މިއަދުގެ ސިޔާސީ ހަގީގަތަކީ ގިނިކަންޏާ ނިކުމެ ރިޔާސީ އިންތިޚާބު ކާމިޔާބު ކުރެވޭ ވަރުގެ ޕާޓީއެއް ރާއްޖޭގައި ނެތުންކަމުގައި، ޕީއެންސީލިގެ ރައީސް އަދި ޕީޕީއެމް ހިންގެވުމާ ހަވާލުވެ ހުންނެވި އަބުދުއްރަހީމް ވިދާޅުވެއްޖެއެވެ.
ރޭ ޕީޕީއެމް އޮފީހުގައި ބޭއްވުނު ޖަގަހަ ޖަލްސާގައި ވާހަކަ ދައްކަވަމުން އަބުދުއްރަހީމް ވިދާޅުވީ، އެއްވެސް އެއް ޕާޓީއަކަށް ކުރިޔަށް އޮތް ރިޔާސީ އިންތިޚާބު ކާމިޔާބު ކުރެވޭ ވަރުގެ ޕާޓީއެއް ރާއްޖޭގައި ނެތްކަމަށާއި، ކުރިޔަށް އޮތް ރިޔާސީ އިންތިޚާބަށްފަހު ދެން އުފެދިގެންދާ ވެރިކަމެއްގައި ޕީޕީއެމްގެ ދައުރު އޮންނާނޭ ކަމުގައެވެ.
ގަބޫލުފުޅު ކުރައްވާ، މިއަދުގެ ސިޔަސީ ހަގީގަތަކީ އެއްޕާޓީއަކުން އެކަނި ނިކުމެ ވެރިކަން ހޯދޭވަރުގެ ޕާޓީއެއް އަދި ރާއްޖޭގައި ނެތް.
އިދިކޮޅު ޕީޕީއެމްއަށްވެސް ގިނިކަންޏާ ނިކުމެ ކުރިޔަށް އޮތް ރިޔާސީ އިންތިޚާބުގައި ވާދަކޮށްގެން ރިޔާސީ އިންތިޚާބު ކާމިޔާބު ކުރެވޭވަރުގެ ތާއީދެއް މުޅި ރާއްޖޭގައި އިދިކޮޅު ޕީޕީއެމްއަށްވެސް ނެތްކަމަށް މޭރުން ކުރައްވަމުން އަބުދުއްރަހީމް ވިދާޅުވިއެވެ.
ރޭގެ ޖަލްސާގައި ވާހަކަ ދައްކަވަމުން އަބުދުއްރަހީމްވަނީ، ވަކި ފަރުދަކު ގައުމަށްވުރެ ބޮޑު ވެގެން ނުވާނެ ކަމުގައިވެސް ވިދާޅުވެފައެވެ.
އިދިކޮޅު ޕީޕީއެމްގެ ރިޔާސީ ކެނޑިޑޭޓަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވިއްޖެނަމަ އެޕާޓީގެ ކެނޑިޑޭއްގެ ގޮތުގައި އެހެން ބޭފުޅަކު ނުކުމެދާނޭތޯ ސުވާލު އުފައްދާ، އަދި އޭގެ ބަދަލުގައި އިދިކޮޅު ޕީޕީއެމްގެ އިސް ބައެއް ފަރާތްތަކުން ޖުމުހޫރީ ޕާޓީގެ ކެނޑިޑޭޓް ގާސިމް އިބުރާހީމަށްވެސް ތާއީދު ކޮށްފާނެކަމަށް ގިނަބަޔަކު ބުނަމުން ދަނިކޮށް، ޕީޕީއެމްގެ އޮފީހުގައި ރޭއް ބޭއްވި ޖަގަހަ ޖަލްސާގައި ވާހަކަ ދައްކަވަމުން އަބުދުއްރަހީމް ވިދާޅުވެފައިވަނީ ކުރިޔަށް އޮތް ރިޔާސީ އިންތިޚާބަށް މަޝްވަރާ ކުރަންޖެހުނު ކޮންމެ ޕާޓީއަކާވެސް އެޕާޓީން މަޝްވަރާ ކުރާނެ ކަމުގައެވެ.
މާދަމާ ތިބޭފުޅުންނަށް ފެނިވަޑައިގެންފާނެ އަޅުގަނޑުމެން ތިބޭފުޅުން ވަރަށް ހިތްހަމަނުޖެހޭ މީހުންނާއެކީގަ މަޝްވަރާ ކުރާ ތަންވެސް. އެކަމަކު ޤަބޫލުކުރަންވީ ހަޤީޤަތަކީ އަޅުގަނޑުމެން ކޮންމެ މީހަކަަށް ވުރެ ޤައުމު ބޮޑުކަން.
އިދިކޮޅު ޕީޕީއެމްގަވެސް ވަކި ފަރުދަކަށް ގައުމަށްވުރެ ބޮޑު ނުވެވޭކަމަށް މޭރުން ކުރައްވަމުން އަދުއްރަހީމް ވިދާޅުވިއެވެ.
ރޭގެ ޖަލްސާގައި ވާހަކަ ދައްކަވަމުން އިދިކޮޅު ޕީޕީއެމްއިން ރިޔާސީ އިންތިޚާބަށް ކެނޑިޑޭޓަކު ނުނެރެ، އެޕާޓީން އެހެން ޕާޓީތަކާއި ކޯލިޝަން ހަދާފާނެކަމަށް މޭރުންކުރެވޭ ބީދައިންވެސް އަބުދުއްރަހީމް ވަނީ ވާހަކަ ދައްކަވާފައެވެ. އެގޮތުން އަބުދުއްރަހީމު ވިދާޅުވެފައިވަނީ ގުޅެންޖެހުނު ކޮންމެ ބަޔަކާވެސް ގުޅިގެން ރިޔާސީ އިންތިޚާބު ކާމިޔާބު ކުރާނެކަމަށާއި، އެގޮތުން އުފެދޭ ސަރުކާރެއްގައި ޕީޕީއެމްގެ ދައުރު އޮންނާނޭ ކަމުގައެވެ.
އަޅުގަނޑުމެން ގުޅެން ޖެހުނު ބަޔަކާއެކު ނިކުމެ ކުރިއަށް އޮތް ރިޔާސީ އިންތިހާބު ކާމިޔާބު ކުރާނަން. އަންނަ ނޮވެމްބަރު މަހު އުފެދޭނީ އަޅުގަނޑުމެން ހިއްސާވާ ސަރުކާރެއް.
ދެން އުފެދޭ ސަރުކާރަކީ ޕީޕީއެމް އިސްވެ އޮވެ އުފައްދާ ސަރުކާރަކަށް ވުމުގެ ބަދަލުގައި، އެއީ ޕީޕީއެމްއިން ބައިވެރިވެގެން އުފައްދާ ސަރުކާރަކަށް ވެދާނޭކަމަށް އިޝާރާތް ކުރައްވަމުން އަބުދުއްރަހީމް ވިދާޅުވެފައި ވެއެވެ.
ކުރިޔަށް އޮތް ރިޔާސީ އިންތިޚާބުގައި، ރައީސް ޔާމިނަށްވެސް، ވަކި ފަރުދެއްގެ ހައިސިއްޔަތުން ގައުމަށްވުރެ ބޮޑު ނުވެވޭނެކަމަށް މާނަކުރެވޭ ގޮތަށް ވިދާޅުވެ، އަދި ޕީޕީއަށްވެސް ގިނިކަންޏާ ވާދަކޮށްގެން ރިޔާސީ އިންތިޚާބު ކާމިޔާބު ނުކުރެވޭނެކަމަށް އަބުދުއްރަހީމް ވިދާޅުވެފައިވާއިރު، އިދިކޮޅު ޕީޕީއެމްގެ ރިޔާސީ ޓިކެޓްގައި އަމިއްލަފުޅަށް ނުނިކުމެވޭނަމަ އެޕާޓީން ކެނޑިޑޭޓަކު ނުނެރުމަށް ރައީސް ޔާމިން މަސައްކަތް ކުރައްވަމުން ގެންދަވާކަމަށް ގިނަބަޔަކު ދަނީ ތުހުމަތު ކުރަމުންނެވެ.
އަދި އެއާއެކު ރައީސް ޔާމިނަށް ކުރިމަތި ނުލެވޭ ހާލަތުގައި ޕާޓީގެ އެހެން ބޭފުޅަކަށް ޓިކެޓު ދިނުމަށް ގޮވާލާ ފަރާތްތަކާއި ދެކޮޅަށް އެޕާޓީން ފިޔަޅު އަޅަމުންދާކަންވެސް ފާހަގަ ކޮށްލެވެއެވެ.
އެހެންނަމަވެސް ބައެއް ފަރާތްތަކުން ތުހުމަތު ކުރާގޮތުގައި، ރައީސް ޔާމިން އިދިކޮޅު ޕީޕީއެމް ޓިކެޓް އެޕާޓީގެ އެހެން އެއްވެސް ފަރާތަކަށް ދިނުމަށް އެންމެ ފަހުވަގުތު ހުރަސް އަޅައިފިނަމަ، ޕާޓީގެ ލީޑަރޝިޕްގައި ހިމެނޭ ގިނަބަޔަކު ތިބީ ގާސިމް އިބުރާހީމާ ބައިއަތު ހިފަން ތައްޔާރު ވެގެންނެވެ.
ކުރިޔަށް އޮތް ރިޔާސީ އިންތިޚާބަށް އިދިކޮޅު ޕީޕީއެމްގެ ޓިކެޓް ހޯއްދެވުމަށް އެއްވެސް ބޭފުޅަކު ފާޅުގައި ޝައުގުވެރިކަން ފާޅުކޮށްފައި ނުވިނަމަވެސް، ބެލެވޭގޮތުގައި ކުރީގެ ރައީސް ޑރ. ވަހީދުގެ އާއި ނައިފަރު ދާއިރާގެ މެމްބަރު އަހުމަދު ޝިޔާމްގެ އިތުރުން މާލޭ ސިޓީގެ މޭޔަރު ޑރ. މުއިއްޒު ގެންދަވަނީ ރައީސް ޔާމިނަށް ވާދަ ނުކުރެވިއްޖެ ހާލަތެއްގައި ޓިކެޓް ކަށަަވަރު ކުރެއްވުމަށް މަސައްކަތް ކުރަމުންނެވެވެ.
އެހެންނަމަވެސް، މި ބޭފުޅުންގެ ތެރެއިންވެސް ޕާޓީގެ އެތެރޭގައި އެންމެ ބޮޑު ތާއީދެއް އޮތްކަމަށް ގިނަބަޔަކު ބުނަމުންދަނީ މާލޭ ސީޓީގެ މޭޔަރު ޑރ. މުއިއްޒުއަށެވެ.
