ޓެކްސީގެ ހިދުމަތްދޭ އެއްގަމު އުޅަނދުތަކުގައި ޑޭޝް ކެމެރާ ހަރުކޮށް ހިދުމަތްދޭ ހުރިހާ ވަގުތެއްގައި އެ ކެމެރާއިން ރިކޯޑުކުރެވޭނެ އިންތިޒާމު ހަމަޖެއްސުމަށް ލާޒިމުކުރާ ޤަވާއިދަށް އަމަލުކުރަން ފަށައިފިއެވެ.
މި ގަވާއިދަކީ ޓްރާންސްޕޯޓް މިނިސްޓްރީން އޮގަސްޓް 2022 ގައި ގެޒެޓްކޮށްފައިފައިވާ ގަވާއިދެކެވެ. 6 މަސް ދުވަސް ފަހުން އަމަލުކުރަންފަށާގޮތަށް އެކުލަވާލާ ގެޒެޓްކުރި މިގަވާއިދަށް ިއސްލާހުތަކެއް ގެނެސް އެއަށް އަމަލުކުރުން އިތުރު 3 މަސް ދުވަހަށް އެ މިނިސްޓްރީން އިތުރުވެސް ކޮށްދިނެވެ.
ޓެކްސީކުރުމުގެ ގަވާއިދަށް ގެނެސްފައިވާ އިސްލާހުތަކުގެތެރޭގައި ޑްރައިވަރާއި، ފަސިންޖަރުންނާއި ޓެކްސީގެ ބޭރު ފެންނާނެ ހެން ކެމެރާ ހަރުކޮށްފައި ހުންނަން ޖެހެއެވެ. އަދި ޓެކްސީގެ ހިދުމަތްދޭ ކޮންމެ ވަގުތެއްގައިވެސް އެ ކެމެރާތަކުން ރެކޯޑްކޮށް ރެކޯޑް ކުރާ މަންޒަރުތައް މަދުވެގެން ހަފްތާއެއް ވަންދެން ރައްކާކޮށްފައި ހުންނަން ޖެހޭނެއެވެ. އެ ޑާޓާ ބެލެހެއްޓުމުގެ ޒިންމާ ނަގަން ޖެހޭނީ އެ ޓެކްސީއެއް ރަޖިސްޓްރީކޮށްފައިވާ ޓެކްސީ ސެންޓަރަކުންނެވެ.
އަދި އެ ގަވާއިދުގެ ދަށުން ޓެކްސީގައި ދަތުރު ކުރާ ފަރާތްތަކަށް މަންޒަރުތައް ރެކޯޑް ކުރަމުންދާކަން ޓެކްސީ ޑްރައިވަރު އަންގަންވެސް ޖެހެއެވެ. އަދި ޓެކްސީގެ ބިއްލޫރިތައް ކަޅުކުރެވޭނީ މަގެއްގެ އަރިމަތީގައި ހުންނަ މީހަކު އުޅަނދަށް ބަލާއިރު އެތެރޭގައި ތިބޭ ފަސިންޖަރުން ފެންނަން ހުންނަ ވަރަށް ކަމަށްވެސް އެ ގަވާއިދުގައި ބުނެފައިވެއެވެ.
އަދި އުޅނދު ސާފުތާހިރުކޮށް ބެހެއްޓުމާއި، އެއާކޮންޑިޝަންކޮށްފައި ހުރުމަކީވެސް މި ގަވާއިދުން ލާޒިމުކުރާ ކަންކަމެވެ.މިގަވާއިދުވާ ގޮތުން ޓެކްސީތަކަށް އަރުވާ ފޮރޮޅުލީ ގޮނޑިފަދަ ތަކެޓި ޑިކީއަށް ލީކަމުގައިވިޔަސް އިތުރަށް އަގު ނެގުމަކީ މަނާކަމެކެވެ. އަދި ހާއްސަ އެހީއަށް ބޭނުންވާ މީހުންނާއި އެހެނިހެން އެހީތެރިކަމަށް ބޭނުންވާ ފަރާތްތަކަށް ޓެކްސީއަށް އަރާފޭބުމުގައި އަދި ލަގެޖްފަދަ ތަކެތި ޑިކީއަށް ލުމަށް ޓެކްސީ ޑްރައިވަރު އެހީތެރެވޭން ޖެހޭނެއެވެ.
