އަލް-ހަރަމައިން ހައްޖު ގްރޫޕުގެ ބެލުމުގެ ދަށުން ހައްޖަށް ގޮސް އުޅެނިކޮށް ގެއްލިގެން ހޯދަމުން ދިޔަ ރ. މާކުރަތު، އުމުރުން 72 އަހަރުގެ މުހައްމަދު ނަސީމް ނިޔާވެފައި އޮއްވާ ފެނިއްޖެއެވެ.
އިސްލާމިކް މިނިސްޓްރީން ވިދާޅުވެފައިވަނީ، ނަސީމް ގެއްލިގެން ހޯދަމުން ދާތާ 4 ދުވަސް ވެފައިވަނިކޮށް، އޭނާ ނިޔާވެފައި ވަނިކޮށް ފެނިފައިވަނީ ނޫރު ފަރުބަދައާއި ދިމާލުން ރޭގެ ދަންވަރުގެ ވަގުތެއްގައި ކަމުގައެވެ. އަދި އޭނާ ފެނިގެން ހޮސްޕިޓަލަކަށް ގެންދިޔައިރުވެސް ނިޔާވެފައިވާކަން ހޮސްޕިޓަލުން ކަށަވަރު ކޮށްދީފައިވާކަމަށްވެސް އިސްލާމިކް މިނިސްޓްރީ މައުލޫމާތު ދީފައި ވެއެވެ.
އަލް-ހަރަމައިން ގްރޫޕުގެ އިސް ފަރާތަކުން މީގެ ކުރިން ބައެއް މީޑިއާތަކަށް މައުލޫމާތު ދެމުން ވިދާޅުވެފައިވަނީ، އެބޭފުޅުން ތިބީ މިނާގެ ފަސް ނަންބަރު ޓެންޓްގައި ކަމަށާއި އެ ޓެންޓް ކައިރީގައި އެހެން ދިވެހިން ވެސް ތިބި ކަމަށެވެ. މުހައްމަދު ނަސީމް ގެއްލިފައިވަނީ ހައްޖުމަހުން 8 ވަނަ ދުވަހުގެ ރޭގެ ވަގުތެއްގައި (ޖޫން 26) ގައި ކަމަށާއި އޭނާ ގެއްލުނުއިރު، އަތުގައި ފޯނެއް ނެތް ކަމަށާއި ނަމަވެސް ހުރީ އިހްރާމްގައި ކަމަށާއި އަދި ޓެގް ވެސް އޭނާ އަތުގައި އޮތް ކަމަށްވެސް މައުލޫމާތު ދީފައި ވެއެވެ. އަދި މިއީ އޭނާ ގެއްލިގެން ހޯދާންޖެހުނު ފުރަތަމަ ފަހަރު ނޫނަކްމަށްވެސް އެ ގުރޫޕުން މައުލޫމާތު ދީފައި ވެއެވެ.
މިގޮތުން މީގެ ކުރިން މައްކާގައި ވެސް ގެއްލިގެން ހޯދަމުން ދަނިކޮށް އޭނާ ފެނިފައިވާ ކަމަށް އެ ގްރޫޕުން ވަނީ ބުނެފައެވެ. އެގްރޫޕުން ވިދާޅުވީ، އެމީހާ ގެއްލުމާއި ގުޅިގެން ހައްޖު މިޝަން އަށް ވެސް އަންގާފައިވާ ކަމަށާއި އަދި އެމީހާގެ ފޮޓޯއާއި މައުލޫމާތު އެސަރަހައްދުގައި ހަރަކާތްތެރިވާ މީޑިއާގެ ބޭފުޅުންނަށް ވެސް ހިއްސާ ކުރި ކަމަށެވެ.
