އިދިކޮޅު ޕްރޮގްރެސިވް ކޯލިޝަންގެ ރިޔާސީ ކެނޑިޑޭޓް ރައީސް ޔާމީންގެ ލަފާފުޅުގެ ދަށުން، އެކޯލިޝަންގެ އިސްވެރިން ޖުމްހޫރީީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމާއި ބައްދަލު ކުރައްވައިފިއެވެ.
މިބައްދަލުވުމުގައި ޖޭޕީގެ ފަރާތުން ބައިވެރިވީ ޤާސިމާއި، ނިހާނެވެ. އަދި ޕްރޮގްރެސިވް ކޯލިޝަނުން ބައިވެރިވީ ކޯލިޝަން މިވަގުތު ހިންގުމާއި ހަވާލުވެ ހުންނެވި އަބްދުއްރަހީމާއި، ފަރެސްމާތޮޑާ ދާއިރާގެ މެމްބަރު ހުސެއިންނާއި، ޕީޕީއެމްގެ ނައިބް ރައީސް ޝިޔާމްއާއި، މަހިބަދޫ ދާއިރާގެ މެމްބަރު އަހުމަދު ތޯރިގެވެ.
މިބައްދަލުވުމާއި ގުޅޭގޮތުން އަދުރޭ ވިދާޅުވީ ގައުމުގައި ހުރި ބޮޑެތި މައްސަލަތަކާ ގުޅޭގޮތުން ރައީސް ޔާމީނުގެ ލަފާފުޅާ އިރުޝާދުގެ މަތިން ޖޭ.ޕީގެ ލީޑަރ ޤާސިމް އިބްރާހިމާއިއެކު މިއަދުވަނީ މަޝްވަރާ ބައްދަލުވުމެއް ބޭއްވިފައިކަމަށެވެ. ނަމަވެސް މަޝްވަރާގެ އެއްވެސް ތަފްސީލެއް ހާމަކޮށްފައި ނުވެއެވެ.
މިއީ މިފަހަރުގެ ރިޔާސީ އިންތިޚާބުގައި ޖޭޕީއާއި، ޕީޕީއެމްގެ ވެރިން އެކީގައި ބޭއްވި ފުރަތަމަ ބައްދަލުވުމެވެ. ޔާމީނަށް އިންތިޚާބުގައި ވާދަކުރުމުގެ ފުރުސަތު ހަނިވަމުންދާއިރު، ޕީޕީއެމްގެ ޓީކެޓަށް ވާނެ ގޮތަކަށް ގިނަ ސިޔާސީ ބޭފުޅުންނާއި ރާއްޖޭގެ ގިނަ ބަޔަކު ދަނީ އިންތިޒާރު ކުރަމުންނެވެ.
