މިއަހަރުގެ ރިޔާސީ އިންތިޚާބަށް ވެރިކަން ކުރާ މައި ޕާޓީ އެމްޑީޕީން ކުރިމަތިލާއިރު، މިއިންތިޚާބަކީ ފާއިތުވެދިޔަ މާޒީގައިވެސް އެޕާޓީން ކުރިމަތިލާނެ އެންމެ ގޮންޖެހުންބޮޑު އިންތިޚާބެވެ. އެކަން އެޕާޓީގެ ލީޑަރޝިޕްގެ ބޭފުޅުންވެސް ތަކުރާރުކޮށް ދަނީ ވިދާޅުވަމުންނެވެ.
ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރައްވާނެ ކެނޑިޑޭޓެއް ކަނޑައަޅުއްވާފައިވަނީ އެޕާޓީގެ ތެރޭގައި ބޭއްވުނު ރިޔާސީ ޕްރައިމަރީއަކުންނެވެ. މިއީ މިފަހަރުގެ ރިޔާސީ އިންތިޚާބުގައި އެތެރޭގެ ޕްރައިމަރީއަކުން ރިޔާސީ ކެނޑިޑޭޓަކު ކަނޑައެޅި ފުރަތަމަ ޕާޓީވެސް މެއެވެ. ރިޔާސީ ޕްރައިމަރީގައި ރައީސް ނަޝީދު ބަލިކޮށް، ބޮޑު ތަފާތަކުން އިންތިޚާބު ކާމިޔާބު ކުރެއްވީ މިހާރުގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހެއެވެ.
ޕްރައިމަރީން ބަލިވުމުން ރައީސް ނަޝީދާއި އެމަނިކުފާނަށް ތާއީދު ކުރާ ފަރާތްތަކުން "ފިކުރެއްގެ ދިރުން" ނަމުގައި ސިޔާސީ ހަރަކާތެއް އުފައްދައި ސީދާ ސަރުކާރާއި ދެކޮޅު ހަރަކާތްތައް ރަސްމީކޮށް ފެށިއެވެ. މިހަރަކާތް ވެގެންދިޔައީ އިދިކޮޅު ފަރާތްތަކުން ސަރުކާރު ޖަވާބު ދާރީކޮށް ޒިންމާދާރު ކުރުމަށްކުރަމުންދިޔަ މަސައްކަތަށް ވާގިވެރިވާ އިތުރު ބާރަކަށެވެ. އެމްޑީޕީގެ ތެރޭގައި ތިއްބަވައިގެ އެޕާޓީއާއި ދެކޮޅަށް ފަޑުގައި މަސައްކަތް ކުރި ނަމަވެސް އެމްޑީޕީން މިބޭފުޅުންނާއިމެދު ފިޔަވަޅު އަޅައި ޕާޓީން ވަކި ކުރުމަށް މަސައްކަތް ނުކުރެއެވެ.
އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެފައިވަނީ އެމްޑީޕީގެ ރައީސްއާއި، އެމްޑީޕީގެ ނައިބް ރައީސާއި ޕާޓީއަށް އެތައް ޚިދުމަތްތަކެއް ކުރެއްވި ބޭފުޅުންނާއިމެދު ފިޔަވަޅު އެޅުމަކީ ފަސޭހަ ކަމެއް ނޫންކަމަށެވެ. އެއިޚުތިރާމު އެބޭފުޅުންނަށް އޮންނާނެކަމަށެވެ. ނަމަވެސް ރައީސް ނަޝީދާއި އަރިސްބޭފުޅުން އެމްޑީޕީން ވަކިވެ ޕާޓީ ހެދުމުން އެމްޑީޕީ މިހާރު އޮތީ ސާފުވެ އިންތިޚާބަށް ފުރިހަމައަށް ތައްޔާރުވެފައިކަމަށް ފައްޔާޒު ވަނީ ވިދާޅުވެފައެވެ.
ފޫ ވައް ވެއްޓިއްޖެ، އެމްޑީޕީ ރޫޅާލާނަން: ނަޝީދު
ކަށިކެޔޮ ގަނޑެއްހެން އެމްޑީޕީގެ ފޫ ވައް ވެއްޓިއްޖެ ކަމަށާއި، އެ ޕާޓީ ރޫޅާލާއްވާނެ ކަމަށް އެމްޑީޕީގެ ކުރީގެ ރައީސް އަދި ކުރީގެ ރައީސް މުހައްމަދު ނަޝީދު ރޭވަނީ ވިދާޅުވެފައެވެ. އެމްޑީޕީން އިސްތިއުފާ ދެއްވުމަށްފަހު، ނަޝީދު އިސްވެ އުފެއްދެވި "ދަ ޑިމޮކްރެޓްސް" އަށް ރަސްމީކޮށް ސޮއި ކުރައްވަން ރޭ އާޓިފިޝަލް ބީޗުގައި ވާހަކަ ދައްކަވަމުން އެމަނިކުފާނު ވިދާޅުވީ އެމްޑީޕީ އުފެއްދުމުގެ މައިގަނޑު އަމާޒަކަށްވީ ހަރުދަނާ އުސޫލުތަކާއި ހަމަތަކެއްގެ ތެރެއިން ރައްޔިތުންގެ ހާލަތު ރަނގަޅު ކުރުން ކަމަށެވެ.
އެކަމަކު އެ އުސޫލުތައް އެމްޑީޕީން ގެއްލުވާލުމުން، ޕާޓީ ދޫކުރައްވައި ޑިމޮކްރެޓްސް އުފައްދަވަން މަޖުބޫރުވި އެ ހަމަތައް ހިފެހެއްޓުމަށްޓަކައި ކަމަށެވެ. އެ އާއެކު އެމަނިކުފާނު ވަނީ އެމްޑީޕީގައި މިވަގުތު ތިއްބެވި ބޭފުޅުންނަށް އެ ހަމަތަކާއި އުސޫލުތައް ދޫކޮށްނުލައްވަން އެދިވަޑައިގަންނަވާފައެވެ. އެއާ ވިދިގެން ނަޝީދު ވަނީ ތަކުރާރުކޮށް އެމްޑީޕީ ރޫޅާލައްވާނެ ކަމަށް ހަރުއަޑުން ވިދާޅުވެފައެވެ.
"އެމްޑީޕީ ރޫޅާލާނަން. ރޫޅާނާލާން. ތި ކެޔޮގަނޑުގެ ފޫ ވައް ވެއްޓިއްޖެ. ތި ޕާޓީ އަޅުގަނޑުމެން ރޫޅާލާނަން. ރޫޅާލާނަން. ރޫޅާލާނަން. ރޫޅާލާނަން." ވަރަށް ކުރުކޮށް ދެއްކެވި ވާހަކަ ނިންމަވާލައްވަމުން ނަޝީދު ވިދާޅުވިއެވެ.
އިންތިހާބު ފަށާނީ ވެސް އެއްލައްކަ ވޯޓުން: ރައީސް ސޯލިހު
ނަޝީދު އެމްޑީޕީ ރޫޅާލަން މަސައްކަތް ފެށިކަން އިއުލާން ކުރެއްވިއިރު އެމަނިކުފާނުގެ ދުވަސްވީ އެކުވެރިވާ ރައީސް ޞާލިހު ވަނީ އެމްޑީޕީން ރިޔާސީ އިންތިޚާބުގައި ވާދަކުރާނީ ޔަގީން އެއްލައްކަ ވޯޓާއިއެކުގައި ކަމަށް ވިދާޅުވެފައެވެ. ރައީސް ޞާލިހުގެ އަމާޒުހުރީ މިއިންތިޚާބު އެއްބުރުން ކާމިޔާބު ކުރެއްވުމަށެވެ. އިންތިޚާބުގައި މިހާތަނަށް ވާދަކުރާ ހަމަ އެކަނި ކޯލިޝަނެއް އޮތީވެސް ރައީސް ޞާލިހުގެ ކައިރީގައެވެ. އަދާލަތާއި އެމްޑީއޭ އޮތީ ރައީސް ޞާލިހުގެ ފަހަތުގައެވެ.
ރައީސް ޞާލިހާއި އެމްޑީޕީ އޮތީ ރައީސް ނަޝީދަށް ޕާޓީ ތެރޭގައި ހުންނެވިއިރު ދޫދިން ގޮތަށް ދޫފޭ ގޮތަކަށް ނޫނެވެ. މިހާރު ވާދަވެރިއަކަށް ބަދަލުވުމުން ރައީސް ނަޝީދާއިވެސް ވާދަ ކުރެއްވުމަށް އެމްޑީޕީ އޮތީ ފުރިހަމަ އަށް ތައްޔާރުވެފައެވެ. އެމްޑީޕީގެ ޗެއާޕާސަން ވަނީ މީގެ ކުރިންވެސް ޕާޓީއެއް ހަދައިގެން ވާދަކޮށްލަން ނިކުންނެވުމަށް ދައުވަތު ދެއްވާފައެވެ.
ފެންނަން އޮތް އެއް ހަގީގަތަކީ ރައީސް ނަޝީދާއިއެކު މިހާތަނަށް ސިޔާސީ މަސައްކަތް ކުރި އެއްވެސް ލީޑަރަކަށް އެމަނިކުފާނުގެ ކުރިއަށް އަރަން މަސައްކަތް ކޮށްފިނަމަ އެމީހަކީ އެމަނިކުފާނުގެ ޒަމާންވީ ދުޝްމަނަކަށް ބަދަލުވާކެމެވެ. އިބުރާއާއި، ރީކޯ މޫސައާއި، ރައީސް ވަހީދާއި، ޑރ.މުނައްވަރާއި، ޑރ.ޑީޑީއާއި، އަލްހާން ފަހުމީ ފަދަ ބޭފުޅުންނަކީ އެމްޑީޕީ ތެރެއިން ބާރުވެރިކަމެއް ލިބި ނަޝީދުގެ މައްޗަށް ބާރެއް ފޯރުވަފާނެކަމަށް ބެލެވޭ މީހުންނަށް ވުމާއިއެކު އެއެންމެން ވަނީ އެމްޑީޕީން ވަކިކޮށްފައެވެ.
މާޒީގެ ތަޖުރިބާއިން ކުރިއަށް އޮތް ރިޔާސީ އިންތިޚާބަކީ ދެކޮޅަށްވެސް ފަސޭހަ އިންތިޚާބަކަށް ނުވާނެއެވެ. ނަމަވެސް ރައީސް ނަޝީދު އެވިދާޅުވިހާ ފަސޭހައިން އެމްޑީޕީ ރޫޅާ ލުމަކީވެސް ކުރަން ބޭނުންވި ނަމަވެސް ފަސޭހަ ކަމަކަށް ނުވާނެއެވެ.
