ރިޔާސީ އިންތިޚާބުގައި ވާދަކުރާ ޖުމްހޫރީ ޕާޓީގެ ރިޔާސީ ކެނޑިޑޭޓް ޤާސިމް އިބްރާހިމްގެ ކެމްޕެއިން ޓީމު ތައްޔާރު ކުރުމަށް ޚާއްސަ ތަމްރީން ޕްރޮގުރަމެއް ފަށައިފިއެވެ.
މ.ކުނޫޒުގައި ކުރިއަށްދާ މި ސެޝަންތައް ނަގައި ދެއްވުމުގައި ރާއްޖޭގައި މިހާތަނަށް ހިނގައިދިޔަ ބޮޑެތި ކެމްޕެއިންތަކުގައި ބައިވެރިވެފައިވާ ތަޖުރިބާ ކާރު ބޭފުޅުން ބައިވެރިވެއެވެ. އޭގެ ތެރޭގައި ޖޭޕީގެ ނައިބް ލީޑަރުންނާއި، ޕާޓީގެ އިސް މަޤާމުތަކުގައި ތިއްބެވި ކެމްޕެއިން ތަޖުރިބާ ލިބިފައިވާ އިސް ބޭފުޅުން ބައިވެރިވެއެވެ.
މި ތަމްރީން ސެޝަންތަކުގައި މާލޭގެ އިތުރުން، އަތޮޅުތެރޭގެ ރަށްތަކުގައި ތިބި މި މަސައްކަތުުގައި ބައިވެރިވާން ބޭނުންވާ ފަރާތްތަކަށް ބައިވެރިވެނޭ އިންތިޒާމުވެސް ހަމަޖެހިފައިވާކަން އެ ޕާޓީން ހާމަކޮށްފައިވެއެވެ.
އުތުރު ކެމްޕެއިންގެ ޓީމުތައް ކެމްޕެއިންގެ މަސައްކަތަށް އަހުލުވެރި ކުރުވުމަށް ސިލްސިލާ އޮރިއެންޓޭޝަން pic.twitter.com/NaGCDNNUu1
— JP Uthuru 2023 🇲🇻 (@MaldivianReal) May 22, 2023
އަންނަ ސެޕްޓެމްބަރު މަހުގެ ނުވަވަނަ ދުވަހު ބާއްވާ ރިޔާސީ އިންތިޚާބަށް، ޖޭޕީން ނެރޭ ކެންޑިޑޭޓެއްގެ ގޮތުގައި ޤާސިމް އިބްރާޙީމް ހަމަޖައްސައި އެކަން އިއުލާނުކޮށްފައިވަނީ، ޕާޓީގެ ކައުންސިލުން، މިދިޔަ އޭޕްރިލް މަހުގެ ތިންވަނަ ދުވަހު ބޭއްވި ކައުންސިލް ބައްދަލުވުމުގައެވެ. މި ނިންމުން ނިންމާފައިވަނީ ޕާޓީގެ ކައުންސިލް ބައްދަލުވުމުގައި، ބައްދަލުވުމުގައި ބައިވެރިވި މެމްބަރުންގެ އިއްތިފާގުންނެވެ.
ރާއްޖޭގައި ތިންވަނައަށް އެންމެ މެމްބަރުން ގިނަ ޕާޓީގެ ގޮތުގައި އޮތް ޖުމްހޫރީ ޕާޓީގައި 23،000 އެއްހައި މެމްބަރުން ތިބޭކަމަށް ތަފާސްހިސާބުތަކުން ދައްކާއިރު، މިދިޔަ ދެ ތިން ހަފްތާގައި ވެސް ރާއްޖޭގެ އެކި ކަންކޮޅުތަކުން ގިނަ އަދަދެއްގެ އައު މެމްބަރުންތަކެއް ޕާޓީއާ ގުޅިފައިވެއެވެ.
