ސެޕްޓެމްބަރު ނުވަނަ ދުވަހު ބާއްވާ ރިިޔާސީީ އިިންތިޚާބަށް ޖުމްހޫރީ ޕާޓީން ވަމުންދާ ތައްޔާރީގައި އެންމެ ބޮޑު ހިއްސާއެއް ބޭނުންވަނީ ޒުވާނުންގެ ފަރާތުން ކަމަށާއި، ޒުވާނުންގެ އުންމީދުތައް ހާސިލް ކުރެއްވުމުގައި ސާބިތުވެ ހުންނާނެކަމަށް ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.

"ފުރަވީރުން" ނަމުގައި ރޭ ހުޅުމާލޭގެ ސެންޓްރަލް ޕާކްގައި އޮތް ޒުވާނުންގެ ހާއްސަ ހަރަކާތެއްގައި ވާހަކަފުޅު ދައްކަވަމުން ޤާސިމް ވިދާޅުވީ މިއީ ޒުވާނުންގެ އުންމީދުތަކާއި ގުޅިފައިވާ އިންތިޚާބެއް ކަމަށެވެ. ޒުވާނުންގެ ތެރޭގައި އޮތް ޝަކުވާތަކާއި ކަންބޮޑުވުންތަކަށް ބަދަލު ގެނެސްދޭނީ ޔުމްހޫރީ ޕާޓީންކަމަށް ޤާސިމް ވިދާޅުވިއެވެ.

ގާސިމްގެ އަނބިކަނބަލުން، ޓްރާސްޕޯޓް މިނިސްޓަރު އައިޝަތު ނަހުލާ އިސްނަންގަވައިގެން ބޭއްވެވި ހަރަކާތުގައި ޖުމްހޫރީ ޕާޓީއާއި ވަނީ ގިނަ އަދަދެއްގެ ޒުވާނުން ގުޅިފައެވެ. މިއުޒިކާއި، ހަވާއެރުވުމާއިއެކު ކުރިއަށް ދިޔަ ކުލަގަދަ މި އިވެންޓުގައި ޖޭޕީއާއި ގުޅުނު ޒުވާނުންގެ ފޯމުތައް ޤާސިމާއި ހަވާލުކޮށްދެއްވީ ނަހުލާއެވެ.

ޤާސިމް ވިދާޅުވީ ރާއްޖެ މިއަދު މިދެކޭ ޒަމާނީ ޑިމޮކްރަސީއާއި، ޒުވާނުން ބޭނުންވި ބަދަލު ގެނައުމުގައި އެމަނިކުފާނު މުހިންމު މަސައްކަތްތަކެއް ކުރެއްވިކަމަށެވެ. އެމަސައްކަތުގައި އެންމެ އެކަށީގެންވާ ނަތީޖާއަކާއި ހަމައަށް ނުދެވި ވަނީ، ވެރިންގެ އިޚުލާސްތެރިކަން ނެތުމުންކަމަށް ޤާސިމް ވިދާޅުވިއެވެ. ނަމަވެސް އޭނާއަކީ ޒުވާނުންގެ އަޑު އަހައި މިހެޔޮ ބަދަލު ގެނެސްދޭނެ ލީޑަރުކަމަށް ޤާސިމް ވިދާޅުވިއެވެ.

ޒުވާނުން ބޭނުންވާ ހުރިހާ ކަމެއް ހަމަޖެހިގެންދާނެ. އިރާދަ ކުރެއްވިއްޔާ އަޅުގަނޑުމެން ޖުމްހޫރީ ޕާޓީން ފެށި މަސައްކަތް ކާމިޔާބުވެސް ކުރާނަން. ހާސް ކަނޑާލާށޭ. ހަމަޖެހިގެން ދާނެއޭ. އަދި އަޅުގަނޑުމެން ކާމިޔާބުވެސް ކުރާނަމޭ އިރާދަކުރެއްވިއްޔާ.

– ޤާސިމް ވިދާޅުވިއެވެ.

I would like to express my profound appreciation to @aishath_nahula, Deputy Leader of @JPSecretariat, and her team for their exceptional organization of the extraordinary youth event @furaveerun in Hulhumale' Central Park. The youth of our nation consistently make immense… pic.twitter.com/TlvMA6jeqs

— Qasim Ibrahim (@qasimibrahim) May 25, 2023

ޤާސިމް މިހެން ވިދާޅުވއިރު ރިޔާސީ އިންތިޚާބުގައި ޖުމްހޫރީ ޕާޓީއަށް އެންމެ ބޮޑު އެހީތެރިކަމެއް ވެދެއްވި ރައީސް ނަޝީދު ވަނީ ސިޔާސީ ޕާޓީއެއް ހައްދަވައި، ޤާސިމާއިއެކު ރިޔާސީ އިންތިޚާބުގެ ފުރަތަމަ ބުރުގައި މަސައްކަތް ނުކުރާނެކަމުގެ އިޝާރާތެއް ދެއްވާފައެވެ. ރިޔާސީ އިންތިޚާބުގައި މިހާތަނަށް ޖޭޕީއާއިއެކު ކޯލިޝަން ހެދުމަށް އެއްވެސް ޕާޓީއަކުން ޝައުގުވެރިކަން ފާޅުކޮށްފައި ނުވެއެވެ.

މިއަހަރު ބޭއްވެވުމަށް ހަމަޖެހިފައިވާ ރިޔާސީ އިންތިޚާބުގައި 282755 މީހުންނަށް ވޯޓުލުމުގެ ޙައްޤު ލިބިފައިވެއެވެ. މި އަހަރު ރިޔާސީ އިންތިހާބުގައި 2018 ވަނަ އަހަރަށްވުރެ އިތުރަށް 19755 މީހުން ވޯޓްލުމުގެ ޙައްޤު އޮންނާނެއެވެ. މިއީ 10 އިންސައްތައިގެ އިތުރުވުމެކެވެ. އަދި މިއަހަރު މުޅިން އަލަށް 21،000 ޒުވާނުންނަށް ވޯޓުލުމުގެ ޙައްޤު ލިބެނެއެވެ.

ރިޔާސީ އިންތިޚާބުގައި ކެނޑިޑޭޓުންގެ ގޮތުގައި ވާދަކުރުމަށް ހުޅުވާލާނީ 23 ޖުލައިން 3 އޯގަސްޓުގެ ނިޔަލަށެވެ. އަދި ކެނޑިޑޭޓުންގެ ނަންތައް ތަރުތީބުކޮށް 9 އޯގަސްޓްގައި އިޢުލާންކުރާނެއެވެ. ކެންޑިޑޭޓުން ކެމްޕެއިން ކުރުމަށް 10 އޯގަސްޓުން ފެށިގެން 8 ސެޕްޓެމްބަރާ ހަމައަށް ފުރުޞަތު ދެއްވުމަށްވެސް ކޮމިޝަނުން ވަނީ ނިންމަވައިފައެވެ.

ރިޔާސީ އިންތިޚާބުގައި ވެރިކަންކުރާ މައި ޕާޓީން ވާދަކުރައްވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. އިދިކޮޅު ޕީޕީއެމްއިން ވާދަކުރަން ނިންމާފައިވަނީ ކުރީގެ ރައީސް ޔާމީނެވެ. ނަމަވެސް އެމަނިކުފާނު ގެންދަނީ 11 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ. އެހެންކަމުން އެމަނިކުފާނަށް އިންތިޚާބުގައި ވާދަކުރެވިދާނެކަމާމެދު ވަނީ ސުވާލެއްގެ ތެރޭގައެވެ.

ޙުކުމް އިސްތިއުނާފުކޮށްފައިވާއިރު، މަތީ ކޯޓުން މި މައްސަލާގައި ނިންމާ ގޮތަކުން ރައީސް ޔާމީނަށް ވާދަކުރުމުގެ ފުރުޞަތު ވެސް ލިބިދާނެއެވެ. އިންތިޚާބުގައި ދެން ވާދަކުރައްވާނެ ކަމަށް އިޢުލާން ކުރައްވާފައިވަނީ އެމްއެންޕީގެ ފަރާތުން އެޕާޓީގެ ރައީސް މުޙައްމަދު ނާޒިމާއި، ޖުމްހޫރީ ޕާޓީގެ ލީޑަރު ޤާސިމް އިބްރާހީމާއި، މިނިވަން ކެނޑިޑޭޓުންގެ ގޮތުގައި ޑރ.މުޙައްމަދު މުނައްވަރުގެ އިތުރުން ޢުމަރު ނަޞީރެވެ.