އައްޑޫ ސިޓީން ރައީސަށް ހޫނު މަރުހަބާއެއް

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އައްޑޫ ސިޓީއަށް ކުރައްވާ ތިން ދުވަހުގެ ރަސްމީ ދަތުރުފުޅެއް މިއަދު އެސިޓީއަށް ވަޑައިގެންނެވުމުން އެމަނިކްފާނަށް އެސިޓީން ހޫނު މަރުހަބާއެއް ދަންނަވައިފިއެވެ. ސަރުކާރުގެ މަތީ ފެންވަރުގެ ވަފުދަކައެކު ރައީސް މިއަދު އައްޑޫ ސިޓީއަށް ވަޑައިގެންނެވުމުން، އެމަނިކުފަނަށް މަރުހަބާ ދެންނެވުމަށް ގިނަ އަދަދެއްގެ ބަޔަކު ވަނީ މިއަދު އެއަތޮޅު މަރަދޫއަށް ހާޒިރުވެފައެވެ.

ރައީސަށް މަރުހަބާ ދެންނެވުމަށް އެއްވީ ގިނަ މީހުން ވެރިކަންކުރާ އެމްޑީޕީގެ ދިދަ ހިފައިގެން ތިބިއިރު، ރައީސަށް މަރުހަބާ ކިޔުމަށް ދަމާލާފައި އޮތް ސަފުގައި ތިބި މީހުންނާއި ސަލާމްކޮށް އަދި ފޮޓޯ ނެގުމަށް 45 މިނިޓެއްހާއިރު ވަނީ ހޭދަ ވެފައެވެ. މައުލޫމާތު ލިބިފައިވާ ގޮތުގައި ރައީސަށް މަރުހަބާ ދެންނެވުމަށް އައްޑޫގެ އެކި ރަށްތަކުންނާއި ފުވައްމުލަކު ސިޓީންވެސް މީހުން މަރަދޫއަށް ދަތުރު ކޮށްފައި ވެއެވެ.

މިގޮތުން މިއަދު ރައީސަށް މަރުހަބާ ދެންނެވުމަށް މަރަދޫއަށް އެކި ރަށްތަކުން ދަތުރު ކޮށްފައިވާ މީހުންގެ އަދަދު 1،000 އަރާނެކަމަށްވެސް މައުލޫމާތު ލިބިފައި ވެއެވެ.

އައްޑޫ ސިޓީގެ ތަރައްޤީއަށް ބޮޑެތި ބަދަލުތަކެއް ގެނައުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. މި ބަދަލުތަކާއެކު އައްޑޫ ސިޓީއަކީ ސަރަޙައްދީ އިޤްތިޞާދުގެ މައި ހަބަކަށް ބަދަލުވެ، އޭގެ އެތަކެއް ފައިދާތަކާއި މަންފާއެއް ރައްޔިތުންނަށް ލިބިގެންދާނެކަމަށް ސަރުކަރުން އުއްމީދު ކުރެއެވެ.

ރައީސުލްޖުމްހޫރިއްޔާގެ މި ދަތުރުފުޅުގައި އައްޑޫ ސިޓީގެ ތަރައްޤީއަށް ހިންގޭ ބައެއް މަޝްރޫޢުތައް ފަށްޓަވައި ދެއްވައި، އަދި މިހާރު ކުރިޔަށްދާ ބައެއް މަޝްރޫޢުތަކުގެ މަސައްކަތްތައް ބައްލަވައި ލައްވާނެއެވެ. މިގޮތުން، އައްޑޫ ސިޓީގެ ބިން އިތުރުކުރުމުގެ މަޝްރޫޢު ފެށުމުގެ ރަސްމިއްޔާތާއި، ގަން އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢު ފެށުމުގެ ރަސްމިއްޔާތުގައި ރައީސުލްޖުމްހޫރިއްޔާ ބައިވެރިވެވަޑައިގަންނަވާނެއެވެ.

އަދި، އައްޑޫ ސިޓީގައި މިހާރު ކުރިޔަށްދާ ބޮޑެތި އެހެން މަޝްރޫޢުތަކުގެ ތެރެއިން، އައްޑޫ ސިޓީގެ މަގުތައް ހެދުމުގެ މަޝްރޫޢުގެ މަސައްކަތްތައް ކުރިޔަށްދާގޮތް އެމަނިކުފާނު ބައްލަވައި ލައްވާނެއެވެ. މީގެ އިތުރުން އައްޑޫ ސިޓީ ހުޅުދޫގައި ހުންނަ، ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރިހެބިލިޓޭޝަން ސެންޓަރަށް ވެސް އެމަނިކުފާނު ޒިޔާރަތްކުރައްވާނެއެވެ.

ރައީސުލްޖުމްހޫރިއްޔާ އައްޑޫ ސިޓީއަށް ކުރައްވާ މި  ދަތުރުފުޅުގައި، އައްޑޫ ސިޓީކައުންސިލާއި، އ.ތ.މ ކޮމިޓީއާއި ބައްދަލުކުރެއްވުމުގެ އިތުރުން، އައްޑޫ ސިޓީގެ ރައްޔިތުންނާއިއެކު ރޭގަނޑުގެ ފަރިއްކޮޅެއްގައި ބައިވެރިވެވަޑައިގަންނަވާނެއެވެ.