ރައްޔިތުންގެ ތާއީދު ހޯދުމަށް ކޮންމެ ފަހަރަކު ސިމްޕަތީ ކާޑު ކުޅުމަކީ މިހާރު ފެއިލްވެފައިވާ އުކުޅަކަށް ވެފައިވާކަމަށް ރައީސުލްޖުމްހޫރިއްޔާގެ އޮފީހުގެ ޗީފް އޮފް ސްޓާފް އަލީ ޒާހިރު ވިދާޅުވެއްޖެއެވެ.
އޭނާ މިހެން ވިދާޅުވީ ރައްޔިތުންގެ މަޖިލީހުގައި މިއަދު ކުރިއަށްދިޔަ ބަހުސްގެ ތެރެއިން ރައީސް ނަޝީދަށް ދިން ހަމަލާއާއި ގުޅިގެން ރައީސް ނަޝީދަށް ތާއީދު ކުރާ މަޖިލީހުގެ މެމްބަރުން ވަނީ ރައީސް ޞާލިހާއި މިސަރުކާރުގެ ބޮލުގައި ބޮޑެތި ތުހުމަތުތައް އަޅުވާފައެވެ. ބައެއް މެމްބަރުން ވަނީ އެހަމަލާއަކީ ސީދާ ރައީސް ޞާލިހު ރާވައިގެން ދެއްވި ހަމަލާއެއް ކަމަށްވެސް ތުހުމަތު ކުރައްވާފައެވެ.
މެމްބަރުންގެ ވާހަތަކަށް ރައްދު ދެއްވަމުން މިސަރުކާރާއިއެކު ކޯލިޝަން ހަދާފައިވާ އަދާލަތު ޕާޓީގެ އިސް ބޭފުޅެއްގެ ގޮތުގައި ހުންނެވި އަލީ ޒާހިރު ވިދާޅުވީ އެއްވެސް ހަގީގަތެއްނެތް ދޮގު ތުހުމަތު ސަރުކާރުގެ ބޮލުގައި އަޅުވައިގެން ރައްޔިތުންނަށް ކަންކަން އޮޅުވާލަން އުޅުމަކީ މާޒީ ކަމަށެވެ.
ސަރުކާރުން ނުކުރާ ކަންކަން ސަރުކާރުގައި އަޅުގައި ރައީސަށް ބޮޑެތި ތުހުމަތު ކުރުމަކީ ސަރުކާރުން ޖާގަ ދޭނެ ކަމެއް ނޫންކަމަށް އޭނާ ވިދާޅުވިއެވެ. އަދި މިއީ މިއަދު ރައްޔިތުން ފަރިތަ ފެއިލެވެފައިވާ ސިމްޕަތީ އުކުޅެއްކަމަށް އަލީ ޒާހިރު ވިދާޅުވިއެވެ.
ސިޔާސީ ގޮތުން ބަލިވެ ބާކީވާ ކޮންމެ ފަހަރަކު ސަޕޯޓަރުންނަށް އޮޅުވާލުމަށް ސިމްޕަތީ ކާޑު ކުޅެ ސަރުކާރުގެ ބޮލުގަ ދޮގު ތުހުމަތުތައް އެޅުއްވި ބައެއް ސިޔާސީ ބޭފުޅުންގެ ސަޤާފަތަކަށް ވެއްޖެ. އެހެންކަމުން އެކަމަކީ ރައްޔިތުންނަށް ފަރިތަ ފައިލްވެފައިވާ އުކުޅަކަށް ނޫނީ ދެން ނުވާނެ.
– އަލީ ޒާހިރު ވިދާޅުވިއެވެ.
ބޮމުގެ ހަމަލާގެ ކަންތަކުގައި ރައީސް ނަޝީދާއި، އެމަނިކުފާނުގެ ސަޕޯޓަރުންގެ ބޮޑެތި ތުހުމަތުތައް ރައީސް ޞާލިހާއި މިސަރުކާރަށް ދަނީ ކުރަމުންނެވެ. އެގޮތުން މައްސަލަ އެންމެ އެކަށީގެންވާ ގޮތަށް ކުރިއަށް ނުދިއުމާއި، މައްސަލައިގައި ފަންޑު ކުރި މީހުން ނުހޯދުމަކީ އެބޭފުޅުންގެ އޮތް ބޮޑު ކަންބޮޑުވުމެކެވެ.
