ރައްޔިތުންގެ މަޖިލިހުގެ ޕާޓީތަކުގެ ކޮމްޕޮޒިޝަނަށް އައިސްފައިވާ ބަދަލާއެކު، މަޖިލިހުބެ ކޮމިޓީތައް އަލުން ތަރުތީބު ކުރެވިފައި ނުވާތީ، ރައްޔިތުންގެ މަޖިލިހުގެ ނާއިބު ރައީސްކަމުގެ އީވާ ވަކި ކުރުމުގެ މައްސަލަ އެޖެންޑާ ކުރެވިފައި ނުވާކަން ރައްޔިތުންގެ މަޖިލިހުގެ އަމީން އާންމު ފާތުމަތު ނިއުޝާ މަޖިލިހުގެ މެމްބަރުންނަށް އަންގައިވިއެވެ/
އެމްޑީޕީގެ ގިނަ އަދަދެއްގެ މެމްބަރުން އެޕާޓީން ވަކި، އަލަށް އުފެއްދުމަށް މަސައްކަތް ކުރަމުންދާ ޑިމޮކްރޭޓްސް ޕާޓީއާއި ގުޅުމާއި ގުޅިގެން ރައްޔިތުންގެ މަޖިލުހުގެ ކޮމިޓީތައް އަލުން އަތުރަން ޖެހިފައިވާކަމަށް ވިދާޅުވެ މަޖިލިސް ރައީސް މުހައްމަދު ނަޝީދު މިހާރުވަނީ މަޖިލިހުގެ ހުރިހާ ކޮމިޓީތަކެއްގެ މަސައްކަތް ހުއްޓުވާލާފައެވެ.
އެހެންނަމަވެސް މި އުސޫލުން މަޖިލިހުގެ ކޮމިޓީތައް ހުއްޓުމަކަށް ގެނެވިދާނެކަމާމެދު އެމްޑީޕީގެ މެމްބަރުންނާއި އިދިކޮޅު މެމްބަރުންނާމެދު ޚިޔާލު ތަފާތުވެފައި ވަނިކޮށް، ނިއުޝާ މަޖިލިސް މެމްބަރުންނަށް ފޮނުއްވި ސިޓީއެއްގައި ވިދާޅުވެފައިވަނީ، ވިދާޅުވީ މަޖިލީހުގެ ސިޔާސީ ޕާޓީތަކަށް އައިސްފައިވާ ބަދަލާއި ގުޅިގެން މަޖިލީހުގެ ދާއިމީ ކޮމިޓީތަކުގައި މެންބަރުން ހިމެނޭ ގޮތް އަދިވެސް ފާސްކުރެވިފައި ނުވާކަމުގައެވެ. އެހެންކަމުން، ނާއިބު ރައީސް އީވާ ވަކިކުރުމުގެ މައްސަލައިގައި ކުރެވޭ ބަހުސްގައި މެމްބަރުން ވާހަކަ ދައްކަން ދެވޭ ވަގުތު މަޖިލީހުގެ ގަވައިދާ އެއްގޮތަށް އަދިވެސް ކަނޑަ އެޅިފައި ނުވާކަމަށްވެސް ނިއުޝާގެ ސިޓީގައި ވިދާޅުވެފައި ވެއެވެ.
ނިއުޝާގެ ސިޓީގައި ވިދާޅުވެފައިވަނީ، އެހެންކަމުން އެމައްސަލަ އެޖެންޑާ ކުރެވެން އަންނަނީ ނާއިބު ރައީސްކަމުން އީވާ ވަކި ކުރުމުގެ މައްސަލައިގައި ކުރެވޭ ބަހުސްގައި މެމްބަރުންނަށް ވާހަކަ ދައްކަން ދެވޭ ވަގުތު ކަނޑައަޅައި ނިމުމުން ކަމުގައެވެ.
މަޖިލިހުގެ ކޮމިޓީތައް ހުއްޓުމަކަށް އައިސް، އިވާ ނާއިބު ރައީސްކަމުން ވަކި ނުކުރެނޭކަމަށް ނަޝީދަށް ތާއީދުކުރާ ފަރާތްތަކުން ބުނަމުން އައިނަމަވެސް، ރައްޔިތުންގެ މަޖިލިހުގެ މެޖޯރިޓީ ލީޑަރު، އަދި އެމްޑީޕީގެ ޕާލަމެންޓްރީ ގުރޫޕުގެވެސް ލީޑަރު މުހައްމަދު އަސަލް ވިދާޅުވެފައިވަނީ މަޖިލިސް ދެން ކުރިޔަށް ދާނީ، ގަވާއިދުގައި ވާގޮތުގެމަތިން ނާއިބު ރައީސް މަގާމުން ދުރުކުރުމާމެދު ގޮތެއް ނިންމިގެން ކަމުގައެވެ.
އެހެންނަމަވެސް އަސްލަމް ވިދާޅުވެފައިވަނީ، މަޖިލިހުގެ އާންމު ކޮމިޓީއަކީ ދާއިމީ ކޮމިޓީއެއް ކަމަށާއި، އާންމު ކޮމިޓީގެ މެންބަރުން އެކޮމިޓީއިން ވަކިވެއްޖެނަމަ އަލުން އެކޮމިޓީއަށް މެންބަރުން އައްޔަން ނުކުރެވުމަކީ މަޖިލީހުގެ އަމީން އާންމުގެ މައްސަލައެއް ކަމަށެވެ.
އަދި އޭނާ ވިދާޅުވީ ކޮމިޓީއަށް މެންބަރުން ހަމަޖެއްސުމަށް މަޖިލީހުން އެހެން ގޮތަކަށް ފާސްނުކުރާހާ ހިނދަކު އެކޮމީޓީގެ މެންބަރުން އެކޮމިޓީގައި ދެމިތިބޭނެ ކަމުގައެވެ. އަދި ކޮމިޓީގެ މެންބަރުން ވަކިވާ ކަމަށް ވަނީނަމަ އަލުން އެ މެންބަރުން އައްޔަންކޮށް އިންތިހާބު ކުރުމަށް ބާއްވާ ބައްދަލުވުން ނުބޭއްވުމަކީ މަޖިލީހުގެ އަމީން އާންމުގެ މައްސަލައެއް ކަމަށްވެސް އަސްލަމް ވިދާޅުވިއެވެ.
މަޖިލިސް ރައީސް މުހައްމަދު ނަޝީދު ތުހުމަތު ކުރައްވާފައިވާ ގޮތުގައި، ރައްޔިތުންގެ މަޖިލީހަށް އެއް ވަގުތެއްގައި ރައިސްއާއި ނާއިބު ރައީސް މަގާމުން ދުރުކުރުމަށް ސަރުކާރުން ހުށަހަޅާފައިވަނީ، ސަރުކާރުން އަޑީގައި އޮވެގެން މަޖިލިހުގައި މަރުތަޅު އެޅުމުގެ ބޭނުމުގައެވެ.
