ހެންވޭރު އާޓިފިޝަލް ބީޗު ސަރަހައްދުގައި ހުރި އެމްޑީޕީގެ ހަރުގޭގެ ތަޅު ހުޅުވާ، ނަޝީދަށް ތާއީދުކުރާ ފަރާތްތަކުން އެހަރުގޭގައި "ދަ ޑިމޮރެޓްސް"ގެ ސިޔާސީ ހަރަކާތްތައް ހިންގާ ފަށައިފިއެވެ.
އެތައް އަހަރެއް ވަންދެން އެމްޑީޕީން ސިޔާސީ ހަރާކަތްތައް ހިންގަމުން އައި އެޕާޓީގެ ހަރުގެ ނަޝީދު އަލަށް އުފައްދާ "ދަ ޑިމޮކްރެޓްސް" ޕާޓީން ބޭނުން ކުރާން ފަށާފައި މިވަނީ އެމްޑީޕީގެ މައި ހަރުގެ ހިންގަމުން އައި މިބިން ހުސްކުރަން އެ ބިމުގެ ވެރިފަރާތުން އެންގުމާ ގުޅިގެން އެ ޕާޓީން އެތަން ދޫނުކުރުމަށް ސިވިލް ކޯޓަށް މައްސަލައެއް ހުށަހަޅާފައި ވަނިކޮށެވެ.
މިއަދު ހަވީރު ނަޝީދަށް ތާއީދުކުރާ ފަރާތްތަކުން ވަނީ ހަރުގޭގައި އަޅުވާގައި ހުރި ތަޅު، ހަރުގޭގެ ތަޅުދަނޑި ބޭނުން ކޮށްގެން ހުޅުވާފައެވެ. ތަޅު ހުޅުވާފައިވަނީ "ދަ ޑިމޮކްރެޓްސް" ޕާޓީ އުފެއްދުމަށް އިސްކޮށް މަސައްކަތް ކުރަމުންދާ، އެސްޓީއޯގެ ކުރީގެ އެމްޑީ ހުސެއިން އަމްރެވެ. އެއަށްފަހު ހަރުގޭގައި ދަމާފައި ހުރި އެމްޑީޕީގެ ޕޯސްޓަރުތައް ނައްޓާ، ހަރުގޭގައި ހުދުކުލަވެސް ވަނީ ލާން ފަށާފައެވެ.
އެމްޑީޕީގެ ހަރުގެ ހިންގަމުން އައި ބިމުގެ ވެރިފަރާތަކީ އެމްޑީޕީގެ ކުރީގެ އެކްޓިވިސްޓެއް ކަމަށްވާ ޝަފިއްޔާ ޒުބައިރެވެ.
ހަރުގޭގެ މައްސަލަ ކޯޓަށްވެސް ހުށަހަޅާފައިވަނިކޮށް، ޑިމޮކްރޭޓްސްގެ ހަރުގެ ހުޅުވުމަށް މިއަދު ހަވީރު ނޫސްވެރިންނަށް މި ސަރަހައްދަށް ދައުވަތުވެސް ދީފައި ވެއެވެ. ނޫސްވެރިންނާއި ވާހަކަ ދައްކަވަމުން ޝަފިއްޔާ ބުނީ އޭނާ އެބިން ކުއްޔަށް ދީފައިވަނީ ވިޔަފާރި ވެރިޔަކަށް ކަމަށާއި، އެ ވެރިޔަފާރިވެރިޔާއަށް އެބިން އެހެން ފަރާތްތަކަށް ކުއްޔަށް ދިނުމުގެ އިޚްތިޔާރު އޮތް ކަމުގައެވެ.
ދަ ޑިމޮކްރެޓްސްއިން ބުނެފައިވަނީ އެ ޕާޓީން އެބިން ނަގާފައިވަނީ ބިން ކުއްޔަށް ހިފި ވިޔަފާރި ވެރިޔާއާއިއެކު ހެދި ސަބްލީސް އެއްބަސްވުމެއްގެ ދަށުން ކަމުގައެވެ.
މި ތަނަށް އެހެން ޕާޓީގެ ބަޔަކު އައުމަކީ އަޅުގަނޑުމެން ބަލަން ޖެހޭ ކަމެއް ނޫން، އަޅުގަނޑުމެން މި ތަން ކުއްޔަށް ދިނީ ވިޔަފާރިވެރިޔަކަށް، ޑިމޮކްރެޓްސްއިން ދެން ސާފުކުރުން ރަނގަޅު، ސަބްލީޒަށް ކުއްޔަށް ނެގީތޯ.
ބިން ކުއްޔަށް ދިނުމަށް ކޮށްފައިވާ މުއާމަލާތާއި ގުޅޭގޮތުން ޝަފިއްޔާ ބުންޏެވެ.
ހަރުގެ ހުސްކުރަން އެނގި މައްސަލާގައި އެމްޑީޕީން ސިވިލް ކޯޓަށް މައްސަލަ ވެއްދީ, އެތަނުގައި ހަރުގެ ހިންގުމަށް ހެދި އެއްބަސްވުމުގެ ދަށުން އެމްޑީޕީގެ ހައްގުތަކަށް އުނިކަން އަންނާތީ ކަމަށް ބުނެއެވެ. ނަމަވެސް އެ އެއްބަސްވުމުގެ މުއްދަތު އޮތީ ހަމަވެފައެވެ. އެ މައްސަލަ ސިވިލް ކޯޓުން ވަނީ ތާވަލްވެސް ކޮށްފައެވެ.
ހެންވޭރު އާޓިފިޝަލް ބީޗު ކުރިމަތީގައި އެމްޑީޕީން ހަރުގެ ހިންގަމުން އަންނަ ބިން ހުސްކުރަން އެ ޕާޓީއަށް ނޯޓިސް ދިނީ ފާއިތުވި އޭޕުރީލު މަހުގައެވެ. އޭގެ ފަހުން އެ ނޯޓިސްއާ އެއްގޮތަށް ހަރުގެ ހުސްނުކޮށް ލަސްކުރަމުންދަނިކޮށް އެއްބަސްވުން ބާތިލުކޮށް އެހެން ފަރާތަކަށް އެ ބިން ކުއްޔަށް ދިނުމަށް ގޭގެ ވެރިފަރާތުން ނިންމާފައިވާކމަަށް ބައެއް ނޫސްތަކުގައި ރިޕޯޓުކޮށްފައިވެއެވެ.
ބިން ހުސްކުރަން އަންގާފައިވީ ނަމަވެސް މިހާތަނަށްވެސް އެމްޑީޕީން އެކަން ކޮށްފައިނުވެއެވެ. އެމްޑީޕީ ތެރޭގައި ދެ ފެކްޝަން އުފެދި, ކޯޅުން ބޮޑުވެފައި ވަނިކޮށް ޕާޓީގެ މައި ހަރުގެ ހުސްކުރަން އެންގީ މިދިޔަ މާޗް މަހު އެވެ. އެއީ އެމްޑީޕީގެ ރިޔާސީ ޕްރައިމަރީން ރައީސް ނަޝީދު ނާކާމިޔާބުވެވަޑައިގެންނެވި ފަހުންނެވެ.
އެމްޑީޕީން މީގެ ކުރިން ބުނެފައިވާ ގޮތުގައި އެ ޕާޓީގެ ހަރުގެ ހިންގަން ހަދާފައިވާ އެއްބަސްވުމުވެ މުއްދަތު ހަމަވެފައި އޮތް ނަމަވެސް, އަންނަ ރިޔާސީ އިންތިހާބު ނިމެންދެން އެތަނުގައި ތިބެވޭނެ ކަމަށް ވެރިފަރާތުން ބުނެފައިވާ ކަމަށެވެ.
ކޮމެންޓު ފޮނުވާ