދި އެއްބަސްވުން ބާތިލްކުރި މައްސަލައިގައެވެ. އަދި އެ ހުކުމަށް ތާއީދުކޮށް އެ ފައިސާ ދައްކަން ސިވިލް ކޯޓުން ހުކުމް ކޮށްފައިވަނީ މިދިޔަ ފެބްރުއަރީ މަހުގެ 5 ވަނަ ދުވަހުއެވެ.

ހައިކޯޓުން އެ ހުކުމަށް އަމަލު ކުރުން މަޑު ޖައްސަން ހުކުމް ކޮށްފައިވަނީ ސަން ޓްރެވެލްސްގެ ފަރާތުން އެ ހުކުމް އިސްތިއުނާފު ކުރުމާއި ގުޅިގެންނެވެ. ހައި ކޯޓުގެ އަމުރުގައިވަނީ އެ ހުކުމަށް އަމަލުކުރުން ފަސްނުކޮށްފިނަމަ ސަން ކުންފުންޏަށް އިއާދަ ނުކުރެވޭނެ ގެއްލުންތަކެއް ލިބިދާނެ ކަމަށެވެ. އެހެން ކަމުން ހައިކޯޓުން އެ މައްސަލަ ބަލައި ނިމެންދެން ސިވިލް ކޯޓުގެ ހުކުމަށް އަމަލު ކުރަން ފަސް ކުރަން އެ ކޯޓުން ވަނީ އަމުރެއް ނެރެފައެވެ.