އެމްޑީޕީގެ ރައީސް މުހައްމަދު ނަޝީދަށް ސިކުޑިއެއް އިދެގެން ބޭނުން ކުރަން އެނގުނުނަމަ ލިބުނު ވެރިކަމުގެ ދައުރު ނިންމާލާނެ ބުއްދި ހުރީސްކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ވިދާޅުވެއްޖެއެވެ.
އޭނާ މިހެން ވިދާޅުވީ ކުރީގެ ރައީސް މުހައްމަދު ނަޝީދު އެ މަނިކުފާނުގެ ސިކުނޑި ބޭނުން ކުރައްވާނީ ރާއްޖެއަށް އިންގިލާބީ ބަދަލާއި ތަސައްވުރު ގެންނަވަން ކަމަށާއި "ކަރާމާތުގެ ދުލި އެލުވަައިގެން" ސެލްފީ ނެންގެވުމަށް ނޫން ކަމަށް، މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެ ދެއްކެވި ވާހަތަކަށް ރައްދު ދެއްވަމުންނެވެ.
ރޮޒޭނާ ވިދާޅުވީ ރައީސް ނަޝީދުގެ ސިކުޑީގެ ބޭނުން ކުރައްވައިގެން ކަންކަން ކުރައްވާނަމަ އެމަނިކުފާނަށް ލިބުނު ވެރިކަން ދައުރު ނިމެންދެން ނިންމާލުމުގެ ބުއްދި ހުރީސް ކަމަށެވެ. ހަމަ މިއާއިއެކު ބޮޑު ތާއީދަކާއިއެކު އެމްޑީޕީގެ ރައީސްގެ މަޤާމުގައި ހުންނަވައި މަޖިލީހުގެ ރައީސްކަން ލިބުމުން ދައުރު ނިމެންދެންވެސް މަޖިލިސްގެ ރައީސްގެ ގޮޑީގައި އިންނަވަން އުނގުނީސް ކަމަށެވެ. ނަމަވެސް ފެނިގެންދަނީ މިކަންކަމާއި މުޅިން ޚިލާފަށް ސިކުޑީގެ ބޭނުން ނުކުރައްވާތަން ކަމަށް ރޮޒޭނާ ވިދާޅުވިއެވެ.
ރައީސް ނަޝީދުގެ ސިކުޑިއެއް އިނދެގެން އެބޭނުން ކުރަން އެނގޭނަމަ ވެރިކަމުގެ ފަސް އަހަރުގެ ދައުރެއް ނިންމާނެ ބުއްދި ހުރީސް! މަޖިލިސްގެ ރައީސް ކަން ދިނީމަ ތިމާގެ އިތުބާރު 5 އަހަރު ވަންދެން ހިފަހައްޓާނެ ބުއްދި ހުރީސް! އެމްޑީޕީގެ ޢާންމު މެމްބަރުންގެ އިތުބާރު ހިފެހެއްޓުނީސް.
– ރޮޒޭނާ ވިދާޅުވިއެވެ.
ރައްޔިތުންގެ މަޖިލީހުގެ ރައީސް ކަމުގެ މަޤާމުންނާއި، ނައިބް ރައީސް ކަމުގެ މަޤާމުން ރައީސް ނަޝީދާއި، އީވާ ވަކި ކުރަން އެމްޑީޕީގެ މެމްބަރުން ވަނީ މަޖިލީހަށް ހުށަހަޅާފައެވެ. ނަމަވެސް މިމައްސަލަތައް މަޖިލީހުގައި ކުރިއަށް ނުގެންދަން މަސައްކަތް ކުރާތީ އެމްޑީޕީން ދަނީ ވަރަށް ބޮޑަށް ކަންބޮޑުވުން ފާޅު ކުރަމުންނެވެ.
މަޖިލީހުގެ ރައީސް މުހައްމަދު ނަޝީދާއި، މަޖިލީހުގެ އިދާރާއިން ބުނެފައިވަނީ މިމައްސަލަތައް ކުރިައށް ގެންދެވޭނީ މަޖިލީހުގެ ކޮމެޓީތައް އެކުލަވާލެވިގެން ކަަމަށެވެ. ނަމަވެސް މަޖިލީހުގެ މެޖޯރިޓީ ޕާޓީ އެމްޑީޕީން ބުނަމުންދަނީ، ކޮމެޓީތައް އުވާލާފައިވާ މަޖިލިސް ހުއްޓުވާފައި ނުބޭއްވޭނެކަމަށެވެ. އަދި މިފެށޭ ހަފްތާއިން ފެށިގެން ކޮމެޓީތަކުގެ މަސައްކަތް ފެށުމަށް އެމްޑީޕީގެ ބައެއް މެމްބަރުން ދަނީ މަސައްކަތް ކުރައްވަމުންނެވެ.
