އެމްޑީޕީގެ ޕާލަމެންޓްރީ ގުރޫޕުން ނިންމައިފި ނަމަ، ރައްޔިތުންގެ މަޖިލީހުގެ ރައީސް ކަމުގެ މަގާމާ ހަވާލުވާން ތައްޔާރަށް ހުންނެވި ކަމަށް އެ ގުރޫޕުގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް މިއަދު ވިދާޅުވެއްޖެއެވެ.
މަޖިލިހުގައި މެދުނުކެނޑި 19 ވަނަ އަހަރު ގުނަމުން ގެންދަވާ އެންމެ ތަޖުރިބާކާރު އެއް މެމްބަރު އަސްލަމް އެހެން ވިދާޅުވީ، ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައެއް ހުށަހަޅަން އެމްޑީޕީގެ ޕާލަމެންޓްރީ ގުރޫޕުން ފާސްކުރުމަށް ފަހު ބޭއްވި މީޑިއާ ބްރީފިންއެއްގައެވެ.
ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމުގައި އަސްލަމް ވަނީ, އޭނާ އެމަގާމަށް ވަޑައިގަތުމާ މެދު ވާހަކަ ދައްކަން އަދި އަވަސް ކަމަށް ވިދާޅުވެފައެވެ.
ސާފު ޖަވާބެއް ނުދެއްވި ނަމަވެސް އަސްލަމް ވަނީ އެ މަގާމާ ހަވާލުވުމަށް ތައްޔާރަށް ހުންނެވި ކަމުގެ އިޝާރާތެއް ދެއްވާފަ އެވެ. އަސްލަމްއަށް މަޖިލީހުގެ ރައީސްކަން ދިނުމަށް ނިންމާފައިވާ ކަމަށް ބުނެ މަޖިލިސް 19 އިންތިހާބުވި ދުވަސްވަރު ވެސް އަޑުތަކެއް ފެތުރުނެވެ. އެކަމަކު, އޭނާ ވެވަޑައިގެންނެވީ އެ ޕާޓީގެ ޕީޖީ ލީޑަރަށެވެ.
އެކަމާ ގުޅޭގޮތުން ވަކި ގޮތަކަށް ނުވިސްނަން. ދެން ޕާލިމެންޓަރީ ގްރޫޕުން ނިންމަވާނީ. ޕާލިމެންޓަރީ ގްރޫޕުން އެފަދަ ނިންމުމެއް ނިންމަވައި ހަވާލުކުރަން ނިންމައިފިއްޔާ އަޅުގަނޑުގެ ހިތުގެ އަޑިން ގަބޫލުކުރާނަން.
– އަސްލަމް ވިދާޅުވިއެވެ.
އަސްލަމް ވިދާޅުވިގޮތުގައި، ޑިމޮކްރަސީ ކުރިއަރުވައި އިސްލާހަށް ލޯބިކުރައްވާ ބޭފުޅެއްގެ ގޮތުގައި ނަޝީދަށް އިހްތިރާމް ކުރެއްވި ނަމަވެސް އެ މަނިކުފާނުގެ ފަރާތްޕުޅުން އެ ސިފަ މިހާރު ގެއްލިއްޖެއެވެ. ނަޝީދުގެ އަމަލުތައް މިހާރު ފެންނަނީ ޑިމޮކްރަސީއާ ދުރު، އަމިއްލަ މަންފާ އަށް ގާނޫނުތަކާއި ގަވައިދުތައް މުގުރާލާ ތަން ކަމަށް ވިދާޅުވިއެވެ.
އަސްލަމް ވިދާޅުވީ، ނަޝީދު ރިޔާސަތުގައި އިންނަވައިގެން މަޖިލިސް ކުރިއަށް ގެންދަވަނީ "ޗަރުކޭހެއްގެ" ގޮތުގައި ކަމަށެވެ. ރިޔާސަތުން އަމަލުކުރަނީ ހިތު ހުރި ގޮތަކަށް ކަމަށާއި ގާނޫނާއި ގަވައިދުތައް މާނަކުރައްވަނީ ނަޝީދު ބޭނުންފުޅުވާ ގޮތަކަށް ކަމަށް ވެސް އަސްލަމް ވިދާޅުވިއެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލިހުގެ ރައީސަކަށް އަސްލަމް ކަނޑައަޅަން ނަޝީދު އެންމެ ފުރަތަމަ މަސައްކަތްޕުޅު ކުރެއްވިއެވެ. އެކަމަކު، އުފެދުނު ސިޔާސީ އޮއިވަރެއްގައި އެ ނިންމުން ބަދަލުކުރައްވައި މަޖިލިހުގެ ރައީސްކަމަށް ނަޝީދު ކުރިމަތިލައްވައި އޭނާ ހޮވީ އެވެ. ނަޝީދުގެ އިތުބާރު ނެތް ކަމުގެ މައްސަލަ ވައްދަން އެމްޑީޕީގެ ޕާލަމަންޓްރީ ގްރޫޕުން ފާސްވީ އަސްލަމް ވިދާޅުވި ގޮތުގައި ބައްދަލުވުމުގައި ބައިވެރިވެވަޑައިގަތް އެ ޕާޓީގެ 36 މެމްބަރުންގެ ވޯޓާ އެކުގައެވެ. އެ ޕާޓީގައި 56 މެމްބަރުން ތިއްބެވިއިރު، އަޣުލަބިއްޔަތު މި މައްސަލައަށް ލިބޭނެ ކަމުގެ ޔަގީންކަން އޭނާ ދެއްވިއެވެ.
