ޚާރިޖީ ވަޒީރު ޝާހިދަކީ ރައްޔިތުންގެ މަޖިލީހުގެ އިދިކޮޅު މެމްބަރުންނާއި، ސަރުކާރަށް ތާއީދު ކުރާ މެމްބަރުންގެވެސް ތާއީދު އޮތް ބޭފުޅެއްކަން އެމަނިކުފާނާއި ދެކޮޅަށް ހުށަހަޅާފައިވާ އިތުބާރު ނެތްކަމުގެ ވޯޓުން ހާމަވެގެންދާނެ ކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅޅުވެއްޖެއެވެ.

މެމްބަރު ރާއީ މިހެން ވިދާޅުވީ މޮރިޝަސްގެ ކަނޑުގެ މައްސަލާގައި އިހުމާލުވުން އޮތްކަމަށް ބުނެ މަޖިލީހުގައި ހިމެނޭ އިދިކޮޅު މެމްބަރުން ހުށަހަޅާފައިވާ ޝާހިދުގެ އިތުބާރު ނެތްކަމުގެ މައްސަލާގައި އޭނާ ދެކޭގޮތް ހާމަކޮށް ކުރެއްވި ޓުވީޓެއްގައެވެ. ޝާހިދުގެ އިތުބާރު ނެތްކަމުގެ މައްސަ މަޖިލީހަށް ވައްދާފައިވަނީ މިމަހުގެ 18 ވަނަ ދުވަހު 13 މެމްބަރަކު ސޮޔާއެކުގައެވެ.

މެމްބަރު ރާއީ ވިދާޅުވީ ޝާހިދުގެ އިތުބާރު ނެތްކަމަށް މަޖިލީހަށް ވައްދާފައިވާ މައްސަލާގައި އެވޯޓު އިދިކޮޅު މެމްބަރުންނަށް ކާމިޔާބު ނުވާނެކަމަށެވެ. ޝާހިދުގެ އިތުބާރު ނެތްކަމަށް ނަގާ ވޯޓުގައި މަޖިލީހުގައި ހިމެނޭ އިދިކޮޅު މެމްބަރުންނާއި، ސަރުކާރަށް ތާއީދު ކުރާ މެމްބަރުންގެވެސް ފުރިހަމަ ތާއީދު ޝާހިދަށް އޮތްކަން ހާމަވެގެން ދާނެކަމަށް ރާއީ ވިދާޅުވިއެވެ.

ފޮރިން މިނިސްޓަރު ޝާހިދަށް އަޅުގަނޑުގެ ފުރިހަމަ އިތުބާރު އެބައޮތް. އެ މަނިކުފާނުގެ އިތުބާރު ނެތްކަމުގެ ވޯޓް ދާނީ ތޮޅިއަށް، މަޖްލިސްގެ އެއްކޮޅު އަދި ދެކޮޅު ފިކުރުގެ ގިނަ އިއްޒަތްތެރި މެމްބަރުންގެ ފުރިހަމަ ތާޢީދު އެމަނިކުފާނަށް އޮތްކަން ހާމަވެގެންދާނެ.

– މެމްބަރު ރާއީ ވިދާޅުވިއެވެ.

ރައްޔިތުންގެ މަޖިލީހަށް ހުށަހަޅުއްވާފައިވާ، ބަންޑާރަ ނައިބް އިބްރާހިމް ރިއްފަތާއި، ޚާރިޖީ ވަޒީރު ޝާހިދުގެ އިތުރުން މަޖިލީހުގެ ނައިބް ރައީސް އީވާގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހުގެ ޖަލްސާއަށް އެޖެންޑާ ކުރައްވާފައެވެ. ޚާރިޖީ ވަޒީރު ޝާހިދުގެ އިތުބާރު ނެތްކަމުގެ މައްސަލަ އެޖެންޑާކޮށްފައިވަނީ އަންނަ މަހުގެ 6 ވަނަ ދުވަހަށެވެ.

ވަޒީރެއްގެ އިތުބާރު ނެތްކަމުގެ މައްސަލައެއް މަޖިލީހަށް ވެއްދޭނީ މަދުވެގެން 10 މެންބަރުންގެ ސޮޔާ އެކުއެވެ. އަދި ވަޒީރެއްގެ އިތުބާރު ނެތްކަމަށް ފާސްކުރުމަށް މަޖިލީހުގެ 43 މެމްބަރުންގެ އަޣްލަބިއްޔަތު ބޭނުންވާއިރު އިދިކޮޅު ފަރާތްތަކަށް އޮތީ 29 މެންބަރުންގެ ތާއީދެވެ.