ކޮމިޓީތައް އެކުލަވާލެވި ކޮމިޓީތަކުގެ މަސައްކަތް ފެށުމުން ޗާގޯސްގެ މައްސަލައިގައި މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ ފޮނުއްވިކަމަށް ބުނާ ސިޓީފުޅު ހޯއްދެވުމަށް މަޖިލީހުގައި ހިމެނޭ އިދިކޮޅު މެމްބަރުން ރައީސް އޮފީހަށް ދިއުމުން، ސިޓީ ހިއްސާ ކުރެވޭނީ ރައްޔިތުންގެ މަޖިލީހުގެ 241 ކޮމެޓީއާއި ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެއެވެ.

ރައީސުލްޖުމްހޫރިއްޔާ ފޮނުއްވިކަމަށް ބުނާ ސިޓީފުޅު ހޯއްދެވުމަށް މަޖިލީހުގައި ހިމެނޭ އިދިކޮޅު މެމްބަރުން ވަނީ މިއަދު ރައީސް އޮފީހަށް ގޮސްފައެވެ. ރައީސް އޮފީހަށް ދިޔަ މެމްބަރުންގެ ތެރޭގައި ދަ ޑީމޮކްރަޓިކަށް ނިސްބަތްވާ މެމްބަރުންނާއި، ޕީޕީއެމް ޕީއެންސީގެ މެމްބަރުންނާއި، އެމްއެންޕީގެ މެމްބަރުން ހިމެނެއެވެ.

ރައީސް އޮފީހުން ނިކުތުމަށްފަހު ނޫސްވެރިންނާއި ވާހަކަ ދައްކަވަމުން އަލީ އާޒިމް ވިދާޅުވީ، މިމައްސަލާގައި އިދިކޮޅު ފަރާތްތަކުން ކަންބޮޑުވުން ފާޅު ކުރާތާ 8 މަސް ދުވަސް ވެއްޖެ ކަމަށެވެ. ރައީސް އޮފީހަށް ސިޓީ ހޯދަން ދިއުމުން ރައީސް އޮފީހުގެ ޗީފް އޮފް ސްޓާފް ވިދާޅުވީ ސިޓީ ހިއްސާ ކުރެވޭނީ މަޖިލީހުގެ 241 ކޮމެޓީއާއިކަމަށް ވިދާޅުވި ކަމަށެވެ.

މިމައްސަލާގައި ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވީ، މިމައްސަލާގައި ސިޓީ ހޯދަން އެދުމުން ރައީސް އޮފީހުގެ ޗީފް އޮފް ސްޓާފް ވިދާޅުވީ މޮރިޝަސްގެ ބޮޑުވަޒީރަށް ސިޓީ ފޮނުވާފައިވާކަމަށެވެ. ޝިޔާމް ވިދާޅުވީ ސިޓީ ހޯދަން ދިޔައީ ބޮޑު ދައުތަލެއްގައި ސިޓީގެ ކޮޕީއެއް އޮންނާނެ ކަމަށް ބަލައިގެން ކަމަށާއި، އަނެތްކަމަށް ހަދައިގެން ނެތް އެއްޗަކަށް ހެދުމަކީ ގަބޫލު ކުރެވޭނެ ކަމެއް ނޫންކަމަށެވެ.

ކޮމިޓީތައް އެކުލަވާލެވި ކޮމިޓީތަކުގެ މަސައްކަތް ފެށުމުން ޗާގޯސްގެ މައްސަލައިގައި މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ ފޮނުއްވިކަމަށް ބުނާ ސިޓީފުޅު ހޯއްދެއްވުމަށް 241 ކޮމެޓީން އެދޭނެ ކަމުގައި އެކޮމެޓީގެ މުޤައްރިރު މުހައްމަދު އަސްލަމް އިއްޔެ ވަނީ ވިދާޅުވެފައެވެ.