އެހެން ޕާޓީތަކުން ޕީޕީއެމް ބައިބައި ކުރުމަށް މަސައްކަތް ކުރަމުންދާ ކަމަށާއި، އެހެންނަމަވެސް ޕީޕީއެމް/ޕީއެންސީ އޮތީ ރައީސް ޔާމިންއާއެކު ކަމަށް، ޕީޕީއެމް ހިންގުމާ ހަވާލުވެ ހުންނެވި އަބުދުއްރަހީމް ވިދާޅުވެއްޖެއެވެ.
އިއްޔެ ބޭއްވުނު، އަންހުންގެ ތަރައްގީއަށް މަސައްކަތްކުރާ 11 ދާއިރާއެއްގެ ބައި އިލެކްޝަންގެ ތެރެއިން 8 ދާއިރާއެއްގެ ބައި އިލެކްޝަނެއް ޕީޕީއެމްއިން ކާމިޔާބު ކުރުމަށްފަހު، ރޭއް ބޭއްވި ޕީޕީއެމްގެ ޖަގަހަ ޖަލްސާގައި ވާހަކަ ދައްކަވަމުން އަދުރޭ ވިދާޅުވީ ޕީޕީއެމްއާ ދެކޮޅު ޕާޓީތަކުން ކުރަމުންދާ މަސައްކަތަކީ ޕީޕީއެމް ބައިބައިކުރުން ކަމުގައެވެ. އަދި ތަފާތު ޕޯޑިއަމްތަކުގައި ޕީޕީއެމްއާއި ދެކޮޅަށް ފިތުނަ ފަސާދަ އުފެއްދުމަށް ޕީޕީއެމްއާއި ދެކޮޅު ޕާޓީތަކުން ތަފާތު ވާހަކަ ދައްކަމުން ދިޔަނަމެވެސް، އެވާހަކަތަކުގެ އަޑު ނޭހުމަށް އަދުރޭވަނީ ގޮވާލައްވާފައެވެ.
އަޅުގަނޑުމެންނަށް ތަފާތު ހުވަފެންތައް ދައްކަން އުޅޭނެ. އަޅުގަނޑުމެން ކުރަންވީ ކަމަކީ އެ ހުވަފެންތައް ބަލަން ނުުނިދާންވީ. އެ ހުވަފެނުގައި އެއްވެސް ކަހަލަ ހަގީގަތެއް ނޯންނާނެ.
އަދުރޭ ވިދާޅުވިއެވެ.
އަދުރޭ އިތުރަށް ވިދާޅުވީ، ޕީޕީއެމް/ޕީއެންސީ އަބަދުވެސް އޮންނާނީ ރައީސް ޔާމިންއާއެކު ކަމަށެވެ. އަދި ބަލިވާނީ އެކަން ބަދަލު ކުރަން އުޅޭބަޔަކު ކަމަށްވެސް އަދުރޭ ވިދާޅުވިއެވެ.
އެ އަށް ވުރެ މާ ވަރުގަދަ އަށް މާ ސާބިތުކަމާ އެކީގައި އަޅުގަނޑުމެން އެންމެން، އަޅުގަނޑުމެން ދެ ޕާޓީގެ އާންމު މެމްބަރުންނާއި ދެ ޕާޓީގެ ލީޑަޝިޕް މި ތިބީ ރައީސް ޔާމީނާ އެކު، އެ މަނިކުފާނަށް މި ރިޔާސީ އިންތިހާބު ކާމިޔާބު ކޮށްދޭން ތައްޔާރަށް.
ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަކުރުމުގެ ފުރުސަތު ނުލިބިއްޖެނަމަ، އެޕާޓީގެ އެހެން ކެނޑިޑޭޓަކު ނުކުތުމަށް ބާރުއަަޅާ ފަހަކަށް އައިސް ބައެއް ފަރާތްތަކުން ދައްކަމުންދާ ވާހަކަ ތަކަށް އިޝާރާތް ކުރައްވަމުން ރޭގެ ޖަގަހަ ޖަލްސާގައި ވާހަކަ ދައްކަވަމުން އަބުދުއްރަހީމް ވިދާޅުވިއެވެ.
އަދުރޭ ވިދާޅުވީ ކުރިޔަށް އޮތް މަދު ދުވަސްކޮޅުގެ ތެރޭގައި ޝަރުއީ މަރުހަލާއިން ރައީސް ޔާމިން މިނިވަންވާނެ ކަމަށާއި، ގާނޫނީ ޓީމުގެ ބުރަ މަސައްކަތާއި އަދި އާންމު ރައްޔިތުންގެ ހެޔޮ ދުއާތަކާއެކު އެކަން ކާމިޔާބު ކުރެވިގެން ދާނެކަމުގައެވެ.
އަޅުގަނޑުމެންގެ ގާނޫނީ ޓީމުން ކުރަމުން އެ ގެންދާ ބުރަ މަސައްކަތާއި ތިޔަ ހުރިހާ ބޭފުޅުންގެ ހިތްވަރުގަދަ ރައްޔިތުންގެ ބުރަ މަސައްކަތާއި އަދި ދިވެހި ރައްޔިތުންގެ ހެޔޮދުއާއާ އެކީގައި އިރާދަކުރެއްވިޔާ ރައީސް އަބްދުﷲ ޔާމީން މި ގައުމުގެ ވެރިކަމަށް ވަޑައިގަންނަވާނެ.
ޕީޕީއެމް ދަތުރުކުރަނީ ޕީޕީއެމް ދަތުރުކުރާ އަމާޒު އެނގިގެން. އަމާޒަށް ދަތުރުކުރަމުން މި ދަނީ. އެހެންވީމާ 11 ބައި އިލެކްޝަންގެ ތެރެއިން 8 ބައި އިލެކްޝަން ރައީސް ޔާމީން ކާމިޔާބު ކުރެއްވީ. އަޅުގަނޑުމެންނަކަށް ނޯޅޭ އަޅުގަނޑުމެންގެ މިސްރާބެއް. އަޅުގަނޑުމެންނަށް އެބަ އެނގޭ އަޅުގަނޑުމެން ދަތުރުކުރާ އަމާޒު. އަޅުގަނޑުމެން ދަތުރު މި ކުރަނީ ޔަގީންކަމާ އެކު.
