ތަރައްގީއާއެކު އިސްކަން ދެނީ ވަޒީފާ އުފެއްދުމަށް: ރައީސް

ޤައުމު ކުރިޔަށްދާނީ ތަރައްޤީގެ މަޝްރޫޢުތަކާއިއެކު ވަޒީފާތައް އުފައްދައި އެވަޒީފާތަކަށް ބޭނުންވާނެ މީހުން ބިނާކޮށްގެން ކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ސާލިހު މިހެން ވިދާޅުވީ، ނިލަންދެއަތޮޅު އުތުރުބުރީ ދަރަނބޫދޫ ބަނދަރު ހުޅުއްވައި ދެއްވައި ދެއްކެވި ވާހަކަފުޅުގައެވެ. މިރަސްމިއްޔާތު އޮތީ މިއަދު މެންދުރުފަހު، ފ. ދަރަނބޫދޫ ބަނދަރު ސަރަހައްދުގައެވެ.

ފ. ދަރަނބޫދޫ ބަނދަރުގެ މަޝްރޫޢު ނިމި ބަނދަރުހުޅުވުމުގެ ގޮތުން ބޭއްވި މިރަސްމިއްޔާތުގައި، ފަސްޓް ލޭޑީ ފަޒްނާ އަޙްމަދާއި، ދައުލަތުގެ ވަޒީރުންނާއި، ރައްޔިތުންގެ މަޖިލީހުގެ މެމްބަރުންނާއި، ސަރުކާރުގެ މަތީފަންތީގެ ވެރިން ބައިވެރިވެވަޑައިގަތެވެ. އަދި ދަރަނބޫދޫގެ މުއައްސަސާތަކުގެ މުވައްޒަފުންނާ އެރަށު ރައްޔިތުން މިރަސްމިއްޔާތުގައި ބައިވެރިވިއެވެ.

ފ. ދަރަނބޫދޫ ބަނދަރު ހުޅުއްވައި ދެއްވައި ރައީސް ސާލިހު ދެއްކެވި ވާހަކަފުޅުގައި ވިދާޅުވީ، މާލެ ތޮއްޖެހިގެން ދިޔުމުގެ ސަބަބަކީ، ކިތަންމެ ކުޑަ ޚިދުމަތެއް ހޯދަންޖެހުނަސް އަދި ވަޒީފާއެއް ހޯދަން ޖެހުނަސް މާލެއަށް ދާންޖެހޭ ގޮތަށް މީގެ ކުރިން ސިޔާސަތުތައް ބައްޓަންވެފައި އޮތުން ކަމުގައެވެ. މިގޮތުން މާލޭގެ ޙާލަތު އެކަމުގެ ސަބަބުން ވަރަށް ބޮޑަށް ގޯސްވެގެން ގޮސްފައިވާކަން ރައީސުލްޖުމްހޫރިއްޔާ ފާހަގަކުރެއްވިއެވެ. އެމަނިކުފާނު ވިދާޅުވީ، އެކަމަށް އޮތް އެއް ހައްލަކީ މާލެ ނޫން ސަރަހައްދެއްގައި މީހުންނަށް ހަމަޖެހިލައިގެން ދިރިއުޅެވޭނެ ގޮތެއް ހޯދައިދިނުންކަމަށެވެ.

ރައީސް ސާލިހު އިތުރަށް ވިދާޅުވީ މިސަރުކާރުން ތަރައްޤީގެ މަޝްރޫޢުތަކާއެކު ކުރަމުންގެންދާ އަނެއްކަމަކީ ވަޒީފާތަކަށް މީހުން ބިނާކުރުން ކަމަށެވެ. އަދި ޤައުމު ކުރިޔަށްދާނީ، މިގެނެވޭ ތަރައްޤީއާއި އެކުގައި އުފެދޭ ވަޒީފާތަކަށް އެކަށީގެންވާ މީހުން ބިނާކޮށްގެން ކަމަށް ވިދާޅުވިއެވެ. އަދި ވަޒީފާއެއް އާމްދަނީއެއް ނެތި ރަށެއްގައި ދިރި ނޫޅެވޭނެ ކަމަށާ، މާލެއަށް މީހުން ހިޖުރަކުރަންޖެހުނު ސަބަބަކީ އެއީ ކަމުގައިވެސް ރައީސް ވިދާޅުވިއެވެ.

ދަރަނބޫދޫގެ އަބާދީގައި ހަތަރުސަތޭކައެއްހައި މީހުން ދިރިއުޅޭއިރު، ސަރުކާރުގެ ހިލޭ ޑިގްރީގެ ދަށުން، ދަރަނބޫދޫގެ 36 ދަރިވަރަކު ޑިގްރީ ހާސިލްކޮށްފައިވާކަން ފާހަގަކުރައްވައި ރައީސް ސާލިހު ވިދާޅުވީ، ދަރަނބޫދޫގައި މުސްތަޤުބަލް އެބައޮތް ކަމުގައެވެ. އަދި ބޭނުންވަނީ ޒަމާނަށް އަންނަ ބަދަލާއި އެކީގައި ރަށްކުރިއަރުވާނެ ބަޔަކު ރަށުގައި ތިބުންކަމުގައިވެސް ރައީސް ވިދާޅުވިއެވެ

ރައީސް ސާލިހުގެ ވާހަކަފުޅުގައި ވަނީ، ދަރަނބޫދޫއަށް 2018ގެ ރިޔާސީ އިންތިޚާބުގެ ތެރޭގައި ވެވަޑައިގެންނެވި ވަޢުދުތައް ފުއްދައި ދެވިފައިވާކަން ފާހަގަކުރައްވާފައެވެ. އަދިވެސް ދަރަނބޫދޫގެ ރައްޔިތުން ބޭނުންވާނެ ކަންކަން ހުންނާނެކަން ފާހަގަކުރައްވައި އެކަންކަން ޙިއްޞާކޮށްދެއްވުމަށް އެދިވަޑައިގެންނެވިއެވެ.

ފ ދަރަނބޫދޫ ބަނދަރު އަޕްގްރޭޑް ކުރުމުގެ މަޝްރޫޢު ސަރުކާރުން ހަވާލުކުރެއްވީ އެމްޓީސީސީއަށެވެ. މިމަޝްރޫޢަށް ސަރުކާރުން 45.9 މިލިޔަން ރުފިޔާ ޚަރަދުކުރައްވާފައިވެއެވެ.