ކުރީގެ ރައީސް ނަޝީދު އިސްވެ ހުންނަވާ އުފެއްދުމަށް މަސައްކަތް ކުރަމުންދާ ދަ ޑިމޮކްރެޓްސް ޕާޓީ ރަޖިސްޓްރީ ކުރުމަށް މިވަގުތަށް ހުއްދަ ދޫ ނުކުރުމަށް ނިންމުމާއި ގުޅިގެން، ދަ ޑިމޮކްރެޓްސް ހަރުގޭގައި ކުރިޔަށްދާ މުޒާހިރާގެ އިސް ސަފުގައި ޕީޕީއެމް ބައިވެރި ވެއްޖެއެވެ.

މިގޮތުން، ބެލެވޭ ގޮތުގައި ޑިމޮކްރެޓްސް ހަރުގެ ކުރިމަތީގައި މުޒާހިރާގައި ބައިވެރިވި ބޭފުޅުންގެ ތެރޭގައި އިދިކޮޅު ޕީޕީއެމް ކޯލިޝަން ހިންގެވުމާ ހަވާލުވެ ހުންނެވި އަބުދުއްރަހީމްގެ އިތުރުން އިދިކޮޅު ޕީޕީއެމް ބައެއް މަޖިލިސް މެމްބަރުންވެސް ހިމެނެއެވެ.

އަދި މުޒާހިރާ ކުރާ ސަރަހައްދުން ބައެއް ފަރާތްތަކުން ދަނީ އެ ސަރަހައްދަށް އިދިކޮޅު ޕީޕީއެމްގެ އެކްޓިވިސްޓުން އެއްވުމަށްވެސް ގޮވާލާފައެވެ. އަދި އެސަރަހައްދުން ދަ ޑިމޮކްރެޓްސްއަށް ތާއީދު ކުރާ ފަރާތްތަކަށްވުރެ ގިނައިން އިދިކޮޅު ޕީޕީއެމްގެ އެކްޓިވިސްޓުން ފެންނަމުންދާކަމަށްވެސް ބައެއް މީޑީއާތަކުން ވަނީ ރިޕޯޓު ކޮށްފައެވެ.

ދަ ޑިމޮކްރެޓްސް އުފެއްދުމުގެ ހުއްދަ ދިނުމަށް އިލެކްޝަންސް ކޮމިޝަންގައި މިރޭ ނެގި ވޯޓުގައި، ކޮމިޝަންގެ ދެ މެމްބަރަކު ވޯޓު ދީފައިވަނީ އެޕާޓީ އުފެދުމުގެ ހުއްދަ މިވަގުތަށް ދޫ ނުކުރުމަށެވެ. މިގޮތުން ޕާޓީ އުފައްދަން ދެކޮޅު ހެއްދެވީ ކޮމިޝަންގެ މެމްބަރު މުޙައްމަދު އާސިފް (އިރުވައި އާސިފް) އާއި، މެމްބަރު ޢަލީ ނަޝާތު ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވަނީ ވިދާޅުވެފައެވެ.

ފުއާދު ވިދާޅުވީ ޑިމޮކްރެޓްސް އުފައްދަން ހުއްދަ ދިނުމާ ގުޅޭ ގޮތުން ވޯޓެއް ނެގުމުން ވަޑައިގެންނެވި ހަތަރު މެމްބަރުންގެ ތެރެއިން ދެ މެމްބަރަކު ހުއްދަ ދޭން ވޯޓު ދިން ކަމަށެވެ.

ހަތަރު މެމްބަރު މިހާރު ތިބި. ދެ ވޯޓު، ދެ ވޯޓުން އެއްވަރުވީ ހުއްދަ ދިނުމަށާއި ހުއްދަ ނުދޭ ގޮތަށް. އެހެންވީމާ ހުއްދައެއް ނުދެވުނު. ދެ ވޯޓު ލިބުނީމާ އަޅުގަނޑު ނިންމިން ފާސްވެއްޖެ ކަމަށް. އެކަމަކު އަގުލަބިއްޔަތުންނޭ އޮންނާތީ ފާހެއްނުވާނެ ކަމަށް ވަނީ ދެ ވޯޓު، ދެ ވޯޓަކުން.

– ފުއާދު ވިދާޅުވިއެވެ.

ފުއާދު ވިދާޅުވީ ޑިމޮކްރެޓްސް އުފެއްދުމުގެ ހުއްދަ ދިނުމަށް މަސައްކަތް ކުރައްވާތީ އެކަން ކުރައްވަނީ ނުފޫޒެއްގެ ދަށުގައި ހުންނަވައި ކަމަށް އެ ކޮމިޝަނުގެ ބައެއް މެމްބަރުން ތުހުމަތު ކުރައްވާ ކަމަށެވެ.

އިލެކްޝަނުން ހުއްދަ ނުދިނުމާއި، ގުޅިގެން ޑިމޮކްރެޓްސް އިސްބޭފުޅުން ގެންދަވަނީ ސަރުކާރަށް ބަހުގެ ހޫނު ހަމަލާތަކެއް ދެމުންނެވެ. ޑިމޮކްރެޓްސް އިން ތުހުމަތު ކުރާ ގޮތުގައި އިލެކްޝަނުން މިހުއްދަ ދިނުމަށް ދެކޮޅު ހައްދަވާ މެމްބަރުން ދެކޮޅު ހައްދަވަނީ ސަރުކާރުގެ ނުފޫޒަށް ކަމަށެވެ.