ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ވަފާތެރި މެންބަރުން އިސްވެ ތިއްބަވައިގެން އުފައްދަވަން މަސައްކަތް ކުރައްވަމުންދާ ދަ ޑިމޮކްރެޓްސްއަށް ފިނޭންސް މިނިސްޓަރ އިބްރާހިމް އަމީރުގެ އުފަން ރަށް ގދ.ގައްދޫއިން 100 މީހުން ސޮއިކޮށްފިއެވެ.
ދަ ޑިމޮކްރެޓްސް ޕާޓީ އުފެއްދުމުގެ ހުއްދަ އިލެކްޝަން ކޮމިޝަން(އީސީ)ން ދިނުމާއިއެކު ދަނީ ޕާޓީ އުފެއްދުމަށް ބޭނުންވާ 3،000 މީހުންގެ ސޮއި ހޯދުމުގެ މަސައްކަތް ކުރަމުންނެވެ. ދަ ޑިމޮކްރަޓްސްއަށް މިހާތަނަށް ލިބުނު ފޯމުތަކުގެ އަދަދެއް ހާމަ ނުކުރި ނަމަވެސް ގިނަ އަދަދެއްގެ ބަޔަކު ވަނީ ފޯމު ފުރާފައެވެ.
ފޯމު ހަމަކުރުމަށް މުޅި ރާއްޖޭގެ ކުރިއަށްގެންދާ ކެމްޕެއިންގެ ތެރެއިން މިނިސްޓަރ އަމީރުގެ އުފަންރަށް ގައްދޫއިން ވަނީ 100 ފޯމު މިރޭ ޕާޓީ އުފެއްދުމުގައި އިސްކޮށް ހަރަކާތްތެރިވާ ރައްޔިތުންގެ މަޖިލީހުގެ ނައިބް ރައީސް އީވާ އާއި ހަވާލުކޮށްފައެވެ. އިވާއާއި ފޯމު ހަވާލުކުރީ އެދާއިރާގެ މެމްބަރު އަހުމަދު ޒާހިރުއެވެ.
Handed 100 Democrats from Gadhdhoo for registration #thedemocratsmv #WeTheDemocrats #FikureggeDhirun pic.twitter.com/NOVo5Mg1cY
— Ahmed Zahir (@ahmedzahirjr) May 27, 2023
ގައްދޫ ދާއިރާގެ މެމްބަރާއި، މިނިސްޓަރ ވަޒީރަކީ ސިޔާސީ ގޮތުން ވަރަށް ޚިޔާލްތަފާތު އަދި އެއްޕާޓީއެއްގައި މަސައްކަތް ކުރެއްވިއިރުވެސް މާބޮޑު ގުޅުމެއް ނޯންނަ ދެބޭފުޅުންނެވެ. ގައްދޫއިން ގިނަ އަދަދެއްގެ ބަޔަކު ރައީސް ނަޝީދު އިސްކޮށް ހުންވައިގެން އުފައްދަވާ ދަ ޑިމޮކްރެޓްސް އަށް ސޮއި ކުރުމަކީ ލިބުނު ވަރަށް ބޮޑު ހިންހަމަ ޖެހުމެއްކަމަށް މަޖިލިސް ނައިބް ރައީސް އީވާ ވަނީ ވިދާޅުވެފައެވެ.
ނަޝީދު "ފިކުރެއްގެ ދިރުން" ހަރަކާތުން އުފެދިގެން ދިޔަ ޑިމޮކްރެޓްސްއިން ރިޔާސީ އިންތިހާބުގައި ވާދަކުރާނެ ކަމަށް ވަނީ އިއުލާނުކޮށްފައެވެ. ނަޝީދަށް ތާއީދު ކުރާ މަޖިލީހުގެ 12 މެމްބަރަކު ވަނީ އެމްޑީޕީއިން ވަކިވެ ދަ ޑިމޮކްރެޓްސް އާއި ގުޅިފައެވެ. އަދި ނަޝީދަށް ތާއީދުކުރާ އެހެން ފަރާތްތަކުން ވެސް ދަނީ އެމްޑީޕީއިން ވަކިވަމުންނެވެ.
