ރައްޔިތުންގެ މަޖިލީހުގެ ޖަލްސާގައި ނިޒާމީ މައްސަލަތައް ނަގައި، ހޫނު ބަހުގެ ހަމަލާތަކެއް ބަދަލު ކުރުވި ޖަލްސާ ކުރިއަށް ނުގެންދެވި ޖަލްސާ ނިންމާލައިފިއެވެ.
މިއަދު ރައްޔިތުންގެ މަޖިލީހުގެ ޖަލްސާގައި ރިޔާސަތު ބަލަހައްޓަވަނީ ވިލުފުށީ ދާއިރާގެ މެމްބަރު ހަސަން އަފީފެވެ. އެއީ ރިޔާސަތު ބަލަހައްޓަން އުޒުރުވެރިވެވަޑައިގަންނަވާ ކަމަށް މަޖިލީހުގެ ރައީސް މުހައްމަދު ނަޝީދު އަންގަވާފައިވާތީއެވެ. ނަމަވެސް ރައްޔިތުންގެ މަޖިލީހުގައި ތިއްބެވި ސަރުކާރަށް ތާއީދު ކުރާ މެމްބަރުން އަދި ބައެއް މިނިވަން މެމްބަރުން ނިޒާމީ ނުކުތާ ނަންގަވާތީ މަޖިލީހުގައި މިއަދު އެޖެންޑާކޮށްފައި އޮތް މަސައްކަތް ކުރިއަކަށްނުދެއެވެ.
މެންބަރުން ނިޒާމީ މައްސަލަ ނަންގަވާ އަޑުގަދަ ކުރަމުންދިޔައީ މަޖިލީހުގެ ރިޔާސަތުގައި ވިލުފުށި ދާއިރާގެ މެންބަރު ހަސަން އަފީފު އިންނެވި ސަބަބު ސާފުކުރުމަށާއި ނައިބު ރައީސް އީވާގެ އިތުބާރު ނެތްކަމުގެ މައްސަލަ އެޖެންޑާ ނުކުރުމުންނެވެ.
ރައްޔިތުންގެ މަޖިލީހުގެ ގަވާއިދުގެ 205 ވަނަ މާއްދާގެ ނ. ގައި ބުނެފައި އޮންނަ ގޮތުން މަޖިލީހުގެ ރައީސް ނުވަތަ ނައިބު ރައީސްގެ ވަކި ކުރަން ހުށަހެޅުމުން އެކަން އަމީން އާންމު ރައީސްއަށާއި މެމްބަރުންނަށް ރަސްމީ ތިން ދުވަހުގެ ތެރޭގައި އަންގައި ނޯޓިހެއް ފޮނުވަންޖެހެއެވެ. އަދި, އެ ނޯޓިހުގެ ތާރީހުން ފެށިގެން 14 ދުވަސް ދިނުމަށްފަހު ދެން އެންމެ އަވަހަށްޖެހޭ ރަސްމީ ބަންދު ނޫން ދުވަހެއްގައި ރައީސް މަގާމުން ވަކި ކުރުމުގެ ޖަލްސާ ބާއްވަންޖެހެއެވެ.
އިވާގެ މައްސަލައިގައި ނޯޓިސް ހަމަވެ، ޖަލްސާ ބާއްވަންޖެހޭ ތާރީހަކީ އިއްޔެއެވެ. ރައްޔިތުންގެ މަޖިލީހުގެ ނައިބު ރައީސް ވަކި ކުރުމުގެ އިޖުރާއަތުގެ ތެރެއިން ގަރާރު އިއްވަން ބާއްވާ ޖަލްސާ އެޖެންޑާާ ނުކުރެއްވުމަށްފަހު އެ މަޖިލީހުގެ އަމީން އާންމު ފާތިމަތު ނިޔުޝާ ވިދާޅުވީ އެ ޖަލްސާ އެޖެންޑާ ކުރެވޭނީ އާންމު ކޮމެޓީ އެކުލަވާލެވިގެން ކަމަށެވެ.
ކޮމެޓީތަކުގެ މަސައްކަތް ހުއްޓިފައި އޮތީ އެމްޑީޕީގެ 13 މެމްބަރަކު އެ ޕާޓީން ވަކިވުމުން ކޮމެޓީތަކުގެ ރޭޝިއޯއަށް ބަދަލު އައުމުންނެވެ. އިދިކޮޅު މެމްބަރުން އަދި އަމީން އާންމު ވިދާޅުވަނީ އީވާގެ މައްސަލަ އެޖެންޑާ ކުރެވޭނީ ކޮމެޓީގެ ފުރިހަމަވުމުން ކަމަށެވެ.
