ޙައްޖަށް ދިޔަ ދިވެއްސެއް ގެއްލިގެން ހޯދަން ފަށައިފިއެވެ.
އަލް-ހަރަމައިން ހައްޖު ގްރޫޕުގެ ބެލުމުގެ ދަށުން ހައްޖަށް ގޮސް އުޅެނިކޮށް ގެއްލިގެން ހޯދަމުން އަންނަނީ ރ. މާކުރަތު، މުހައްމަދު ނަސީމް ނަމަކަށް ކިޔާ މީހެކެވެ.
އަލް-ހަރަމައިން ގްރޫޕުގެ އިސް ފަރާތަކުން ބައެއް މީޑިއާތަކަށް މައުލޫމާތު ދެމުން ވިދާޅުވީ، އެބޭފުޅުން ތިބީ މިނާގެ ފަސް ނަންބަރު ޓެންޓްގައި ކަމަށާއި އެ ޓެންޓް ކައިރީގައި އެހެން ދިވެހިން ވެސް ތިބި ކަމަށެވެ. މުހައްމަދު ނަސީމް ގެއްލިފައިވަނީ 8 ވަނަ ދުވަހުގެ ރޭގެ ވަގުތެއްގައި (ޖޫން 26) ގައި ކަމަށާއި އޭނާ ގެއްލުނުއިރު، އަތުގައި ފޯނެއް ނެތް ކަމަށާއި ނަމަވެސް ހުރީ އިހްރާމްގައި ކަމަށާއި އަދި ޓެގް ވެސް އޭނާ އަތުގައި އޮތް ކަމަށެވެ.
މުހައްމަދު ނަސީމް ގެއްލިގެން ހޯދަމުން އަންނަތާ މިއަދަށް ހަތަރު ދުވަސް ވެފައިވާއިރު، އެ ގްރޫޕުން މައުލޫމާތު ދިން ގޮތުގައި މިއީ އޭނާ ގެއްލިގެން ހޯދާ ފުރަތަމަ ފަހަރެއް ނޫނެވެ.
މީގެ ކުރިން މައްކާގައި ވެސް ގެއްލިގެން ހޯދަމުން ދަނިކޮށް ފެނިފައިވާ ކަމަށް އެ ގްރޫޕުން ވަނީ ބުނެފައެވެ. އެގްރޫޕުން ވިދާޅުވީ، އެމީހާ ގެއްލުމާއި ގުޅިގެން ހައްޖު މިޝަން އަށް ވެސް އަންގާފައިވާނެ ކަމަށާއި އަދި އެމީހާގެ ފޮޓޯއާއި މައުލޫމާތު އެސަރަހައްދުގައި ހަރަކާތްތެރިވާ މީޑިއާގެ ބޭފުޅުންނަށް ވެސް ހިއްސާ ކޮށްފައިވާނެ ކަމަށެވެ.
