ރިޝްވަތު ހިފުމާއި މަނީ ލޯންޑަރިންގެ ކުށުގައި ކުރީގެ ރައީސް ޔާމީން 11 އަހަރަށް ޖަލަށް ލުމަށް ކޮށްފައި ހުކުމުގެ އިސްތިއުނާފު ކުރިއަށްދާތީ އެކަމުގެ ތެރެއަށް ވަދެވަޑައިގަތުމަކީ ހަމަޖެހޭ ކަމެއް ނޫންކަމަށް ވިދާޅުވެ، ރައީސް އިބްރާހިމް މުހައްމަދު ސޯލިހު އިދިކޮޅު ކޯލިޝަންގެ އިސްވެރިންނާ ބައްދަލުކުރައްވަން ދެކޮޅު ހައްދަވައިފިއެވެ.
ރައީސް އިބްރާހީމާ ބައްދަލުކުރެއްވޭތޯ ކޮންމެ ދުވަހަކު އިދިކޮޅު ފަރާތްތަކުން ރައީސް އޮފީހަށް އަންނަނީ ދަމުންނެވެ. އެގޮތުން މިއަދަކީ އެމަނިކުފާނާ ބައްދަލުކުރެއްވުމަށް އިދިކޮޅު އިއްތިހާދުގެ ލީޑަރުން ރައީސް އޮފީހަށް ވަޑައިގެންނެވި ފަސްވަނަ ދުވަހެވެ. މިހާތަނަށް އެއްވެސް ދުވަހެއްގައި ރައީސް އެ ބޭފުޅުންނާ ބައްދަލުކުރައްވާފައި ނުވެއެވެ.
ރަސްމީ ޕްރޮޓޮކޯލުން ފޮނުއްވާ ސިޓީތައް ރައީސް އިބްރާހީމަށް ލިބިވަޑައިނުގަންނަވާތީ އިދިކޮޅު ކޯލިޝަން ހިންގެވުމާ ވަގުތީ ގޮތުން ހަވާލުވެވަޑައިގެން ހުންނެވި ޕީއެންސީގެ ރައީސް ޢަބްދުއްރަޙީމް ވަނީ އިއްޔެ އަތްޕުޅުން ސިޓީއެއް ލިޔުއްވައި ރައީސް އޮފީހާ ހަވާލުކުރައްވާފައެވެ. އެ ސިޓީގައި ވިދާޅުވެފައިވަނީ ރައީސް ޔާމީނަށް އަނިޔާކުރަމުން އަންނަނީ ސީދާ ރައީސް އިބްރާހީމުގެ އެންގެވުމަށް ކަމުގައާއި، އެކަން ހުއްޓައިލުމަށް ގޮވައިލާ ކަމަށެވެ.
ރައީސް އޮފީހުގެ ޗީފް އޮފް އަލީ ޒާހިރު ސޮއިކުރައްވައި މިއަދު ފޮނުއްވި ނޯޓްގައި ވިދާޅުވީ ޔާމީން މިހާރު ތަންފީޒުކުކުރައްވަމުން ގެންދަވަނީ ޝަރުއީ ކޯޓަކުން އެ މަނިކުފާނުގެ މައްޗަށް އިއްވާފައިވާ ހުކުމެއް ކަމަށާއި އެ ހުކުމާއި ރައީސްއާ އެއްވެސް ގުޅުމެއް ނެތް ކަމަށެވެ. އަދި އިސްތިއުނާފު މަރުހަލާ ކުރިއަށްދާއިރު އެކަމާ ގުޅޭގޮތުން ބައްދަލުކުރެއްވުމަކީ ހަމަޖެހޭ ކަމެއް ނޫންކަމަށް އެ ސިޓީގައިވެއެވެ.
ރައީސް ޔާމީން އަބްދުލްގައްޔޫމް ޝަރުއީ ހުކުމެއް ތަންފީޒުކުރައްވަމުން ގެންދަވާއިރު އަދި ހުކުމެއްގެ އިސްތިއުނާފުގެ މަރުހަލާ މިހާރު ހިނގަމުންދާއިރު އެފަދަ ކަމެއްގެ ތެރެއަށް ރައީސުލްޖުމްހޫރިއްޔާ ވަދެވަޑައިގެން އެކަމާ ގުޅޭގޮތުން އެއްވެސް ބަޔަކާ ބައްދަލުކުރެއްވުމަކީ ހަމަޖެހޭގޮތެއް ނޫންކަން އަބްދުއްރަހީމް ވެސް ގަބޫލުކުރައްވާނެކަމަށް ރައީސުލްޖުމްހޫރިއްޔާ ޔަގީންކުރައްވައެވެ.
– ސިޓީގައި ވެއެވެ.
ރައީސްގެ ފަރާތްޕުޅުން އެއްވެސް މީހަކަށް އަނިޔާއެއް ލިބޭކަމަށް ގަބޫލުކުރައްވާ ނަމަ އެ މައްސަލައެއް ކަމާބެހޭ މުއައްސަސާއަކަށް ހުށަހަޅައިގެން ޝަރުއީ މަރުހަލާގެ ތެރެއިން ކުރިއަށްވަޑައިގަތުމަށް ދަންނަވަން ރައީސް ވިދާޅުވި ކަމަށް، އަލީ ޒާހިރުގެ ނޯޓްގައިވެއެވެ.
