ރައްޔިތުންގެ މަޖިލީހުގެ މިއަދުގެ ޖަލްސާއަށް އެޖެންޑާ ކުރައްވާފައިވާ މަޖިލީހުގެ ނައިބް ރައީސް އީވާގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް މަޖިލީހުގެ ރިޔާސަތާއި މަޖިލީހުގެ ރައީސް މުހައްމަދު ނަޝީދު ހަވާލުވެ ވަޑައިގެންނެވުމަށް ޢުޒުރުވެރިވެ ވަޑައިގެންނެވުމުން ޖަލްސާ ބޭއްވެން ނެތްކަން އިއުލާނުކޮށްފިއެވެ.
ރައްޔިތުންގެ މަޖިލީހުގެ ނައިބް ރައީސް އީވާގެ އިތުބާރު ނެތްކަމުގެ މައްސަލަ ވެއްދީ އެމްޑީޕީގެ 50 މެމްބަރުންގެ ސޮޔާއެކުއެވެ. މަޖިލީހުގެ ޤަވާއިދު ބަޔާންކުރާގޮތުގައި މަޖިލީހުގެ ރައީސް ނުވަތަ ނާއިބު ރައީސް މަޤާމުން ވަކިކުރެވޭނީ، މަޖިލީހުގެ އެ ޖަލްސާއެއްގައި ޙާޒިރުވެ ވޯޓުގައި ބައިވެރިވި މެންބަރުންގެ އަޣްލަބިއްޔަތުން ފާސްކުރެއްވުމުންނެވެ.
މަޖިލީހުގެ މިއަދުގެ ޖަލްސާ ފައްޓެވިއިރުވެސް، ރިޔާސަތުގައި ބޭފުޅަކު ނެތުމުން މަޖިލީހުގެ މެމްބަރުންނަށް ޖަލްސާ ނެތްކަން އެންގެވީ މަޖިލީހުގެ ޢަމީން ޢާންމު ފާތިމަތު ނިޔުޝާއެވެ. އަމީން އާންމު ވިދާޅުވީ ރައްޔިތުންގެ މަޖިލީހުގެ ގަވާއިދު 205 ވަނަ މާއްދާގެ (ބ) ގައި ބަޔާން ވެގެންވަނީ ރައްޔިތުންގެ މަޖިލީހުގެ ނައިބް ރައީސް މަޤާމުން ވަކި ކުރުމުގެ ޤަރާރެއް މަޖިލީހަށް ހުށަހެޅިފައިވާ ނުވަތަ ހުށަހަޅާ ޤަރާރެއްގެ ރިޔާސަތު ބަލަހައްޓަވާނީ މަޖިލީހުގެ ރައީސްކަމަށެވެ.
މަޖިލީހުގެ ނައިބް ރައީސް އީވާ މަޤާމުން ވަކި ކުރުމަށް ހުށަހަޅާފައިވާ ގަރާރު މިއަދުގެ ޖަލްސާއަށް އެޖެންޑާކޮށް، ޖަލްސާގެ ރިޔާސަތު ބަލަހައްޓަވައި ދެއްވުމަށް ރައްޔިތުންގެ މަޖިލީހުގެ ރައީސަށް އިއްޔެ މަޖިލީހުގެ ރައީސަށް ސިޓީއަކުން ދަންނަވާފައިވާނެކަމަށެވެ.
ރައްޔިތުންގެ މަޖިލީހުގެ ނައިބު ރައީސް ވަކި ކުރަން ހުށަހަޅާފައިވާ ގަރާރު އެޖެންޑާ ކުރާ މަޖިލީހުގެ ޖަލްސާގެ ރިޔާސަތު ބެލެހެއްޓެވުމަށް ރައްޔިތުންގެ މަޖިލީހުގެ ރައީސް އުޒުރުވެރިވެވަޑައިގަންނަވާކަން 12 ޖޫން 2023 ގައި އެމަނިކުފާނު ފޮނުއްވި ސިޓީފުޅުގައި އަންގަވާފައިވޭ. އެހެންކަމުން މިއަދުގެ މި ޖަލްސާގެ ރިޔާސަތު ބެލެހެއްޓުމާ ގުޅޭ ގޮތުން ވަކި ގޮތެއް ކަނޑަނޭޅެނީސް މި ވަގުތު މި ޖަލްސާ ކުރިއަށްގެންދެވެން ނެތް ވާހަކަ އިއްޒަތްތެރި މެމްބަރުންނަށް ދަންނަވާލަން.
– ނިޔުޝާ ވިދާޅުވިއެވެ.
އެހެން ނަމަވެސް މިހާރު ރައްޔިތުންގެ މަޖިލީހަށް ލިބިފައިވާ މަޖިލީހުގެ ރައީސް މަޤާމުން ވަކި ކުރުމާއިމެދު ހުށަހަޅާފައިވާ ޤަރާރާއިމެދު ވަކި ގޮތެއް ކަނޑައަޅާ ނުނިމެނީސް ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ (ބ) ގެ ދަށުން ރައްޔިތުންގެ މަޖިލީހުގެ ނައިބް ރައީސް މަޤާމުން ވަކި ކުރުމަށް ހުށަހަޅާފައިވާ ޤަރާރު އެޖެންޑާކުރާ މަޖިލީހުގެ ޖަލްސާގެ ރިޔާސަތު ބެލެހެއްޓެވުމަށް ރައްޔިތުންގެ މަޖިލީހުގެ ރައީސް އުޒުރުވެރިވެ ވަޑައިގަންނަވާކަން ރައީސް ނަޝީދު ފޮނުއްވި ސިޓީފުޅުގައި އަންގަވާފައިވާކަމަށެވެ.
މަޖިލީހުގެ ޢަމީން އާންމު ވިދާޅުވީ ރިޔާސަތު ބެލެހެއްޓުމާއި ގުޅޭގޮތުން ގޮތެއް ކަނޑަނޭޅެނީސް މިވަގުތު ޖަލްސާ ކުރިއަށް ގެންދެވެން ނެތްކަމަށެވެ.
މި މައްސަލާގައި ގޮތެއް ކަނޑަނޭޅެނީސް މިވަގުތު މި ޖަލްސާ ކުރިޔަށް ގެންދެވެން ނެތް ވާހަކަ މެންބަރުންނަށް ދަންނަވާލަން.
– ނިއުޝާ ވިދާޅުވިއެވެ.
އީވާގެ މައްސަލަ މިހާތަނަށްވެސް އެޖެންޑާ ނުކުރެވި ވަނީ، މަޖިލީހުގެ ކޮމެޓީތައް އެކުލަވާނުލެވި، ޢާންމު ކޮމެޓީން ކަނޑައަޅަންޖެހޭ ވަގުތު ކަނޑައެޅިފައި ނެތުމުންނެވެ.
