އިސްރާއީލުން 15 އަހަރުވަންދެން ހިސޯރު ކޮށްފައިވާ ގާޒާއިން ފަލަސްތީނު ރައްޔިތުން މިއަހަރުގެ ބަރަކާތްތެރި ހައްޖުގެ އަޅުކަން ފުރިހަމަ ކުރުމަށް ސައުދީ އަރަބިއާއަށް ފުރައިފިއެވެ.

އިސްރާއިލުން ހިސޯރު ކޮށްފައިވާ ގާޒާއިންނާއި އަދި ހިފާފައިވާ ހުޅަނގު އައްސޭރިން މިފަހަރު ފަލަސްތީނުގެ ޖުމްލަ 6،600 ރައްޔިތުން މައްކާއަށް ދިއުމަށް ވަނީ ހަމަޖެހިފައެވެ.

ފަލަސްތީނުގެ އިސްލާމިކް މިނިސްޓްރީން ބުނެފައިވަނީ ހައްޖާޖީން ސައުދީ އަރަބިއާއަށް ދަތުރު ކުރާނީ ހަތަރުދުވަހަކަށް ބަހާލައިގެން ކަމުގައެވެ. މިގޮތުން ފުރަތަމަ ދުވަހު 900 ހައްޖާޖީންގެ ގުރޫޕަކާއި، ދެވަނަ ދުވަހު 600 ހައްޖާޖީންގެ ގުރޫޕަކާއި، ތިންވަނަ ދުވަހުވެސް 600 މީހުންގެ ގުރޫޕެއް އަދި 4 ވަނަ ދުވަހު 500 ހައްޖާޖީންގެ ގުރޫޕެއް ސައުދީ އަރަބިއާއަށް ދަތުރު ކުރާނެކަމަށް ފަލަސްތީނުގެ އިސްލާމިކް މިނިސްޓްރީ ބުނެފައި ވެއެވެ.

ހުލަނގު އައްސޭރީގެ ހައްޖާޖީން ދަތުރު ކުރާނީ ހުޅަނގު އައްސޭރިން، އުރުދުންއިން ސައުދީ އަރަބިއާއަށެވެ. ގާޒާއިން ދަތުރުކުރާ ހައްޖާޖީން ދަތުރު ކުރުމަށް ހަމަޖެހިފައިވަނީ މިސްރުން ސައުދީ އަރަބިއާއަށެވެ. ގާޒާއިން ދަތުރުކުރާ ހައްޖާޖީންގެ ދަތުރު ފެށުމަށް ހަމަޖެހިފައިވަނީ، ގާޒާއިން ބޭރަށް ދަތުރު ކުރެފެން އޮންނަ ރަފާ ކުރޮސިންއިން ހުރަސްކުރުމަށްފަހު މިސްރުގެ ކައިރޯގެ އެއަރޕޯޓަށެވެ. ކައިރޯއިން އެ ހައްޖާޖީން ދަތުރު ކުރާނީ ޖިއްދާގެ ކިންގ އަބުދުލްއަޒީޒު ބިން ސައުދު އެއަރޕޯޓުން ދެން މައްކާއަށެވެ.

ކޮންމެ އަހަރަކުވެސް އެތައް މިލިއަން މުސްލިމުންނެއް ހައްޖުގެ އަޅުކަން އަދާކުރުމަށް މައްކާއަށް ދަތުރު ކުރި ނަމަވެސް، ފަލަސްތީނުގެ ރައްޔިތުންނަށް އަދި ޚާއްސަކޮށް ގާޒާގެ ރައްޔިތުންނަށް ހައްޖަށް ދިއުމުގައި ކޮންމެ އަހަރަކުވެސް އިސްރާއީލުން ކުރިމަތި ކުރުވާ ދަތިތަކުގެތ ސަބަބުން އެތައް ގޮންޖެހުމަކާ ކުރިމަތިލާން ޖެހެއެވެ.