މިއަހަރު އިންޑިއާގައި ބޭވުމަށް ހަމަޖެހިފައިވާ ސާފް ޗެމްޕިއަންޝިޕް 2023ގައި ވާދަކުރާ ދިވެހި ގައުމީ ޓީމު، މުބާރާތުގައި ކުޅުމުގެ ކުރިން އިތުރު ތަމްރީން ހޯދުމަށް ޖަޕާންގައި ކޭމްޕް ކޮށްފިއެވެ.
މިގޮތުން ގައުމީ ޓީމުގެ އޮފިޝަލުންނާއި އަދި ޓީމުގެ ކުޅުންތެރިން ކޭމްޕް ކޮށްފައިވަނީ ޖަޕާންގެ ނޭޝަނަލް ޓްރެއިންނިން ސެންޓަރ، ނުވަހަ ޖޭ-ވިލެޖްގައެވެ. ގައުމީ ޓީމު ޖޭ-ވިލެޖްގައި ތަމްރީން ހޯދުމުގެ ފުރުސަތު ފަހިކޮށް ކޮށްފައިވަނީ، އެފްއޭއެމްއާއި ޖަޕާން ފުޓްބޯޅަ ފެޑެރޭޝަންއާއި ގުޅިގެންނެވެ. މި ސެންޓަރުގައި ދިވެހި ގައުމީ ޓީމު ތަމްރީން ހޯދާ މުއްދަތުގައި ރަހުމަތްތެރިކަމުގެ އެއް މެޗް ކުޅުމަށް ވަނީ ހަމަޖެހިފައެވެ.
ރާއްޖޭގެ ގައުމީ ފުޓު ބޯޅަ ޓީމު އިތުރު ތަމްރީން ހޯދުމަށް ޖަޕާނަށް ގޮސްފައިވަނީ މިމަހުގެ 6 ވަނަ ދުވަހުއެވެ. އަދި ޖަޕާނުން އިންޑިއާއަށް ފުރުމަށް ހަމަޖެހިފައިވަނީ މިމަހުގެ 15ވަނަ ދުވަހުއެވެ.
މިމަހުގެ 13 ވަނަ ދުވަހު، ޖަޕާނަށް ކަނޑައަޅުއްވާފައި ހުންނަވާ ސަފީރު ހަސަން ސޯބިރުވަނީ، ޖޭ-ވިލެޖުގައި ތަމްރީން ހޯދަމުންދިޔަ ގައުމީ ޓީމާއި ބައްދަލުކޮށް ހިތްވަރު ދެއްވާފައެވެ.
