މީހަކަށް ދުވާލަކު އެންމެ ގިނައިން ނެގޭނެ ނަގުދު ފައިސާގެ މިންވަރަކީ 200،000 ރުފިޔާ ކަމަށް ކަނޑައެޅުމަށް މަރުކަޒީ ބެންކު އެމްއެމްއޭ އިން ނިންމައިފި އެވެ.
އެމްއެމްއޭގެ ސްޕޯކްސް ޕަރސަން، މުޙައްމަދު ނާސިހު ޚަބަރު އޮންލައިނަށް ވިދާޅުވީ މި މަހުގެ 31 ވަނަ ދުވަހުން ފެށިގެން މި ބަދަލު ގެންނަން ނިންމާފައި ވަނީ ނަގުދު ފައިސާ ގެންގުޅޭ މިންވަރު ދައްކުރުމަށާއި ޑިޖިޓަލް ކޮށް ފައިސާގެ މުޢާމަލާތް ހިންގުމަށް ހިތްވަރު ދިނުމުގެ ގޮތުން ކަމަށެވެ.
އަދި މި ބަދަލުގެ ސަބަބުން ވިޔަފާރިތަކަށް ނަގުދު ފައިސާ ބޭނުންކުރުމުގައި ދިމާވާ ނުރައްކަލާއި ރިސްކު ކުޑަކުރެވޭނެ ކަމަށް ނާސިހް ވިދާޅުވިއެވެ. މިއީ އިލެކްޓްރޯނިކް ޓްރާންސެކްޝަންތައް އިތުރުކުރުމަށް އެޅޭ ބާރަކަށް ވެގެންދާނެ ކަމަށް ނާސިހް ވިދާޅުވި އެވެ.
އެކަކަށް އެންމެ ގިނައިން ނެގޭނެ ނަގުތުފައިސާގެ އަދަދު ރާއްޖޭގައި ކަނޑައަޅާ މިއީ ފުރަތަމަ ފަހަރެވެ.
ގިނަ އަދަދެއްގެ ނަގުދު ފައިސާ އަތުގައި ގެންގުޅުމާއި އެއްތަނުން އަނެއްތަނަށް އުފުލުމުގައި މީގެ ކުރިން ގިނަ ހާދިސާތަކެއް ހިނގާފައި އެބަހުއްޓެވެ. އެގޮތުން ދާދިފަހުން ރޫޓް ފިހާރައިން ބެންކް އޮފް ސިލޯނަށް ޖަމާކުރަން ގެންދިޔަ ގިނަ އަދަދެއްގެ ނަގުދު ފައިސާ ފޭރެން މަސައްކަތް ކުރި ހާދިސާ ފާހަގަކޮށްލެވެއެވެ.
