ރައްޔިތުންގެ މަޖިލީހަށް ހުށަޅާފައިވާ މަޖިލީހުގެ ނައިބް ރައީސް އީވާގެ އިތުބާރު ނެތްކަމުގެ މައްސަލަ މަޖިލީހުގައި ކުރިއަށް ނުގެންދެވި އެޖެންދާ ނުކޮށް އޮތްކަމުގައި ވީނަމަވެސް މަޖިލީހުގެ މަސައްކަތްތައް ކުރިއަށް ގެންދެވޭނެކަމަށް ރައްޔިތުންގެ މަޖިލީހުގެ ޢަމީންއާންމު ފާތިމަތު ނިއުޝާ ވިދާޅުވެއްޖެއެވެ.
މަޖިލީހުގައި އަޣުލަބިއްޔަތު އޮތް އެމްޑީޕީން ވަނީ މަޖިލިހުގެ ނައިބު ރައީސް އީވާ މަގާމުން ދުރުކުރުމުގެ މައްސަލައެއް 50 މެމްބަރުންގެ ސޮޔާ އެކު މަޖިލީހަށް ހުށަހަޅައިފައެވެ. އެކަމާ ގުޅިގެން ގަވައިދުގައި ބުނާ 14 ދުވަހުގެ ނޯޓިހުގެ މުއްދަތު މާދަމައަށް ހަމަވާތީ، ކުރިން މިމައްސަލަ މާދަމައަށް އެޖެންޑާވެސް ކޮށްފައިވެއެވެ.
ނަމަވެސް މައްސަލަ ހުށަހެޅުއްވި މެމްބަރަށް، މަޖިލީހުގެ އަމީން އާންމު ފާތިމަތު ނިއުޝާ މިދިޔަ ހަފްތާގައި ފޮނުއްވި ސިޓީއެއްގައި ވިދާޅުވީ، ޕާޓީތައް އެކުލެވިގެންވާ ގޮތަށް އައި ބަދަލާ އެކު، ދާއިމީ ކޮމިޓީތައް އަދިވެސް އެކުލަވާލާފައި ނުވާތީ، މަޖިލިހުގެ ނައިބު ރައީސްގެ މަގާމުން އީވާ ވަކިކުރުމުގެ ގަރާރަށް ބަހުސް ކުރުމުގެ ވަގުތު ކަނޑައަޅާފައި ނުވާ ކަމަށެވެ. އެކަމާ ގުޅިގެން އެމްޑީޕީގެ ޕާލިމަންޓަރީ ގުރޫޕުގެ ފަރާތުން ވަނީ މަޖިލީހުގެ ޢާންމު ކޮމެޓީ ބައްވައި މިމައްސަލަ އެޖެންޑާ ކުރެވޭނެ ގޮތެއް ހަމަޖެއްސުމަށް ސިޓީއަކުން ދަންނަވާފައެވެ.
ސިޓީގެ ޖަވާބުގައި ނިއުޝާ ވިދާޅުވީ ރައްޔިތުންގެ މަޖިލީހުގެ ގަވާއިދުގެ 206 ވަނަ މާއްދާއަށް ރިޢާޔަތްކޮށް އެ ގަވާއިދުގެ 205 ވަނަ މާއްދާގެ (ހ) ގެ ދަށުން މަޖިލީހުގެ ނައިބު ރައީސް މަޤާމުން ވަކިކުރުމުގެ ޤަރާރެއް ހުށަހެޅިފައިވާ ދަނޑިވަޅެއްގައި އެ ޤަރާރާމެދު ގޮތެއް ނިންމުމަށްފަހުގައި ނޫނ،ީ އެ ވަގުތު މަޖިލީހަށް ހުށަހެޅިފައިވާ އެހެން އެއްވެސް ކަމަކާމެދު ބަހުސްކުރުން ނުވަތަ ގޮތެއް ނިންމުން މަނާވެގެންވަނ،ީ އެ ޤަރާރުގެ ނޯޓިހުގެ މުއްދަތު ހަމަވެގެން މަޖިލީހުގެ ޖަލްސާއަށް އެ ޤަރާރު ހުށަހެޅުމަށްފަހުގައި ކަމަށެވެ.
ނިއުޝާ ވިދާޅުވީ ރައްޔިތުންގެ މަޖިލީހުގެ ގަވާއިދުގެ 206 ވަނަ މާއްދާއަށް ރިޢާޔަތްކޮށް އެ ގަވާއިދުގެ 205 ވަނަ މާއްދާގެ (ރ) ގައި ކަނޑައެޅިގެން ބަޔާންކޮށްފައިވާ ކަމަށެވެ. އެހެންކަމުން 23 މޭ 2023 ގައި މަޖިލީހުގެ 50 މެންބަރުން ސޮއިކުރައްވައި ރައްޔިތުންގެ މަޖިލީހުގެ ނައިބު ރައީސް މަޤާމުން ވަކިކުރުމުގެ މައްސަލަ ހުށަހަޅުއްވައ،ި ރައްޔިތުންގެ މަޖިލީހުގެ ގަވާއިދުގެ 206 ވަނަ މާއްދާއަށް ރިޢާޔަތްކޮށް އެ ގަވާއިދުގެ 205 ވަނަ މާއްދާގެ (ނ) ގައިވާ ގޮތުގެމަތިން އެ މައްސަލައިގެ ނޯޓިސް މަޖިލީހުގެ މެންބަރުންނަށާއި މަޖިލީހުގެ ނައިބު ރައީސްއަށް ދީފައިވީނަމަވެސް އެ މައްސަލަ މަޖިލީހުގެ ޖަލްސާއަށް އަދި ހުށަހެޅިފައިނުވާމަށް ނިއުޝާ ވަނީ ވިދާޅުވެފައެވެ.
ނިއުޝާ މިހެން ވިދާޅުވި ނަމަވެސް މަޖިލީހުގެ މެޖޯރިޓީ ޕާޓީން ބުނަނީ އީވާގެ މައްސަލައިގެ މުއްދަތު ހަމަވެ، ޖަލްސާވެސް ނުބާއްވައި މަޖިލީހުގެ އެހެން މަސައްކަތްތައް ކުރިއަށް ނުގެންދެވޭނެ ކަމަށެވެ.
މަޖިލީހުގެ ދާއިމީ ކޮމިޓީތައް އެކުލަވައިނުލެވި ތިން ހަފުތާ އަށް ވުރެ ގިނަ ދުވަސް ވެފައިވާއިރު، އެކަން ނުކުރެވި ލަސްވަނީ މަޖިލިސް ތަމްސީލު ކުރާ ޕާޓީތަކުން އެއްބަސް ނުވެވިގެން ކަމަށް ރިޔާސަތުން މަޖިލީހުގެ ރައީސް މުހައްމަދު ނަޝީދު ވަނީ ވިދާޅުވެފައެވެ. އެކަމަކު ކޮމިޓީތައް އެކުލަވާނުލެވި ލަސްކުރަނީ، އީވާގެ މައްސަލަ އަށް ހުރަސް އަޅުއްވަން ނަޝީދު ކަމަށް އެމްޑީޕީގެ މެމްބަރުން ގެންދަވަނީ ތުހުމަތު ކުރައްވަމުންނެވެ.
މަޖިލީހުގެ ނައިބު ރައީސްގެ މަގާމުން އީވާ ވަކި ކުރަން އެމްޑީޕީން ނިންމީ 12 މެންބަރުންނާ އެކު އީވާ ވެސް އެ ޕާޓީން ވަކިވެ އާ ސިޔާސީ ޕާޓީއެއް އުފެއްދުމުގެ މަސައްކަތް ފެއްޓެވުމުންނެވެ. އެ ޕާޓީން ވަނީ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް މައްސަލަ ވެސް މަޖިލީހަށް ހުށަހަޅައިފައެވެ.
އެމަނިކުފާނު ރިޔާސަތުން ދުރުކުރަން 54 މެމްބަރަކު ސޮއިކުރެއްވިއެވެ. ބަންޑާރަ ނައިބު އިބްރާހިމް ރިފްއަތާއި ފޮރިން މިނިސްޓަރު ޝާހިދުގެ އިތުބާރު ނެތްކަމުގެ މައްސަލައެއް މަޖިިލީހަށް ވައްދާފައި ވިޔަސް އެ ދެ މައްސަލަ ވެސް ހިނގާ ގޮތެއް ނުވެއެވެ.
