ޖަލުގައި 11 އަަހަރުގެ ހުކުމެއް ތަންފީޒު ކުރައްވަމުން ގެންދަވާ، ކުރީގެ ރައީސް ޔާމިން ފޮނުއްވާ ނޯޓުތަކުގެ މަންފާ ނަންގަވާ، މަހިބަދޫ ދާއިރާގެ މެމްބަރު އަހުމަދު ތާރިގް (ޓޮމް) ސިޔާސީ ޑީލް ހައްދަވަމުން ގެންދަވާ ކަމުގެތުހުމަތު، ފަރެސްމާތޮޑާ ދާއިރާގެ މެމްބަރުން ހުސެއިން މުހައްމަދު ލަތީފް (ސެމްބެ) ކޮށްފިއެވެ.
ކުރިޔަށް އޮތް ރިޔާސީ އިންތިޚާބަށް އެންމެ 3 މަހަށްވުރެ މަދު ދުވަސްކޮޅަކަށް ވެފައިވާއިރު، އިދިކޮޅު ޕީޕީއެމްގެ ރިޔާސީ ކެނޑިޑޭޓަކު ކުރިޔަށް އޮތް ރިޔާސީ އިންތިޚާބުގައި ވާދަ ނުކޮށްފާނޭކަމުގެ ކަންބޮޑުވުން އެޕާޓީގެ ލީޑަރޝިޕާއި، ސެނެޓްގެ މެމްބަރުންނާއި އަދި އޭގެ އިތުރުން އާންމު މެމްބަރުންގެ މެދުގައިވެސް އިންތިހާއަށް ބޮޑުވެފައި ވަނިކޮށް، ޔާމިން "ވިދާޅުވިކަމަށް ބުނެ" ޓޮމް ސިއްރު ބައްދަލުވުންތައް ސިޔާސީ ފަރާތްތަކާއިއެކު ބާއްވަމުންދާކަމުގެ ތުހުމަތު ހުސެއިން މުހައްމަދު ލަތީފު ކޮށްފައިވަނީ ޕީޕީއެމްގެ ލީޑަރޝިޕް ވަޓްސްއަޕް ގުރޫޕުގައެވެ.
ޕީޕީއެމްގެ ލީޑަރޝިޕް ވަޓްސްއަޕް ގުރޫޕުގައި މެމްބަރުން ހުސެއިން މުހައްމަދު ލަތީފް ފާޅުކޮށްފައިވާ ކަންބޮޑުވުންތަކުގެ މައުލޫމާތު އެނގިހުރި ފަރާތަކުން "ޚަބަރު އޮންލައިން" އަށް ކިޔައިދީފައިވާ ގޮތުގައި، ހުސެއިން މުހައްމަދު ލަތީފު ވިދާޅުވަނީ، ޖަލުގައި ހުންނެވި ރައީސް ޔާމިންގެ ފަރާތުން ނޯޓު އަންނަ ކަމަށް ބުނެ، އަދި ރައީސް ޔާމިން "ވިދާޅުވި ކަމަށް" ބުނެ ޓޮމް ގެންދަވަނީ ސިޔާސީ އިސްފަރާތްތަކާއި ބައްދަލުކޮށް "ސިއްރު ޑީލްތައް ކަޓް" ކުރަމުން ކަމުގައެވެ.
އޭގެ އިތުރުންވެސް، މެމްބަރުން ހުސެއިން މުހައްމަދު ލަތީފްގެ ކަންބޮޑުވުމެއްގެ ގޮތުގައި، "ޚަބަރު އޮންލައިން" އާއި ވާހަކަ ދެއްކި ފަރާތުން ފާހަގަ ކޮށްފައިވަނީ، ލީޑަރޝިޕަށް އަންނަ ނޯޓުތަކަށް މެނުވީ އިތުރު ނޯޓު ތަކަކަށް އިތުބާރު ކުރެވޭނެ އެއްވެސް ހަމައެއް ނުވަތަ އުސޫލެއް ޕާޓީގެ އެތެރޭގައި ވެސް ނެތުމެވެ.
ކުރިން ނޯޓުތައް އަންނަނީ ޕާޓީ ހިންގެވުމާ ހަވާލުވެ ހުންނެވި އަބުދުއްރަހީމަށް. އެހެންނަމަވެސް ޓޮމް މި ހައްދަވާ ގޮތަކީ، ޔާމިން ވިދާޅި ކަމަށް ބުނެ، އަމިއްލަ އަމިއްލައަށް ސިޔާސީ ފަރާތްތަކާއި ސިއްރުން ބައްދަލު މި ކުރައްވަނީ. ރައީސް ޔާމިން ވިދާޅުވި ކަމަށް ބުނެ، ސިޔާސީ ބައްދަލުވުންތައް ކީއްވެތޯ ޕާޓީގެ އޮފީހުގައި ނުބޭއްވެން ވީ؟
ޕީޕީއެމްގެ ލީޑަރޝިޕް ވަޓްސްއަޕް ގުރޫޕުގައި ހުސެއިން މުހައްމަދު ލަތީފު، ޓޮމްގެ އަމަލްތަކާއި ގުޅޭގޮތުން ފާޅު ކުރެއްވި ކަންބޮޑުވުންތަކަށް އިޝާރާތް ކުރައްވަމުން، ނަން ހާމަ ނުކުރުމަށް ޝަރުތުކޮށް، "ޚަބަރު އޮންލައިން" އަށް މައުލޫމާތުންދިން ފަރާތުން ވިދާޅުވެފައި ވެއެވެ.
ހުސެއިން މުހައްމަދު ލަތީފު ތުހުމަތު ކުރައްވަމުން ގެންދަވަނީ، އިދިކޮޅު ކޯލިޝަންގައިވެސް ހިމެނޭ ފަރާތްތަކާއިވެސް ރައީސް ޔާމިންގެ ނަމުގައި ޓޮމް ސިއްރިޔާތުގައި ބައްދަލުކޮށް "ސިއްރު" ބައްދަލުވުންތައް ބާއްވަމުން ގެންދަވާ ކަމަށެވެ. އޭނާ ވިދާޅުވެފައިވަނީ ރައީސް ޔާމިންގެ ފަރާތުން އެހެން ސިޔާސީ ލީޑަރުންނާއި، ނުވަތަ އެހެން ސިޔާސީ ފަރާތްތަކާ ބައްދަލު ކުރާނަމަ، ޕީޕީއެމްގެ ލީޑަރޝިޕަށްވެސް އެގިގެން ޕީޕިއެމްގެ އޮފީހުގައި އެ ބައްދަލުވުންތައް ނުބޭއްވެންވީ ސަބަބެއް ނެތްކަމުގައެވެ.
މި ކުރަނީ މުޅިން އެހެން ކަމެއް. ޕީޕީއެމް ވެރިކަމުގައި އޮތަސް، ގާސިމް ވެރިކަމަށް އަޔަސް، ދެން އަންނަ ދައުރެއްގައި ޔޫތު މިނިސްޓަރުކަން ކަށަވަރު ކުރެވޭތޯ މިއުޅެނީ. ރައީސް ޔާމިންގެ ލޭބަލް ޖަހައިގެން، އެހެން ސިޔާސީ ފަރާތްތަކާއި ޑިލް ހެދޭތޯ މަސައްކަތް ކުރަމުން މިދަނީ. އެއީ ސެމްބެގެ ހުރިހާވެސް ޝަކުވާއަކީ.
މެމްބަރުން ހުސެއިން މުހައްމަދު ލަތީފް ފާޅުކުރެއްވި ކަންބޮޑުވުންތަކަށް މޭރުން ކުރައްވަމުން، "ޚަބަރު އޮންލައިން" އާއި ވާހަކަ ދެއްކި ފަރާތުން ވިދާޅުވެފައި ވެއެވެ.
ރައީސް ޔާމިންގެ ފަރާތުން ޖަލުން ނޯޓު އަންނަމުންދާކަމަށް ބުނެ، ޓޮމް އަމިއްލަ ސިޔާސީ މަންފާތަކެއް ހާސިލް ކުރެއްވުމަށް މަސައްކަތް ކުރަމުންދާ ކަމަށް ތުހުމަތުކޮށް، އަދި ޓޮމްއަށް އިތުބާރު ނުކުރެވޭކަމަށްވެސް ހުސެއިން މުހައްމަދު ލަތީފް "ލީޑަރޝިޕް ވަޓްސްއަޕް" ގުރޫޕުގައި ވިދާޅުވިކަމަށް "ޚަބަރު އޮންލައިން"އަށް މައުލޫމާތު ދިން ފަރާތުން ވިދާޅުވިއެވެ.
ސެމްބެ ވިދާޅުވަނީ، ރައީސް ޔާމިން ދުކޮށް އޭރު ދިޔަ 12 މެމްބަރުންނާއެކު ޓޮމްވެސް ފުރަތަރަމަ ރައީސް ޔާމިން ދޫކޮށް ދިޔަކަމަށް. އެހެންނަމަވެސް، އެކޮޅުންވެސް ހުރިހާ މަންފާއެއް ނަގާ، ފަހުން މެމްބަރުންގެ ގޮނޑި ގެއްލެން ފެށީމަ ޓޮމް ވިސްނުން ބަދަލުކޮށް، ހަނު ހުރިކަމަށް ސެމްބެ ވިދާޅުވަނީ. ޓޮމްއަކީ އޭރުވެސް ދެކޮޅުން ފައިދާ ނަގައިގެން ހުރި މީހެއްކަމަށް.
ހުސެން މުހައްމަދު ލަތީފު ޕީޕީއެމް ލީޑަރ ޝިޕް ވަޓްސްއަޕް ގުރޫޕުގައި ފާޅުކުރި ކަންބޮޑުވުންތަކާއި ގުޅޭގޮތުން "ޚަބަރު އޮންލައިން' އާއި ހިއްސާކުރި މަސްދަރުން ވިދާޅުވެފައި ވެއެވެ.
ރައީސް ޔާމިން "ވިދާޅުވި ކަމަށް" ބުނެ ޓޮމް ސިޔާސީ ފަރާތްތަކާއި ސިއްރުން ބައްދު ކުރާކަމަށް މެމްބަރުން ހުސެއިން މުހައްމަދު ލަތީފް ކުރި ތުހުމަތު ތަކުގެ އިތުރުން، ޕީޕީއެމްގެ ސެނެޓްގެ ބައެއް ފަރާތްތަކުންވެސް އެހެން ބައެއް ކަންބޮޑުވުންތައްވެސް ފާޅު ކުރަމުން ދެއެވެ.
އޭގެ އެއް ކަންބޮޑުވުމަކީ، ކުރީގެ މެމްބަރެއް ކަމުގައިވާ، އިސްމާއިލް އަބުދުލް ހަމީދުގެ މައްސަލަ އޭރު ސުޕްރިމް ކޯޓުން ނިންމާފައިވާ ގޮތަށް ރިއާޔަތްކޮށް، ރައީސް ޔާމިންއަށް ވާދަ ކުރެއްވެން ޖެހޭނަކަމަށް ވިދާޅުވެ ޓޮމް ސޯޝަލް މީޑިއާގައި ދައްކަމުންދާ ވާހަކަތަކެވެ.
މިގޮތުން، މެމްބަރުން ހުސެއިން މުހައްމަދު ލަތީފްވެސް ލީޑަރޝިޕް ވަޓްސްއަޕް ގުރޫޕުގައި ވިދާޅުވި ކަމަށް ވަނީ ސުޕްރީމް ކޯޓުން ޔާމީންގެ ހުކުމް ބާތިލްނުކުރާހާ ހިނދަކު ރިޔާސީ އިންތިހާބަށް ކުރިމަތިލެއްވޭނެ ކަމަށް ބުނެ، "ހަދަމުންދާ ހުރިހާ ގޯހެއްވެސް ހަދަމުން ދަނީ" ޓޮމް ކަމުގައެވެ.
އޭގެ އެއް ސަބަބެއްގެ ގޮތުގައި ފާހަގަ ކޮށްފައިވަނީ، އިދިކޮޅު ޕީޕިއެމްގައިވެސް އެތަކެއް ލޯޔަރުންނެއް ތިބެފައި، އަދި ޚުދު އެމްއެމްޕީއާރުސީގެ މައްސަލާގައިވެސް ރައީސް ޔާމިން ތަމްސީލުކުރާ ލޯޔަރުންވެސް ތިބިއިރު، ގާނޫނީ ގޮތުން އެބޭފުޅުން ނުދައްކަވާ ވާހަކަތަކެއް ޓޮމް ދައްކަވަމުން ގެންދެވުމުން މުޅި މައްސަލަ އޮޅުން ބޮޅުންވެ، ފޯކަސް އެކީ ގެއްލިގެން ދިއުމެވެ.
ޓޮމްއަކީ ގާނޫނީ މީހެއް ނޫން. ރައީސް ޔާމިންގެ ގާނޫނީ ވަކީލުން އެބަ ތިއްބެވި. އެބޭފުޅުން ނުދައްކަވާ ވާހަކަތައް، މުޅި މައްސަލަ އަތަށް ނަންގަވައިގެން، ދޮލަނގަކަށް ލައިގެން ޓޮމް މި ހިންގަވަނީ. ކުރީގެ މެމްބަރަކަށް ކޮށްފަ އޮތް ހުކުމަކަށް ރިއާޔަތްކޮށް ގާނޫނީ ވާހަކަ މިދަކަވަނީ ޓޮމް. މި މިންވަރަށް، ގާނޫނީ ޓީމުންވެސް ނުދައްކަވާ ވާހަކަތައް، ޓޮމް މިބީދައިން ދެއްކެވީމާ، މުޅި މައްސަލައާމެދު މީހުން ސުވާލު އުފައްދަނީ، އިތުބާރު ގެއްލިގެން ދަނީ.
ހުސެއިން މުހައްމަދު ލަތީފާއި ޓޮމްއާއި ދެ ބޭފުޅުންގެ މެދުގައި ހިނގި ޒުވާބުތަކުގައި ދައްކާފައި ހުރިހާ ވާހަކަތަކަށް މޭރުންކޮށް އިދިކޮޅު ޕީޕީއެމްގެ އިސް ބޭފުޅަކު ވިދާޅު ވެފައި ވެއެވެ.
އިދިކޮޅު ބައެއް ފަރާތްތަކުން ތުހުމަތު ކުރާ ގޮތުގައި، ޓޮމް މަސައްކަތް ކުރައްވަމުން ގެންދަވަނީ، ރައީސް ޔާމިން ނޯޓުން މުއާމަލާތު ކުރާ އެންމެ އިސް ފަރާތަކީ އޭނާކަމަށް ސިޔާސީ ފަރާތްތަކަށް ދައްކަވައިގެން، އޭގެ ސިޔާސީ މަންފާ ނަންގަވާށެވެ. އަދި މިގޮތުން، ގާސިމް އިބުރާހިމްގެ އިތުރުން، މި ސަރުކާރުގެ އިސް ފަރާތްތަކާވެސް ޓޮމް، ސިއްރުން މުއާމަލާތް ކުރާކަމަށްވެސް އިދިކޮޅު އިސް ބައެއް ފަރާތްތަކުން ތުހުމަތު ކުރެއެއްވެ.
ޓޮމްގެ އަމަލްތަކާމެދު ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު ފާޅުކުރެއްވި ކަންބޮޑުވުންތަކަށް ލީޑަރޝިޕް ވަޓްސްއަޕް ގުރޫޕުގައި ޖަވާބު ނުދެއްވާ، ޓޮމް ބޭނުންވީ ވަކިން އޭނާއާއި ބައްދަލު ކުރުމަށް ކަމަށް، މައުލޫމާތު އެގިހުރި ފަރާތުން ވިދާޅުވިއެވެ. އޭގެ އެންމެ ބޮޑު އެއް ސަބަބަކީ ލީޑަރޝިޕް ވަޓްސްއަޕް ގުރޫޕުގައިވެސް ދެކެވޭ ވާހަކަތަކުގެ ސްކްރީން ޝޮޓްތައް މީޑިއާތަކާއި ހަމައަށް ލީކްވެގެން ދާނެކަމަށް ޓޮމްއަށް ގަބޫލު ކުރެވުން ކަމަށްވެސް އެފަރާތުން ވިދާޅުވެއެވެ.
ގިނަ ބަޔަކަށް ނޯޓު އަންނަމުން ދާތީ ލީޑަރޝިޕް އޮޅުންބޮޅުން ގަޑެއްގައި!
ރައީސް ޔާމިން ޖަލަށް ވަޑައިގަންނަވަމުން ޕާޓީގެ ހިންގުން، ޕީއެންސީގެ ރައީސް އަބުއްރަހީމްއާއި ހަވާލު ކޮށްފައިވި ނަމަވެސް، ޕާޓީ ހިންގުމާއި ގުޅޭގޮތުން ޖަލުން އަންނަމުންދާ ނޯޓުތައް އަންނަނީ ޕާޓީގެ ލީޑަރޝިޕަށް ނޫންކަންވެސް ޕީޕީގެ އިސް ގިނަ ބަޔަކު ދަނީ ފާހަގަ ކުރަމުންނެވެ. މިގޮތުން ބައެއް ނޯޓުތައް ޕާޓީގެ ޕާލަމެންޓްރީ ގުރޫޕުގެ ބައެއް މެމްބަރުންނަށް އަންނަމުންދާއިރު، އަނެއްބައި ނޯޓުތައް އަންނަމުން ދަނީ، ޕާޓީއަށް ޚަރަދު ކުރުމުގައި އިސްކޮށް ހަރަކާތްތެރިވާ، ވިޔަފާރިވެރިޔާ ޝަވީދަށެވެ.
ޕީޕީއެމްގެ ބައެއް ފަރާތްތަކުން ތުހުމަތު ކުރާ ގޮތުގައި ޝަވީދު މަސައްކަތް ކުރަމުންދަނީ ޑރ. ޖަމީލަށް ރިޔާސީ ޓިކެޓް ހޯދާދިނުމަށެވެ.
އޭގެ އިތުރުން ޔާމިން މިނިވަން ކުރުމަށް ހިންގާންޖެހޭ ސިޔާސީ ހަރަކާތަތްކާއި އަދި މީޑިއާގައި ދައްކާންޖެހޭ ބައެއް ވާހަކަތަކާއި ގުޅޭގޮތުން ޔާމިން ޖަލުން ނޯޓުތައް ފޮނުވާ، ޕާޓީގެ ޕާލަމެންޓްރީ ގުރޫޕްގެ މެމްބަރުންގެ ތެރޭގައި މަހިބަދޫ ދާއިރާގެ މެމްބަރު އަހުމަދު ތާރިގު ހިމެނޭއިރު، އޭދަފުށީ ދާއިރާގެ މެމްބަރު އަހުމަދު ސަލީމަށްވެސް ނޯޓު އަންނަކަމަށް "ޚަބަރު އޮންލައިން"އާއި މައުލޫމާތު ހިއްސާކުރި ޕީޕިއެމްގެ ސެނެޓްގެ ބައެއް މެމްބަރުން ވިދާޅު ވެފައި ވެއެވެ.
