ހެކީންގެ ހެކިބަސް ނަގަން ފެށުމަށްފަހު ދައުވ އަނބުރާ ގެނެސް، އިސްތިސްނާއީ ހާލަތެއްގައި މެނުވީ އަލުން ހުށަހެޅުން ގާނޫނުން ފުރުސަތު ނުދޭ ކަމަށާއި، އަދި އެކުގައި ކުރިޔަށް ގެންދާ ދައުވާއެއް ޝަރީއަތް ފެށުމަށްފަހު ވަކި ކުރަންވެސް ގާނޫނުން ތަން ނުދޭކަމުގައި ޔާމިންގެ ވަކޫލުންގެ ފަރާތުން ވިދާޅުވެއްޖެއެވެ.
ޔާމިންގެ ވަކީލުންގެ ޓީމުގައި މަސައްކަތް ކުރައްވަމުން ގެންދަވާ ގާނޫނީ ވަކީލު ސިޔާޒު ކުރެއްވި ޓުވީޓެއްގައި ވިދާޅުވީ މިހާލަތުގައި ކުރެވޭ އެއް ބަހުސަކަށް ވެގެން ދަނީ ޝަރީއަތުގެ މަރުހަލާ ފެށުމާއެކު ދައުވާލިބޭ ފަރާތްތަކުން ދިފާއު ހާމަކޮށްފައި އޮތުން ކަމަށެވެ.
މިގޮތުން އޭނާ ވިދާޅުވީ ދިވެހިރާއްޖޭގެ ގާނޫނީ ނިޒާމުގެ ތެރޭގައި، ގާނޫނާއި ޚިލާފް މިފަދަ އަމަލުތަކަށް ފަރުވާ ލިބެނީ އިސްތިއުނާފީ ކޯޓުތަކުން ކަމުގައެވެ.
އެ ހައްލު ހޯދުމަށް ހޭދަވާ މުއްދަތު ބަންދުގައި ނުހައްގު އަދަބެއް ލިބުމުން އެއަށް ޒިންމާ ކުރެވޭނެ ގޮތެއް ގާނޫނީ ނިޒާމުގެ ތެރެއިން ހޯދަން ޖެހެއެވެ.
ފުއްގިރި ކުއްޔަށް ދިނުމުގައި ޔާމިންގެ މައްޗަށް ކުރެވިފައިވާ ކޮރަޕްޝަނާއި މަނީ ލޯންޑަރިންގެ ދައުވާތައް، ހަމަ އެއް ދައުވާއެއް ކުރެވޭ ކުރިކް ރިޒާ ބަލިވެކަމަށް ބުނެ ކޯޓަށް ހާޒިރު ނުކުރެވޭތީ ކުރިޔަށް ނުގެންދެވިގެން، މައްސަލަ ކުރިޔަށް ގެންދިއުމަށް ޕީޖީން ކުރިކު ރިޒާގެ މައްސަލަ އަބުރާ ގެންދިއުމަށް ނިންމާފައުވާ ނިންމުކަށް އިޝާރާތް ކުރައްވަމުން، ޔާމިންގެ ލޯޔަރުންގެ ޓީމުގައި ހިމެނޭ ސިޔާޒު ކުރެއްވި ޓުވީޓުގައި ވިދާޅުވެފައި ވެއެވެ.
ދަށު ކޯޓުގައި މިހާރު ކުރިޔަށްދާ، ކުރީގެ ރައީސް ޔާމިންގެ މައްޗަށް ކުރެވެމުންދާ، ފުއްގިރި މައްސަލާއިގެ ޝަރީއަތްތައް، ޔާމީނާއި އެއް މައްސަލައެއްގައި ދައުވާލިބޭ ކުރިކް ދިގު މުއްދަތަކަށް ބަލިވެކަމަށް ބުނެ، ޝަރީއަތަށް ހާޒިރު ނުވެ، ޝަރީއަތް ބުރަކިޖެހި، ޔާމިންގެ ޝަރީއަތް ކުރިޔަށް ގެންދެވޭ ގޮތް ނުވެގެން، އެމައްސަލާގައި ކުރިކު ރިޒާގެބައި މިވަގުތައް އަނބުރާ ގެންދަން ޕީޖީން ކުރިމިނަލް ކޯޓުގައި މިއަދު ވަނީ އެދިފައެވެ.
ޕީޖީގެ މީޑިއާ އޮފިޝަލް މިއަދު ވިދާޅުވެފައިވަނީ، ކުރިކު ރިޒާގެ ފަރާތުން ކޯޓަށް ހުށަހަޅަމުންދާ މެޑިކަލް ލިޔެކިޔުންތަކާއި ގުޅިގެން ޝަރިއަތް ކުރިޔަށް ގެންދެވިފައި ނުވާކަމުގައެވެ. އޭނާ އިތުރަށް ވިދާޅުވެފައިވަނީ ޝަރީއަތަށް ކުރިކު ރިޒާގެ ފަރާތުން ހުށަހެޅި ހެކިތަކުގެ ސައްޙަކަން ކަށަވަރު ކުރުމަށްޓަކާ ފުލުހުން މިހާރު ގެންދަނީ އިތުރަށް ބަލަމުން ކަމުގައެވެ.
ބައެއް މީޑިއާތަކަށް ޕީޖީން މައުލޫމާތު ދީފައިވާ ގޮތުގައި، މައްސަލާގައި ހިމެނޭ ކުރިކު ރިޒާގެ ބައި ކުރިޔަށް ގެންދިއުމުގެ މަގު ގާނޫނީގޮތުން މިހާރުވަނީ މިވަގުތައް ބަނދުވެފައެވެ. އަދި ޕީޖީ އޮފީހުން އިތުރަށް ބުނެފައިވަނީ ޔާމިންގެ މައްސަލައަކީ އާންމު މަސްލަހަތު އިންތިހާއަށް އޮތް މައްސަލައަކަށް ވާތީ، މައްސަލާގަ ހިމެނޭ އެކެއްގެ ސަބަބުން މައްސަލަ ހުއްޓިފައި އޮތުމަކީ އެމައްސަލާގައި އާންމު މަސްލަހަތު އޮތް ގޮތްކަމަށް އެ އޮފީހުން ނުދެކޭ ކަމުގައެވެ.
ޕީޖީ އޮފީހުން ބޭނުންވަނީ، ކުރިކު ރިޒާގެ މައްސަލަ މިވަގުތައް މަޑު ޖައްސާލުމަށްފަހު، ފުލުހުން މިހާރު ކުރިޔަށް ގެންދާ ތަހުގީގުތައް އިތުރަށް ފުރިހަމަ ވުމަށްފަހު، ކުރިކުގެ މައްޗަށް ކުރާ ދައުވާ އަލުން ކޯޓަށް ހުށަހެޅުމަށެވެ.
"ޚަބަރު އޮންލަައިން"އަށް މައުލުމާތު ލިބިފައިވާގޮތުގައި، ކުރިކު ރިޒާ ޝަރީއަތަށް ހުށަހަޅަމުންދާ މެޑިކަލް ރިޕޯޓުތަކުގެ ސައްހަކަން ކަށަވަރު ކުރުމަށް ޕީޖީން އައިޖީއެމްއެޗްގައިވެސް އެދުނެވެ. އަދި ޕީޖީން ފޮނުވި ސިޓީގެ ޖަވާބުގައި، ކުރިކު ރިޒާއަށް މެޑިކަލް ސެޓްފިކެޓްތައް ދޫކޮށްފައިވަނީ އެހެންތަނަކުން ހަދާފައިވާ ސެޓްފިކެޓްތަކަކަށް ބަރޯސާކޮށް ކަމަށްވާތީ، އެއީ އެންމެ ރަގަޅު އުސޫލުން ހިގާފައިވާ މުއާމަލާތެއް ނޫންކަމަށް އަިއޖީއެމްޗްއިން ދެކޭކަމަށް އެހޮސްޕިޓަލުން ޕީޖީއަށް މައުލޫމާތު ދީފައިވާކަމަށްވެއެވެ.
އަދި މިކަން މިގޮތަށް ދިމާވީ، ޝަރީއަތުގެ ބޭނުމަށް މެޑިކަލް ރިޕޯޓުތައް ދޫކުރުމަށް އުސޫލުތަކެއް އެ ހޮސްޕިޓަލުގައި އެކަށައެޅިފައި ނޯންނާތީ ކަމަށާއި، އެކަމަށްޓަކާ އެ ހޮސްޕިޓަލުން އުސޫލުތަކެއް އެކަށައަޅާނެކަމަށް އައިޖީއެމްއެޗްއިން ޕީޖީއަށް ފޮނުވި ޖަވާބުގައި ބުނެފައިވާކަމަށްވެސް "ޚަބަރު އޮންލައިން"އަށް ވަނީ މައުލޫމާތު ލިބިފައެވެ.
މައުލޫމާތު ލިބިފައިވާ ގޮތުގައި ޕީޖީންވަނީ އައިޖީއެމްއެޗްގެ ސިޓީ މިހާރު ޝަރީއަތަށްވެސް ހުށަހަޅާފައެވެ.
ކުރީގެ ރައީސް އަބްދުﷲ ޔާމީންގެ މައްޗަށް ކްރިމިނަލް ކޯޓުގައި ކުރިއަށްގެންދާ ޝަރީއަތްތައް އީދު ބަންދަށްފަހުވެސް ބާރާށް ކުރިޔަށް ގެންދަން ތާވަލް ކުުރިކަމުގައިވި ނަމަވެސް، އެމައްސަލާގައި ދައުވާލިބޭ ކުރިކް ރިޒާ ބަލިވުމުގެ ސަބަބުން ޝަރީއަތް ކުރިޔަށް ނުގެންދެވި ޝަރީއަތުގެ އަޑުއެހުންތަކަށް ހުއްޓުމެއް ވަނީ އައިސްފައެވެ.
މިގޮތުން ފާއިތުވި އީދު ބަންދަށްފަހުވެސް ކުރިކު ރިޒާ ބަލިވެ އުޅޭތީ އޭނާއަށް ޝަރީއަތަށް ހާޒިރު ނުވެވޭނަކަން އަންގާފައިވާތީ ޝަރީއަތްތައް ކެންސަލް ކުރަޖެހިފައިވާކަމަށް ކުރިމިނަލް ކޯޓުން ދަނީ ބުނަމުންނެވެ. އެއާއެކު، ދަށު ކޯޓުގައި އޮތް ޔާމިންގެ މިމައްސަލަ ފާއިތުވި 2 މަހެއްހާދުވަހުވެސް ކުރިށް ގެންދެވިފައި ނުވަނީ ޔާމިންއާއި އެއް މައްސަލައެއްގައި ދައުވާލިބޭ ކުރިކު ރިޒާ ބަލިވެ ޝަރީއަތަށް ހާޒިރު ނުކުރެވުމުގެ ސަބަބުންނެވެ.
އަދި ޔާމިންވަނީ ދަށު ކޯޓުގައި ކުރިޔަށްދާ މައްސަލައިގެ ސްޕީޑު އަވަސްކަމުން އޭގެ ޝަކުވާތައްވެސް ތަކުރާރުކޮށް ކުރައްވާފައެވެ. ހަމައެއާއެކު ޔާމިން އެދެމުން އައިސްފައިވަނީ ހައި ކޯޓުގައި ކުރިޔަށްދިޔަ އޭނާގެ އިސްތިއުނާފުގެ މައްސަލަ އަވަސް ކޮށްދިނުމަށެވެ. އެހެންނަމަވެސް އެމައްސަލަ ކުރިޔަށްދަނިކޮށް، މައްސަލާއިގެ ބެންޗުގެ ބައެއް ފަނޑިޔާރުން ޗުއްޓީއަށް ވަޑައިގެންނެވުމާއި ގުޅިގެން، އެމައްސަލައިގެ ޝަރީއަތްވެސް މިހާރުވަނީ ހުއްޓުމަކަށް އައިސްފައެވެ.
ބައެއް ފަރާތްތަކުން ތުހުމަތު ކުރަނީ، ދަށުކޯޓުގެ މައްސަލަ ބުރަކި ޖެހިފައިވަނިކޮށް، ހައި ކޯޓުގެ މައްސަލަ އަވަސްކުރުމަށް ޔާމީން އެދެމުން އައިސްފައިވަނީ ހައިކޯޓުން މިނިވަންވެ، ކުރިޔަށް އޮތް ރިޔާސީ އިންތިޚާބުގައި ވާދަކޮށް، އަދި ދަށު ކޯޓުގައި ކުރިޔަށްދާ މައްސަލަ ކުރިޔަށް ނުގެންދެވޭނެ ގޮތް ހެދުމަށެވެ.
ޔާމިންއާއި ކުރިކު ރިޒާއަށްވެސް އެއް މައްސަލައެއްގައި ދައުވާ ލިބޭ މިމައްސަލައިގެ އަޑުއެހުންތަކަށް ހާޒިރު ނުވެވޭ މިންވަރަށް ދިގުމުއްދަތަކަށް ކުރިކު ރިޒާ ބަލިވެ އުޅެނީ ކޮންކަހަލަ ސިއްހީ މައްސަލައެއްގައި ކަމެއް ސާފު ވެފައެއް ނުވެއެވެ.
