އިދިކޮޅު ޕީޕީއެމްގެ ރައީސް އަދި ކުރީގެ ރައީސް ޔާމިންގެ މައްޗަށް ރާއްޖޭގެ ކޯޓުތަކުގައި ހިގަމުންދާ މައްސަލަތަކާއި ގުޅޭ ޚާއްސަ އަޑު އެހުމަކަށް، ޖެނީވާގައި ހުންނަ ޔޫއެން ހިއުމަން ރައިޓްސް ކައުންސިލްގައި ފުރުސަތު ދީފަ އެބައޮތް ކަމުގައި ޕީއެންސީގެ ނާއިބު ރައީސް އަދި ރައްޔިތުންގެ މަޖިލިހުގެ މާވަށު ދާއިރާގެ މެމްބަރުން މުހައްމަދު ސައީދު ވިދާޅުވެއްޖެއެވެ.
މިއަދު ޕީޕީއެމްގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސައީދު ވިދާޅުވީ ރައީސް ޔާމިންގެ މައްސަލައިގެން އަޑުއެހުމަކަށް ޔޫއެން ހިއުމަން ރައިޓްސް އޮފީހުން ފުރުސަތު ދީފަ އޮތީ މިމައްސަލާގައި ރާއްޖޭގެ ހޯދޭނެ އިތުރު ހައްލެއް ދެން ފެންނާން ނެތުމުން ކަމުގައެވެ. އަދި މިފަދަ ފުރުސަތުތަކަކީ އަމިއްލަ ގައުމުގައި އިންސާފު ލިބޭނެ މަގެއް ނުފެނުމުން ލިބޭ ފުރުސަތުތަކެއް ކަމުގައިވެސް އޭނާ ވިދާޅުވިއެވެ.
އެތެރޭގެ ފަރުވާ އެގްޒޯސްޓް (ހުރިހާ ފުރުސަތުތަކުގެ ބޭނުން ކޮށް ނިމުމުން) ވީމައޭ އިންޓަރނޭޝަނަލް އިންޓަރވެންޝަންއެއް (ބައިނަލްއަގުވާމީ ފަރާތްތަކުން މައްސަލައިގެތެރެއަށް ވަންނަނީ) ސިސްޓަމެޓިކަލީ ހެދޭނީ. އެންމެ ފަހުން މިހާރު އަޅުގަޑުމެންނަށް ޔޫއެން ޖެނީވާއިން، ހިއުމަން ރައިޓްސް އޮފީހުން އަޅުގަޑުމެންނަށް ޖާގަ ދީފަ އެބައޮތް ހިއަރިންއަކަށް (އަޑު އެހުމަކަށް) ރައީސް ޔާމިންގެ މައްސަލާގަ. އެއީ އަޅުގަޑުމެން ޑޮމެސްޓިކް ރެމެޑީސްތައް އެގްޒޯސްޓު ވީމަ (ގައުމުގައި އިންސާފު ނުލިބުމުން) ލިބޭ ފުރުސަތު.
ރައީސް ޔާމިންގެ މައްޗަށް ތަންފީޒު ކުރަމުންދާ ހުކުމާއި އަދި ކުރިޔަށްދާ ޝަރީއަތްތަކާއި ގުޅޭގޮތުން ޔޫއެން ހިއުމަން ރައިޓްސް ކޮމިޝަންގައި އަޑުއެހުމެއް ބޭއްވުމަށް ހަމަޖެހިފައިވާކަން ފުރަތަމަ ފަހަރަށް އިއުލާން ކުރައްވަމުން ސައީދު ވިދާޅުވިއެވެ.
އެހެންނަމަވެސް މި އަޑުއެހުން ތާވަލް ކުރެވިފައި އޮތީ ކޮންއިރަކަށް ކަމެއް، އަދި މިއީ ކޮން އުސޫލަކުން ހަމަޖެހިގެންދިޔަ އަޑުއެހުމެއް ކަމެސް ސައީދު ވިދާޅުވެފައެއް ނުވެއެވެ.
ޔޫއެން ހިއުމަންރައިޓްސް ކޮމިޝަންގައި ވަކިވަކި ފަރުދުންގެ މައްޗަށް ގައުމުތަކުގައި ހަމަޖެހިފައި ހުންނަ ގާނޫނުތަކުން ތަންފީޒު ކުރެވެމުންދާ ހުކުމްތަކާއި ގުޅޭގޮތުން މިހާތަނަށް މިފަދަ އަޑުއެހުމެއް ބާއްވާފައި ނުވާކަން ފާހަގަ ކޮށްލެވެއެވެ. އެހެންކަމުން ރައީސް ޔާމިންއަށް އިންސާފު ނުލިބުނުކަމަށް ނިންމާ ޔޫއެން ހިއުމަން ރައިޓްސް ކޮމިޝަންގައި ޚާއްސަ އަޑުއެހުމެއް ބާއްވައިފި ނަމަ ވެގެން ދާނީ އެ ކައުންސިލްގައި މިހާތަނަށް ބޭއްވޭ މިފަދަ ފުރަތަމަ އަޑުއެހުން ކަމުގައެވެ.
ރައީސް ޔާމިންއަށް ރާއްޖޭގައި އިންސާފު ނުލިބުނު ކަމަށް ނިންމާ، ޔޫއެން ހިއުމަން ރައިޓްސް ކޮމިޝަންގައި ޚާއްސަ އަޑުއެހުމެއް ބޭއްވުމަށް ހަމަޖެހިފައިވާކަމަށް ޕީޕިއެމްއިން ބުނެފައިވާއިރު، މި އަޑުއެހުމާއި ގުޅޭގޮތުން ސަރުކާރުން އެއްވެސް ވާހަކައެއް ވިދާޅުވެފައެއް ނުވެއެވެ.
