ކ. ދިއްފުށީ ބިން ހިއްކުމާއި ގިރާ ސަރަޙައްދުގެ މަސައްކަތް 169 މިލިއަން ރުފިޔާއަށް އެމް.ޓީ.ސީ.ސީއާއި ހަވާލްކޮށްފިއެވެ.
މި މަސައްކަތް އެމްޓީސީސީއާއި ޙަވާލުކޮށްފައިވަނީ 450 ދުވަހުން މަސައްކަތް ނިންމާގޮތަށެވެ.
މި މަޝްރޫޢުގެ ދަށުން ދިއްފުށީގައި 22.97 ހެކްޓަރުގެ ބިން ހިއްކުމާއި، ހިއްކާ ސަރަހައްދުގެ ގޮނޑުދޮށް ޙިމާޔަތްކުރުމުގެ ގޮތުން 710 މީޓަރުގެ ބޮޑު ހިލައިގެ ރިވެޓްމަންޓެއް ޖެހުން ހިމެނެއެވެ.
އަދި 670 މީޓަރުގެ ބޮޑުހިލައިގެ ގްރޮއިން ޤާއިމުކުރެވިގެންދާނެއެވެ. ހަމައެހެންމެ 270 މީޓަރ ބޮޑު ހިލައިގެ ގްރޮއިންއާއި 300 މީޓަރުގެ ރިވެޓްމަންޓް މަރާމާތުކުރުންވެސް މި މަޝްރޫޢުގެ ތެރޭގައި ހިމެނެއެވެ.
މީގެ އިތުރުން އައްޑޫ ސިޓީ ފޭދޫ ބަނދަރު އަޕްގްރޭޑްކުރުމުގެ މަސައްކަތް ވެސް ވަނީ އެމްޓީސީސީއާއި ހަވާލްކޮށްފައެވެ.
މި ޕްރޮޖެކްޓް ސްކޯޕަށް ބަލާއިރު، 75،398 ކިއުބިކް މީޓަރުގެ ބަނދަރު ފުންކުރުމާއި، 5320 މީޓަރުގެ ނެރު ފުންކުރުމާއި، ސޭންޑްފިލް ބްރޭކްވޯޓަރ ޖެހުން ހިމެނެއެވެ. އަދި 20 މީޓަރުގެ ސަބްމާރޖްޑް ބްރޭކްވޯޓަރއެއް ޖެހުމާއި، 157 މީޓަރުގެ ރިވެޓްމަންޓް ޖެހުމާއި، 93 މީޓަރުގެ ކީވޯލް ޖެހުމާއި، 93 މީޓަރުގެ ސްކޮޔަރ އޭޕްރަންޖެހުމާއި، 24 މޫރިން ރިންގ ހަރުކޮށް، 20 މޫރިން ބޮއި ހަރުކުރުން ހިމެނެއެވެ.
މީގެ އިތުރުން އެކްސެސް ޕްލެޓްފޯމެއް ހެދުމާއި، 2 ކޮންކްރީޓް ބްރިޖް ހެދުމާއި 35 މަގުބަތި ހަރުކުރުމާއި، 2040 އަކަމީޓަރުގެ ކޮންކްރީޓް ޕޭވްމަންޓް ހެދުންވެސް ހިމެނެއެވެ. މި މަޝްރޫޢަށް ޖުމްލަ 79.8 މިލިއަން ރުފިޔާ ޚަރަދުވާއިރު، މަޝްރޫޢު ނިންމުމަށް އެމް.ޓީ.ސީ.ސީއަށް ދީފައިވަނީ 540 ދުވަހުގެ މުއްދަތެކެވެ.
