ރައްޔިތުންގެ މަޖިލީހުގެ ނާއިބު ރައީސްކަމުގެ މަޤާމުން ގަލޮޅު އުތުރު ދާއިރާގެ މެންބަރު އީވާ ވަކިކުރެއްވުމަށް އެމްޑީޕީގެ ޕާލަމެންޓްރީ ގުރޫޕުން މިއަދު މަޖިލިހަށް ހުށަހެޅި ޕެޓިޝަންގައި އެޕާޓީގެ މާލަމެންޓްރީ ގުރޫޕުގައި ހިމެނިވަޑައިގަންނަވާ 6 މެމްބަރަކު ސޮއި ނުކުރައްވާކަން ހާމަވެއްޖެއެވެ.
މިހާރު ސޯޝަލް މީޑިއާއަށް އާންމު ވެފައިވާ ލިސްޓުގައި ވާގޮތުން، އިވާގެ އިތުބާރު ނެތްކަމުގެ މައްސަލަ މަޖިލީހަށް ވެއްދުމަށް ސޮއި ކޮށްފައިވާ ލިސްޓުގައި 50 މެމްބަރަކު ސޮއި ކޮށްފައިވާއިރު އޭގެ ތެރޭގައި މަޖިލިހުގެ މިނިވަން މެމްބަރެއްގެ ގޮތުގައި ހުންނެވި، ފ. ނިލަންދޫ ދާއިރާގެ މެމްބަރު އަބުދުލް މުހުސިން މުހައްމަދު (ޖޭ4)ވެސް ހިމެނިވަޑައިގަންނަވައެވެ. އަދި އާ ސިޔާސީ ޕާޓީއެއް އުފެއްދުމަށް ދާދި ފަހުން އެމްޑީޕީން ވަކި 13 މެމްބަރުންގެ ވަކިވުމާއެކު މިހާރު އެމްޑީޕީގެ ޕާލަމެންޓްރީ ގުރޫޕުގައި ހިމެނޭ 55 މެމްބަރުންގެ ތެރެއިން މިއަދު ގަރާރުގައި ސޮއި ކުރައްވާފައިވަނީ އެމްޑީޕީގެ ޕާލަމެންޓްރީ ގުރޫޕަށް ނިސްބަތްވާ 49 މެމްބަރުންނެވެ.
އިތުބާރު ނެތްކަމުގެ މައްސަލާގައި ސޮއި ކޮށްފައި ނުވާ މެމްބަރުން:
- މުހައްމަދު ނަޝީދު – މައްޗަން ގޮޅި މެދު ދާއިރާ
- އަހުމަދު ހައިތަމް – މައްޗަންގޮޅި ދެކުނު ދާއިރާ
- ޖަމްޝީދު މުހައްމަދު – ކުޅުދުއްފުށި ދެކުނު ދާއިރާ
- މޫސާ ސިރާޖު – ފޮނަދޫ ދާއިރާ
- އަހުމަދު ހަލީމް (ދޮންބިލެއް ހަލީމް) – ބިލެތްދޫ ދާއިރާ
- އަހުމަދު ރަޝީދު – ހިތަދޫ މެދު ދާއިރާ
މަޖިލީހުގެ ނައިބް ރައީސް ކަމުގެ މަޤާމުން އީވާ ވަކި ކުރުމަށް އެމްޑީޕީގެ ޕީޖީ ގްރޫޕުން ނިންމި ނިންމުމާއިއެކު މިއަދު ވަނީ އީވާގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައެވެ. އީވާގެ އިތުބާރު ނެތްކަމުގެ މައްސަލަ ވެއްދީ 50 މެމްބަރުންގެ ސޮޔާއި އެކުގައެވެ.
އީވާގެ ނޯ ކޮންފިޑެންސް މޯޝަން މަޖިލީހަށް ވައްދާފައި ވާއިރު، ރައްޔިތުންގެ މަޖިލިހުގެ ރައީސް މުހައްމަދު ނަޝީދު ވިދާޅުވެފައިވަނީ އިތުބާރު ނެތްކަމުގެ މައްސަލާގައި ސޮއިކޮށްފައިވާ މެމްބަރުންގެ ތެރެއިން 5 މެމްބަރުން ނަން އަބުރާ ގެންދާނެ ކަމަށާއި އަދި ވޯޓު ނަގާދުވަހު އިތުރު 5 މެމްބަރުން މަޖީލިހަށް ހާޒިރު ނުވާނެކަމުގައެވެ.
މަޖިލިސް މެމްބަރުންގެ ވަޓްސްއަޕް ގުރޫޕަށް ފޮނުއްވި މެސެއްޖެގައި، 50 މެމްބަރަކު ސޮއި ކޮށްފައިވާ ޕެޓިޝަނަށް އިޝާރާތް ކުރައްވަމުން ނަޝީދު ވިދާޅުވީ ޕެޓިޝަންގައި ސޮއި ކޮށްފައިވާ މެމްބަރުންގެ ތެރެއިން 5 މެމްބަރުން ޖެހޭނީ ކަނޑާލަން ކަމުގައެވެ.
މީގެއިން 5 ވޯޓު މިކޮޅަށް ނަގަން ޖެހޭނީ ދޯ!
ޕެޓިޝަންގައި ސޮއި ކޮށްފައިވާ މެމްބަރުންގެ ތެރެއިން 5 މެމްބަރުން ނަން އަބުރާ ގެންދާނޭކަމަށް މޭރުން ކުރައްވަމުން ނަޝީދު ވިދާޅުވެފައި ވެއެވެ.
އަދި 5 އެމްޕީ ވޯޓު ދޭ ދުވަހު ވަޑައިނުގަތުމުން ވެސް މިކަން ވާނެ.
އިތުބާރު ނެތްކަމުގެ ވޯޓު މަޖިލިހުގައި ނަގާ ދުވަހު އިތުރު 5 މެމްބަރުން މަޖިލިސް ފްލޯއަށް ހާޒި ނުވާނެކަމަށާއި، އީވާގެ އިތުބާރު ނެތްކަމަށް ފާސް ނުވާނެކަމަށް މޭރުން ކުރައްވަމުން ނަޝީދު ވިދާޅުވެފައި ވެއެވެ.
ނަޝީދު ވިދާޅުވެފައިވާގޮތަށް މަޖިލިހަށް ހުށަހަޅާފައިވާ ޕެޓިޝަނުން 10 މެމްބަރުން އުނިވެއްޖެނަމަ އީވާގެ އިތުބާރު ނެތްކަމަށް ފާހެއް ނުވާނެއެވެ.
ރައްޔިތުންގެ މަޖިލީހުގެ ޤަވާޢިދު ބަޔާންކުރާގޮތުން މަޖިލީހުގެ ރައީސް ނުވަތަ ނާއިބު ރައީސްގެ މަޤާމުގައި ހުންނަވާ ބޭފުޅަކު އެ މަޤާމުން ވަކިކުރަން ހުށައެޅޭނީ މަޖިލީހުގެ ޖުމްލަ މެންބަރުންގެ ހަތަރު ބައިކުޅަ އެއްބަޔަށްވުރެ މަދު ނޫން ޢަދަދެއްގެ މެންބަރުން ސޮޔާއެކު ހުށައަޅުއްވާ ޤަރާރަކުންނެވެ. އެއީ މިހާރު މަޖިލީހުގައި ހިމެނިވަޑައިގަންނަވާ 87 މެންބަރުންގެ ތެރެއިން 22 މެންބަރުންގެ ސޮއެވެ.
އަދި ޤާނޫނު އަސާސީގައި ބަޔާންކުރާ ގޮތުގައި ރައްޔިތުންގެ މަޖިލީހުގެ ރައީސްއާއި ނާއިބު ރައީސް، އެމަޤާމުން ވަކިކުރެވޭނީ މަޖިލީހުގެ ދެބައިކުޅަ އެއްބައި މެންބަރުންގެ ވޯޓާއެކު ފާސްވެގެންނެވެ. އެއީ 43 މެންބަރުންގެ ވޯޓެވެ. މިއީ އެމްޑީޕީގެ ޕީޖީ ގްރޫޕުގެ މެންބަރުން ހަމަވާ ޢަދަދެކެވެ. މަޖިލީހުގައި މިހާރު އެމްޑީޕީގެ 55 މެމްބަރުން ތިއްބަވައެވެ.
