ރައްޔިތުންގެ މަޖިލިހުގެ ބައެއް ކޮމިޓީތައް އެމްޑީޕީގެ މެޖޯރިޓީ ގެއްލޭގޮތަށް އެކުލަވާ ނުލުމަށް އެދި ފޮނުއްވި ސިޓީއަކީ މަޖިލިހުގެ ކޮމިޓީތައް ހުއްޓުމަކަށް ގެނައުމަށް އޮތް އުޒުރަކަށް ހައްދަވާފައިވާތީ ހިތާމަ ކުރައްވާކަމުގައި މަޖިލީހުގެ މެޖޯރިޓީ ލީޑަރު، އަދި އެމްޑީޕީ ޕާލަމެންޓްރީ ގްރޫޕުގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް މިހެން ވިދާޅުވީ، ރައްޔިތުންގެ މަޖިލީހުގެ ކޮމިޓީތައް އެކުލަވާލުން މަޑުޖައްސާލީ އެކަމާ ގުޅޭ ގޮތުން ޕާޓީތަކާ މަޝްވަރާކުރަން ބޭނުންވެގެން އެމްޑީޕީގެ ޕާލިމަންޓްރީ ގްރޫޕުގެ ލީޑަރު މުހައްމަދު އަސްލަމް އަދިވަޑައިގަތުމުން ކަމަށް މަޖިލީހުގެ އަމީންއާންމު ފާތުމަތު ނިޔުޝާ، އަސްލަމަށް ފޮނުއްވި ސިޓީގެ ޖަވާބުގައި ރޭ ނިއުޝާއަށް ފޮނުއްވި ސިޓީގައެވެ.
އަސްލަމްގެ ސިޓީގައި ވިދާޅުވެފައިވަނީ، އީވާގެ އިތުބާރު ނެތްކަމުގެ މައްސަލަ އެޖެންޑާކުރުން އިސްތިސްނާކުރެވޭނެ އެއްވެސް ހާލަތެއް މަޖިލީހުގެ ގަވާއިދުގައި ބަޔާންކޮށްފައި ނުވާ ކަމަށާއި، އަދި ކޮމިޓީގެ މަސައްކަތްތައްވެސް ހުޓުމަކަށް ގެނައުމަށް މަޖިލިހުގެ ގަވާއިދު ތަނެއް ނުދޭ ކަމުގައެވެ.
އީވާގެ އިތުބާ ނެތްކަމުގެ މައްސަލަ ކުރިޔަށް ނުގެންދިއުމަށް އަމީންއާންމު ދައްކަވަމުން ގެންދަވާ ހުއްޖަތަކީ ރައްޔިތުންގެ މަޖިލިހުގެ އާންމު ކޮމިޓީ ހުއްޓުމަކަށް އައިސްވާކަމަށް ވިދާޅުވެއެވެ. އާންމު ކޮމިޓީއަކީ މަޖިލިހުގެ ދާއިމީ ކޮމިޓީއެއްނަމަވެސް، 13 މެމްބަރަކު އެމްޑީޕީން ވަކިވުމާއި ގުޅިގެން ކޮމިޓީތަކުގެ ކޮމްޕޮޒިޝަނަށް ބަދަލު ގެންނަން ޖެހުމާއެކު އާންމު ކޮމިޓީއަށްވަނީ އީވާ ވަކި ކުރުމުގެ މައްސަލާގެ ބަހުސްގައި މެމްބަރުން ވާހަކަ ދައްކާނޭ ވަގުތު ކަނޑަ ނޭޅިފައެވެ.
ކޮމިޓީތައް އަލުން އެތުރުމަށް ހަމަޖެހިފައިވަނީ މަޖިލިހުގައި ހިމެނޭ ސިޔާސީ ޕާޓީތަކާ މަޝްވަރާ ކުރުމަށްފަހު، މަޖިލިސް ރައީސް މުހައްމަދު ނަޝީދެވެ. ނަޝީދުގެ އިތުބާރު ނެތްކަމުގެ މައްސަލަވެސް މިހާރުވަނީ މަޖިލިހަށް ހުށަހެޅިފައެވެ.
އަސްލަމްގެ ސިޓީގައިވަނީ، މިހާރު މަޖިލިހަށް ހުށަހެޅިފައިވާ ފޮރިން މިނިސްޓަރު ޝާހިދުއާއި މަޖިލިސް ނާއިބު ރައީސް އީވާގެ އިތުބާރު ނެތްކަމުގެ މައްސަލަ އާންމު ކޮމިޓީން ނިންމަވާ ދެއްވުމަށްވެސް އަމީންއާނަމުގެ ކިބައިން އެދިފައެވެ. އަދި ވިދާޅުވެފައިވަނީ، އާންމު ކޮމެޓީގެ މަސައްކަތްތައް އެ ކޮމެޓީގައި މިވަގުތު ތިއްބެވި މެމްބަރުންނާ އެކު ކުރިއަށް ގެންދަންޖެހޭނެ ކަމަށް އޭނާ ގަބޫލުކުރައްވާ ކަމުގައެވެ.
މަޖިލީހުގެ މެމްބަރުން ނިސްބަތްވާ ސިޔާސީ ޕާޓީއަށް އެކިފަހަރުމަތިން އައި ބަދަލުތަކާ ގުޅިގެން މީގެ ކުރިން މަޖިލީހުގެ އިދާރާއިން މަޖިލީހުގެ ކޮމެޓީތައް އެއްވެސް ފަހަރަކު ހުއްޓުވާލާފައިނުވާކަން ފާހަގަކުރަމެވެ. އަދި އެއިރު އައި ބަދަލުތައް ހަމަޖެއްސުމުގެ މަރުހަލާ ހިނގަމުން ދިޔައިރު، މަޖިލީހުގެ ކޮމިޓީތަކުގެ މަސައްކަތްތައް ހުއްޓުމެއް ނެތި ކުރިއަށް ދިޔަކަން ވެސް ފާހަގަ ކުރަމެވެ.
ރޭ ދަންވަރު މީޑިއާތަކަށް ލިބުނު އަސްލަމްގެ ސިޓީގައި ލިޔުއްވާފައި ވެއެވެ.
ކޮމިޓީތައް އަލުން އެކުލަވާލުން މަޑުޖައްސާލީ އަސްލަމްގެ އެދިވަޑައިގަތުމަށް ކަމަށް ނިއުޝާ ވިދާޅުވާ މައްސަލާގައި ރައްދު ދެއްވަމުން އަސްލަމް ވިދާޅުވެފައިވަނީ، މަޖިލުހުގެ 64 އިންސައްތަ މެޖޯރިޓީ އެމްޑީޕީއަށް އޮތް އިރު، މަޖިލިހުގެ ކޮމިޓީތައް އެކުލަވާލަން މަސައްކަތް ކޮށްފައިވަނީ މަޖިލިހުގެ ބައެއް ކޮމިޓީތަކުގެ މެޖޯރިޓީ އެމްޑީޕީއަށް ގެއްލޭ ގޮތަށް ކަމަށެވެ. އެހެންކަމުން އެދިވަޑައިގަތީ އެގޮތަށް ކޮމިޓީތައް އެކުލަވާނުކުމަށް ކަމަށްވެސް އަސްލަމް ވިދާޅުވެފައި ވެއެވެ.
"23 މެއި 2023ވަނަ ދުވަހަށް ފަހު (އެމްޑީޕީއަށް މެޖޯރިޓީ ގެއްލޭގޮތަށް ކޮމިޓީތައް އެކުލަވާ ނުލުމަށް އެދި އަސްލަމް ސިޓީ ފޮނުއްވި ދުވަސް) ދިގު މުއްދަތެއް ފާއިތުވެގެންދިޔަރު، މަޖިލީހުގެ ގަވާއިދާ އެއްގޮތަށް މަޖިލީހުގެ ރައީސް ކޮމެޓީތައް ތަރުތީބު ކުރެއްވުމުގެ މަސައްކަތް ކުރިއަށް ގެންގޮސްފައިނުވާކަން ވެސް ފާހަގަކުރަމެވެ.
އެމްޑީޕީގެ މެޖޯރިޓީ ގެއްލޭގޮތަށް ކޮމިޓީތައް އެކުލަވާނުލުމަށް އެދި ފޮނުއްވި ސިޓީއަކީ މަޖިލިސް ކޮމިޓީތައް ހުއްޓުވުމަށް އޮތް އުޒުރަކަށް ހައްދަވާފައިވާތީ ހިތާމަކުރާކަމަށް ވިދާޅުވެ އަސްލަ ލިޔުއްވާފައި ވެއެވެ.
