އެމްޑީޕީގެ ތެރޭގައި އޮތް ލާދީނީ ފިކުރު ދިއުމަކީ ލިބުނު އެންމެ ބޮޑު ހިތްހަމަ ޖެހުންކަމުގައި އެމްޑީއޭގެ ލީޑަރު އަދި ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް މުހައްމަދު ވިދާޅުވެއްޖެއެވެ.

މާފުށީގައި މިރޭ ބޭއްވި ރައީސް ޞާލިހުގެ ކެމްޕެއިން ޖަލްސާގައި ވާހަކަ ދައްކަވަމުން ސިޔާމް ވިދާޅުވީ މީގެ ކުރިން އެމްޑީޕީގެ ތެރޭ ތިއްބެވި ބައެއް ވެރިން އެކި ގައުމުތަކަށް ގޮސް ދީނީ އަގީދާއާ ޚިލާފު ވާހަކަތައް ދައްކަމުން އައި ކަމަށެވެ. ސިޔާމްގެ އެ ވާހަކަފުޅުތައް ނުސީދާ މޭރުމަކުން ރައްދުކުރެއްވީ އެމްޑީޕީގެ ކުރީގެ ރައީސް މުޙައްމަދު ނަޝީދަށެވެ.

މީގެ ތެރެއިން ބައެއް ވެރިން ޑެންމާކަށް ގޮސް، އެހެން ގައުމަކަށް ގޮސް އިސްލާމްދީނަށް ހަޖޫޖެހުން އެ މީހުންނަށް މި އޮންނަނީ އާންމުވެފައި. އަޅުގަނޑު އުފާކުރަން މިއަދު އެމްޑީޕީގެ ތެރޭގައި އެ ލާދީނީ ފިކުރު ނެތިގެން ދިޔަައިމަ. އަދި, ދިވެހިރާއްޖޭގެ އެންމެހައި ރައްޔިތުން އެންމެ އުފާވަނީ އެ ކަމާ.

– ސިޔާމް ވިދާޅުވިއެވެ.

ސިޔާމް ވިދާޅުވީ، ރައީސް އިބްރާހިމް މުހައްމަދު ސޯލިހަކީ ދީނީ ކަންކަމަށް އިސްކަން ދެއްވައި، އެ އުސޫލުން ކަންކަން ކުރަން އެނގިވަޑައިގަންނަވާ ބޭފުޅެއް ކަމަށެވެ.

އޭނާ ވިދާޅުވީ، ވެރިކަމަށް ފަސް އަހަރަކީ ދިގު މުއްދަތެއް ނޫން ކަމަށާއި އަދި ކޮވިޑުގެ އުނދަގޫ ހާލަތުގެ ތެރެއިން ވެސް ރައްޔިތުންނަށް ވެފައިވާ ވައުދުގެ ބޮޑުބައި ފުއްދާ ދެވިފައިވާ ކަމަށެވެ. އޭނާ ވިދާޅުވީ، ރައީސް އަކީ އިގްތިސާދީ ކަންކަން ކުރާނެ ގޮތް ރަނގަޅަށް އެނގިވަޑައިގަންނަވާ ބޭފުޅެއް ކަމަށެވެ.

އޭނާ ވިދާޅުވީ ރައީސާ އެކު ކެމްޕޭނަށް ގުރައިދޫ ދާއިރާއަށް ކުރެއްވި ދަތުރުފުޅުގައި ރައްޔިތުންގެ ފަރާތުން ވެސް މިއަދު އެމްޑީޕީ ހިނގަމުން އަންނަ ގޮތާމެދު ހިތްހަމަޖެހުން ފާޅުކޮށް ދައްކާ ވާހަކަތައް އިވިވަޑައިގަންނަވާކަމަށެެވެ. އެހެންކަމުން މިއީ ސިޔާސީ ވާހަކައެއް ނޫންކަން ހާމަވާކަމަށް ސިޔާމް ވިދާޅުވިއެވެ.

އެ މަނިކުފާނު ވިދާޅުވީ ހިނގަމުން މި އަންނަ ފަސް އަހަރުގެ ތެރޭ ރައީސް ޞާލިހުގެ ކިބައިން ފެނިވަޑައިގަތީ "ކެތްތެރިކަމުގެ އެންމެ މަތީ ދަރަޖަ" ކަމަށެވެ. އެއީ ކަންކަން ހާސިލްކުރުމަށް އެންމެ މުހިންމު ސިފަ ކަމަށް އެ މަނިކުފާނު ވިދާޅުވިއެވެ.

ސެޕްޓެމްބަރު މަހު އޮންނަ ރިޔާސީ އިންތިހާބުގައި އެމްޑީޕީ އާ އެކު ކޯލިޝަން ހަދަން އެމްޑީއޭގެ އިތުރުން އަދާލަތު ޕާޓީން ވަނީ އެއްބަސްވެފައެވެ.