އިދިކޮޅު ޕްރޮގްރެސިވް ކޯލިޝަންގެ ފަރާތުން ރިޔާސީ އިންތިޚާބުގައި ވާދަކުރާ ކެނޑިޑޭޓް ރައީސް ޔާމީންގެ ކެމްޕެއިން އަތޮޅު ތެރޭގައި ރަސްމީކޮށް ފަށާފައިވާކަމަށް އެކޯލިޝަނުން ބުނެފިއެވެ.

އިދިކޮޅު ކޯލިޝަނުން ބުނެފައިވަނީ މާލޭގައި މިމަހުގެ 3 ވަނަަ ދުވަހު ރައީސް ޔާމީންގެ ކެމްޕެއިން ފަށާފައިވާއިރު، މިއަދު އަތޮޅު ތެރޭގައި ކެމްޕެއިން ރަސްމީކޮށް ފެށިފައިވާކަމަށެވެ. ކެމްޕެއިން ހަރަކާތްތަކުގެ ތެރެއިން ރާއްޖޭގެ ދެކުނުގެ އަތޮޅުތަކަށް ޕީޕީއެމްގެ ޓީމުން ދަނީ ޒިޔާރަތް ކުރަމުންނެވެ. އެގޮތުން ގއ، ގދ، ފުވައްމުލައް ސިޓީ އަދި އައްޑޫ ސިޓީ ގައި މިވަނީ ރަސްމީކޮށް ކެމްޕެއިން ފަައިފައެވެ.

ރަސްމީކޮށް ކެމްޕެއިން ފެށުމަށް ބޭއްވުނު ބައްދަލުވުމުގައި ވާހަކަފުޅު ދައްކަވަމުން އިދިކޮޅު ކޯލިޝަން ހިންގެވުމާ ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް ވިދާޅުވީ ޔާމީން ވާދަކުރައްވާ ނަމަ އިންތިހާބުގައި ދެވަނަ ބުރެއް ނޯންނާނެ ކަމަށާއި ރައްޔިތުން ބޭނުންވަނީ މިވެރިކަން ބަދަލުކުރަން ކަމަށެވެ. އަދި ރައީސް ޔާމީނުގެ ކެނޑިޑެސީ އީސީން ބަލައިގަންނާނެ ކަމަށް އަދުރޭ ވަނީ ވިދާޅުވެފައެވެ.

"ރައީސްޔާމީން 2023" ރިޔާސީ ކެމްޕޭން ގއ، ގދ، ފުވައްމުލައް ސިޓީ އަދި އައްޑޫ ސިޓީ ގައި ފެށުމުގެ ބައްދަލުވުން
⁦#DhiveheengeRaajje⁩ ⁦#RY2023⁩ ⁦#FreePresidentYameen pic.twitter.com/BO32dq7epV

— Progressive Party of Maldives (@ProgressPartyMV) July 10, 2023

ރައީސުލްޖުމްހޫރިއްޔާ ކަމަށް ކުރިމަތިލުމުގެ ޝަރުތުތަކުގެ ތެރޭގައި ޖިނާއީ ކުށެއް ކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް ކުރެވިފައިވާ މީހަކު ނަމަ އެ ހުކުމް ތަންފީޒު ކޮށް ނިމުނުތާ ނުވަތަ ހުކުމް ކަނޑައެޅުނު އަދަބު މާފު ކުރެވުނުތާ ތިން އަހަރުވެފައިވުން ހިމެނެއެވެ.

މީގެ އިތުރުން ޔާމީންގެ ވެރިކަމުގައި ޖަލުތަކާއި ޕެރޯލްގެ ގާނޫނަށް 2015 ވަނަ އަހަރު ގެނައި އިސްލާހެއްގައި ސިޔާސީ ޕާޓީ އާއި ޖަމިއްޔާތަކަށް އާންމު މެންބަރެއްގެ ހައިސިއްޔަތުން ނިސްބަތްވުން ފިޔަވައި، އެއިން ތަނެއްގެ މަސްއޫލު ފަރާތެއްގެ ގޮތުގައި ހުރުމާއި އެ ތަންތަނުން ހިންގާ އެހެން ހަރަކާތްތަކުގައި ބައިވެރިވުމުގެ ހައްގު، ހުކުމެއް ތަންފީޒުކުރުމަށްޓަކައި ޖަލުގައި ބަންދުކުރެވިފައި ހުންނަ މުއްދަތުގައި ނޯންނާނެ ކަމަށް އޮވެއެވެ. އެހެންވެ ޔާމީނަށް ރިޔާސީ ކެންޑިޑޭޓެއްގެ ހައިސިއްޔަތު ގާނޫނީ ގޮތުން އޮންނާނެ ކަމާ މެދު ވެސް އޮތީ ސުވާލު އުފެދިފައެވެ.