ޤައުމީ ޓީމުތަކުގެ ކުޅުންތެރިންގެ މިދިޔަ މަހުގެ މުސާރަ އަދިވެސް ޖަމާނުވާކަން އެނގިއްޖެއެވެ.
ޤައުމީ ޓީމުތަކުގެ ކުޅުންތެރިންނާއި އޮފިޝަލުންނަށް މުސާރަ ދޭން ފެށީ ކުރީގެ ރައީސް ޔާމީންގެ ވެރިކަމުގައެވެ. މިހާތަނަށް ކުޅުންތެރިންގެ މުސާރައަކީ ބަރާބަރަށް ދެމުންދިޔަ އެއްވެސް މައްސަލައެއް ދިމާ ނުވާ މުސާރައެކެވެ. ނަމަވެސް މިދިޔަ މަހުގެ މުސާރަ ޖަމާނުވެ މިމަހުގެ 10 ފާއިތުވެދިޔަ އިރުވެސް މުސާރައާއި ގުޅޭ ތަފްސީލެއް މިނިސްޓްރީން އެސޯސިއޭޝަންތަކާއި ހިއްސާ ކޮށްފައިނުވެއެވެ.
ޚަބަރު އޮންލައިނަށް މައުލޫމާތު ލިބިފައިވާ ގޮތުގައި މުސާރަ ތައްޔާރުކޮށް، ޔޫތު މިނިސްޓްރީން ވަނީ ޢީދު ބަންދުގެ ކުރިން ފިނޭންސް މިނިސްޓްރީއަށް ފޮނުވާފައެވެ. ނަމަވެސް މިނިސްޓްރީއަށް މިއަހަރަށް ކަނޑައެޅި ބަޖެޓު ހުސްވެފައިވާތީ މިހާތަނަށްވެސް މުސާރަ ޖަމާވެފައި ނުވާކަން ވަނީ އެނގިފައެވެ.
ޔޫތު މިނިސްޓްރީން ވަނީ ބަޖެޓް ކުރުމެއްނެތި ބޮޑު ކުޅިވަރު އެވޯޑެއް ބާއްވާފައެވެ. މިއެވޯޑަށް ބޮޑު ހޭދައެއް ކޮށްފައިވާއިރު، މިއީ ފާޑުކިޔުން ބޮޑުވި އެވޯޑު ހަފުލާއެއްކަން ފާހަގަކޮށްލެވެއެވެ.
ޤައުމީ ޓީމުތަކުގެ ކުޅުންތެރިންނާއި އޮފިޝަލުންނަށް ދޭންޖެހޭ މުސާރަ ނުދީ ލަސްވާތީ އެކަމުގެ ކަންބޮޑުވުން ބައެއް ކުޅުންތެރިންނާއި އޮފިޝަލުންވެސް ދަނީ ފާޅު ކުރަމުންނެވެ. މިކަމުގެ ކަންބޮޑުވުން އިތުރުވެފައިވަނީ، ބައެއް އެސޯސިއޭޝަންތަކުގައި ހަރަކާތްތެރިވާ، ޤައުމީ ޓީމުތަކަށް ނިސްބަތްވާ އޮފިޝަލުންނަށްވެސް އެސޯސިއޭޝަންތަކުންވެސް މުސާރަ ނުދީ އެތައް މަހެއް ވުމުން މާލީ ގޮތުން ބޮޑު ގޮންޖެހުމަކާއި ކުރިމަތިވެފައި ވުމުންނެވެ.
މީގެ ކުރީގެ ސަރުކާރުގައި ރާއްޖޭގެ އެތްލީތުންނަށް އެލަވަންސް ދިނީ ތަފާތު ގިންތިތަކަށް ބަހާލައިގެންނެވެ. ނަމަވެސް މި ސަރުކާރުން ވަނީ އެ ގިންތިތައް އުވާލާ އެއްހަމަކޮށްފައެވެ. މިހާރު އޮތް ގޮތުން ގައުމީ އެތްލީޓަކަށް މަހެއްގެ މައްޗަށް 5000 ރުފިޔާގެ އެލަވަންސެއް ލިބިގެންދާނެ އެވެ. އެއީ ވަކި ކުޅިވަރެއް ތަފާތުކުރުމެއް ނެތިއެވެ.
މަހެއްގެ މައްޗަށް ގައުމީ ޓީމުތަކުގެ 328 ކުޅުންތެރިންނަށް ގާތްގަނޑަކަށް 1.4 މިލިއަން ރުފިޔާ ހަރަދުކުރާ ކަމަށް މަހްލޫފް ވިދާޅުވެފައެވެ. ކުޅުންތެރިންނަށް އެ ދޭން އޮންނަ ދުވަހު އެލަވަންސް ޖަމާވާނީ ކޮންމެ މަހެއްގެ 15 ވަނަ ދުވަހުގެ ކުރިން އެސޯސިއޭޝަންތަކުން ޔޫތު މިނިސްޓްރީ އަށް ލިސްޓު ފޮނުވުމުންނެވެ.
