ކުރިއަށް އޮތް ރިޔާސީ އިންތިޚާބުގައި ރައީސް ޞާލިހު ދެވަނަ ދައުރަކަށް އިންތިޚާބު ކޮށްދެއްވުމަށް އަތާއި އަތް ގުޅާލީ، އުފާވެރި އަމާން ރާއްޖެއެއް ބިނާ ކުރުމުގެ މަތިވެރި އަޒުމުގައި ކަމަށް އެމްޑީއޭގެ ލީޑަރު އަހުމަދު ސިޔާމް މުހައްމަދު ވިދާޅުވެއްޖެއެވެ.
ސިޔާސީ މަސައްކަތުގައި މާޒީގައި ރައީސް ޔާމީނާއި ގާތް ގުޅުމެއް އޮތް ސިޔާމް އާއި، އެމްޑީއޭއިން ނިންމީ މިފަހަރުގެ ރިޔާސީ އިންތިޚާބުގައި އެމްޑީޕީއާއިއެކު ރައީސް ޞާލިހަށް ދެވަނަ ދައުރެއް ހޯދުމަށް މަސައްކަތް ކުރުމަށެވެ. ސިޔާމް ވަނީ ރޭ ފޯކައިދޫގައި ބޭއްވި ޖަލްސާގައި ބައިވެރިވެ ވާހަކަވެސް ދައްކަވާފައެވެ.
ސިޔާމް ވިދާޅުވީ ރައީސް ޞާލިހާއި ބައިއަތު ހިފައި ވެރިކަމަށް ގެނައުމަށް މަސައްކަތް ކުރަނީ، ރާއްޖެ ބިނާކޮށް ހެޔޮވެރިކަމެއް ގާއިމް ކުރުމުގެ އަޒުމުގައި ކަމަށެވެ.
ހިތާއި ދުލާއި އަމަލުން، ރައްޔިތުންނަށް ހެޔޮ ވެރިކަމެއް ކޮށްދިނުމަށް ރައްޔިތުންނަށް އުފާވެރި އަމާން ރާއްޖެއެއް ބިނާކޮށް ދިނުމަށް އަތު ގުޅާލިން، އިރާދަކުރެެއްވިޔާ ކާމިޔާބު ވާނެ.
– ސިިޔާމް ވިދާޅުވިއެވެ.
ސިޔާމް ރޭ ވިދާޅުވީ ފާއިތުވީ 20، 25 އަހަރު ތެރޭގައި ވެރިކަންތަކުން ރައްޔިތުން ބޭނުންވާ އުންމީދުތައް ހާސިލުވާ މިންވަރު އޭނާއަށް ފެނިފައިވާ ކަމަށެވެ.
ކޯލިޝަނެއް އޮތުމާއި ނެތުން ވެސް ފެނިއްޖެ. ބޭނުންވަނީ ރައްޔިތުންނަށް ވައުދުވެފައި ވައުދު ފުއްދަން. އެކަން ކުރެވޭނީ ފަސް އަހަރު ވެރިކަން ކުރެވިގެން. އަދި ކޯލިޝަނެއް އޭގެ އެންމެ ރަނގަޅު ގޮތުގައި ހިންގިގެން. ކޯލިޝަނެއް ފަސް އަހަރު ވަންދެން މައްސަލައެއް ނެތި ހިންގީ މިހާރުގެ ރައީސް ސޯލިހު.
– ސިޔާމް ވިދާޅުވިއެވެ.
ސިޔާމް ފާހަގަ ކުރެއްވި ގޮތުގައި އޭނާ ރައީސް ސޯލިހަށް ތާއީދުކުރަން ނިންމެވި ދެ ވަނަ ސަބަބަކީ ޔޫކްރެއިން ހަނގުރާމަ އާއި ކޮވިޑާ ގުޅިގެން އިގްތިސޯދަށް އައި ލޮޅުންތަކުގެ ވަގުތުގައި އެމަނިކުފާނު ކަން ކުރެއްވި ގޮތުގެ މޮޅު ކަމުންނެވެ. އެ ގަދަ ލޮޅުމުން ސަލާމަތްވެ ރާއްޖެ ކޮޅަށް ޖެއްސުނީ ބޭރު ގައުމުތަކުން ލޯނު ނަގައިގެން އަދި، ރިސޯޓު ހިންގާ މީހުންނާއި, ބޮޑު ވިޔަފާރި އާއި, ކުދި ވިޔަފާރި އާއި, ވަޒީފާ ތިބި މީހުންނަށް ސަރުކާރުން ދިން ލޯނާއި މާލީ ލުއިތަކުގެ ސަބަބުން ކަމަށް، ރިސޯޓުތައް ހިންގަވާ މަހުޖަނު ސިޔާމް ވިދާޅުވިއެވެ. ކޮވިޑާއި ޔޫކްރެއިން ހަނގުރާމަ ފެށުމާއެކު އެ ކަމުގެ އަސަރު އޭނާގެ ސަން ކުންފުންޏަށް ވެސް ކުރި ކަމަށް ފާހަގަކުރެއްވިއެވެ.
