ރައްޔިތުންގެ މަޖިލީހަށް ހުށަހެޅިފައިވާ ބަންޑާރަ ނައިބުގެ އިތުބާރު ނެތް މައްސަލަ ކުރިއަށް ގެންގޮސް ވަކި ގޮތަކަށް ނުނިމެނީސް މަޖިލީހުގެ އެޖެންޑާއިންވެސް ނަގައިފިއެވެ.
ރައްޔިތުންގެ މަޖިލީހުގެ އިއްޔެއާއި، މިއަދުގެ ޖަލްސާއަށްވެސް މިމައްސަލަ އެޖެންޑާ ކުރައްވާފައިވުމުން ބަންޑާރަ ނައިބު ވަނީ މަޖިލީހަށް ވަޑައިގެންފައެވެ. ނަމަވެސް މަޖިލީހުގައި މިމައްސަލަ ކުރިއަށް ނުގެންދެވި ދެދުވަހުވެސް ވަނީ ޖަލްސާ ހުއްޓާލާފައެވެ. މަޖިލީހުގެ ރިޔާސަތުގައި ނަޝީދު އިންނަވައި، އޭޖީ ރިފްއަތުގެ އިތުބާރު ނެތް ކަމަށް ހުށަހެޅި ވޯޓާ ގުޅިގެން، ގާނޫނާ ޚިލާފަށް އަމަލުކުރައްވާފައިވާ ކަމަށް ވިދާޅުވެ އެމަނިކުފާނު ރިޔާސަތުން ދުރުކުރަން އެމްޑީޕީގެ ޕާލަމަންޓްރީ ގްރޫޕުން މިއަދު ވަނީ ފާސްކޮށްފައެވެ.
ބަންޑާރަ ނައިބު މަޖިލީހަށް ހާޒިރުވެ އިންނަވައި މައްސަލަ ކުރިއަށް ނުގެންދެވުމުން، އެކަމުގެ ކަންބޮޑުވުން އެމްޑީޕީގެ ގިނަ މެމްބަރުން ވަނީ ފާޅުކޮށްފައެވެ. މިމައްސަލަ މަޖިލީހުގައި ނުނިމެނީސް މާދަމާ އޮތް މަޖިލީހުގެ ޖަލްސާގެ އެޖެންޑާއިންވެސް މިމައްސަލަ ވަނީ ބޭރުކޮށްލާފައެވެ.
މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ މާދަމާ މަޖިލީހަށް ހުށަހަޅާއިރު، މިމައްސަލަ މަޖިލީހުގައި ކުރިއަށް ގޮސްދާނެތޯ ގިނަ ބައެއްގެ ހިތުގައިވަނީ ސުވާލު އުފެދިފައެވެ. ސަބަބަކީ މަޖިލީހުގެ ރައީސްގެ މައްސަލަ ކުރިއަށް ގެންދަވާނީ މަޖިލީހުގެ ނައިބް ރައީސް ކަމަށް މަޖިލީހުގެ ގަވާއިދުގައި ބުނެފައިވާއިރު، މަޖިލީހުގެ ނައިބް ރައީސްކަމުގެ މަޤާމުން އީވާ އަދި ވަކި ކުރެވިފައި ނުވެއެވެ. މިވަގުތު މަޖިލީހުގެ ކޮމެޓީތައްވެސް އެކުލަވާ ނުލެވި އޮތްއިރު، އިތުބާރު ނެތް މައްސަލައެއް ކުރިއަށް ގެންދެވޭނީ ޢާންމު ކޮމެޓީން އެކަމަށް ވަގުތު ކަނޑައަޅައި ކުރިއަށް ގެންދާނެ ގޮތެއް ނިންމުމުންނެވެ.
މިހުރިހާ ކަމަކަށް ބަލާއިރު މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ކުރިއަށް ގެންދަން މަޖިލީހުގެ ރިޔާސަތުން ޖާގަ ދީފާނެކަމަށް ނުލެބެއެވެ. މާދަމާގެ ޖަލްސާއަށްވެސް އެޖެންޑާކުރައްވާފައި އޮތް ފުރަތަމަ މައްސަލައަކީވެސް އެމަނިކުފާނު އިސްވެ ހުންނަވައިގެން އުފައްދަވާ ދަ ޑިމޮކްރެޓްސްގެ މެމްބަރުންނަށް ބިރު ދައްކާ މައްސަލާގައި ހުށަހެޅިފައިވާ މައްސަލައަށް ބަހުސް ކުރުމެވެ.
އެމްޑީޕީގެ ޕީޖީ ގްރޫޕްގެ ލީޑަރު މުހައްމަދު އަސްލަމް ވިދާޅުވީ ރައީސް ނަޝީދުގެ އިތުބާރު ނެތްކަމުގެ މައްސަލާގައި، އެމްޑީޕީއަށް ކާމިޔާބު ވާނެކަމުގެ ފުރިހަމަ ޔަގީންކަން އޮތް ކަމަށެވެ. އަދި މިމައްސަލާގައި މެމްބަރުން ތިއްބެވީ މަޖިލިސް ހުއްޓުމަށް ގެނެސް މަޖިލީހުގެ ކޮމެޓީތައް ހުއްޓިފައި އޮތް އޮތުން ނިމުމަކަށް ގެނައުމަށް ތައްޔާރަށް ކަމަށެވެ.
