އިދިކޮޅު ޕީޕީއެމްއިން ބޭއްވި މުޒާހިރާއެއްގެ ތެރެއިން ފުލުހެއްގެ އަތުގައި ދަތްއެޅި އަންހެނަކު 5 ދުވަހަށް ބަންދުގައި ބެހެއްޓުމަށް ކުރިމިނަލް ކޯޓުން އަމުރު ކޮށްފިއެވެ.
މިހަފްތާގެ ހޮނިހިރު ދުވަހުގެ ރޭ އިދިކޮޅުން ބޭއްވި މުޒާހިރާގައި ފުލުހެއްގެ އަތުގައި ދަތް އަޅައިގެން ހައްޔަރު ކޮށްފައިވަނީ އުމުރުން 20 އަހަރުގެ އަންހެނެކެވެ. އޭނާގެ ބަންދުގެ މުއްދަތު ޖެހުމަށް ކޯޓަށް ހާޒިރު ކުރުމުން ކޯޓުންވަނީ އޭނާ 5 ދުވަހަށް ބަންދުގައި ބެހެއްޓުމަށް އަމުރު ކޮށްފައެވެ.
އޭނާ ބަންދުގައި ބެހެއްޓުމަށް ކޯޓުން ކުރި އަމުރުގައި ވިދާޅުވެފައިވަނީ، ފުލުހުންގެ ބެލުމުގެ ދަށަށް އޭނާ ގެންދަން މަސައްކަތް ކުރުމުން، ފުލުސް މީހާގެ އަތުގައި އޭނާ ދަތް އަޅާފައިވާކަން، ދެ ފުލުހެއްގެ ހެކިބަހުން ސާބިތުވާ ކަމަށެވެ. އަދި އޭނާއަކީ މީގެ ކުރުން ހައްޔަރު ކޮށްފައިވާ ފަރާތަކަށް ވުމުން، އޭނާއަކީ ކުށުގެ ރެކޯޑު އޮތް ފަރާތެއްކަންވެސް ކޯޓުން ފާހަގަ ކޮށްފައި ވެއެވެ.
އަދި އެއަންހެން މީހާ މުޖުތަމައުގެ ސަލާމަތާއި ރައްކާތެރިކަމަށް 5 ދުވަހަށް ބަންދުގައި ބެހެއްޓުމަށް އަމުރުކުރާ ކަމުގައި ކޯޓު އަމުރުގައި ވެއެވެ.
