ކުރިއަށް އޮތް ރިޔާސީ އިންތިޚާބުގައި އެކީގައި މަސައްކަތް ކުރުމަށް ޖޭޕީގެ ބޭފުޅުންނާ އެކުގައިވެސް އަދި ޕީޕީއެމް، ޕީއެންސީ އާއިއެކުވެސް މަޝްވަރާ ކުރަމުން ދާކަމުގައި ރައީސް ނަޝީދު އިސްކޮށް ހުންވައިގެން އުފައްދަވާ ދަ ޑިމޮކްރެޓްސް އިން ވިދާޅުވެއްޖެއެވެ.
ދަ ޑިމޮކްރެޓްސްގެ ފަރާތުން މިއަދު ބޭއްވި ރަސްމީ ފުރަތަމަ ނޫސްވެރިންގެ ބައްދަލުވުމުގައި މި ޕާޓީގެ ތަރުޖަމާން އަފްޝަން ލަތީފް ވިދާޅުވީ ޖުމްހޫރީ ޕާޓީއާ އެކު ކުރިއަށް ގެންދާ މަޝްވަރާތައް ހުއްޓިފައި ނުވާ ކަމަށާއި ގާތްގުޅުންތަކެއް އެބައޮތް ކަމަށެވެ. އަދި ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ލަފާ ލިބިވަޑައިގަންނަވާ ކަމުގައިވެސް ވިދާޅުވިއެވެ.
ގާސިމަކީ އެމްޑީޕީ އުފެދުނީއްސުރެ، އަދި އެއަށް ވުރެ މާ ކުރިން ވެސް ސިޔާސީ ތަޖުރިބާކާރެއް. ގާސިމާއި ޖޭޕީއާ ދެމެދު ކުރިއަށްދާ އެއްވެސް މަޝްވަރާއެއް "ބްރޭކްޑައުން" ވެގެން ދިޔަ ކަމަކަށް އަޅުގަނޑު އަދި ނުދެކެން.
– އަފްޝަން ވިދާޅުވިއެވެ.
އޭނާ ވިދާޅުވީ ޖުމްހޫރީ ޕާޓީންނާއި އަދި ދަ ޑިމޮކްރެޓްސް އިން ރިޔާސީ ކެންޑިޑޭޓަކު ނެރުނު ނަމަވެސް އެއީ މަޝްވަރާތައް ހުއްޓިދާނެ ކަމެއް ނޫން ކަމަށެވެ. އަދި ވިދާޅުވީ އިދިކޮޅު ކޯލިޝަން ޕީޕީއެމް ޕީއެންސީއާ އެކު ވެސް މަޝްވަރާ ކުރިއަށްދާނެ ކަމަށެވެ.
އަޅުގަނޑުމެންގެ ތެރެއިން ގިނަ ބޭފުޅުން ވަރަށް ގާތްކޮށް، ޖޭޕީގެ ބޭފުޅުންނާ އެކުގައި ވެސް އަދި އޭގެ އިތުރަށް ޕީޕީއެމް ވެސް، ޕީއެންސީ ވެސް އެހެން ބޭފުޅުންނާ އެކީގައި ވެސް މަޝްވަރާ ކުރަމުން ގެންދަނީ މިހާރު ވެސް.
– އަފްޝަން ވިދާޅުވިއެވެ.
ނަޝީދު، ފިކުރެއްގެ ދިރުން އުފެއްދެވުމަށްފަހު ވިދާޅުވީ އޭރު ފެކްޝަނެއްގެ ގޮތުގައި އޮތް މިހާރުގެ ޑިމޮކްރެޓްސް ޕާޓީއިން ރިޔާސީ އިންތިހާބުގައި ތާއީދުކުރާނެ ނުވަތަ އެކުގައި މަސައްކަތް ކުރާނެ ބަޔަކު ކަނޑައެޅުމުގައި ވެރިކަން ކުރާ ނިޒާމު، ބަރުލަމާނީއަށް ބަދަލުކުރުމަށް ތާއީދުކުރާ ފަރާތަކަށް އިސްކަންދޭނެ ކަމަށެވެ.
ނިޒާމު ބަދަލުކުރުމަކީ ނަޝީދު، ޖޭޕީއަށް ހުށަހެޅި ކަންކަމުގެ ތެރޭގައި ހިމެނޭ، ނަމަވެސް ގާސިމް އެކަމާ ދެކޮޅު ކަމައް ކަމަށްވެސް ވަނީ އަޑުފެތުރިފައެވެ. މިކަމާ ގުޅިގެން އަފްޝަން ވިދާޅުވީ ބަރުލަމާނީ ނިޒާމަށް ތާއީދު ނުކުރުމަކީ އިންތިހާބަށް އެކުގަ މަސައްކަތް ކުރުމަށް ކުރެވޭ މަޝްވަރާތަކުގައި ޖެހޭނެ މައްސަލައެއް ނުވަތަ "ޑީލް ބްރޭކާ" އެއް ނޫން ކަމަށެވެ.
ދަ ޑިމޮކްރެޓްސް އުފެއްދުމަށް ބޭނުންވާ 3،000 މެންބަރުންގެ ސޮއި ހަމަކުރުމުގެ މަސައްކަތް ކުރުމަށް އިލެކްޝަންސް ކޮމިޝަނުން ހުއްދަ ދިނީ އިއްޔެއެވެ. ވަރަށް އަވަަހަށް 3،000 މެންބަރުން ހަމަކޮށް ކުރިއަށް އޮތް ރިޔާސީ އިންތިހާބަށް ކެންޑިޑޭޓެއް ނެރެ ވަރަށް އަވަހަށް ކެމްޕޭންގެ މަސައްކަތްތައް ފަށާނެ ކަމަށްވެސް ދަ ޑިމޮކްރެޓްސް އިން ނިމުނު ހަފްތާގެ ތެރޭގައި ބުނެފައިވެއެވެ.
ދަ ޑިމޮކްރެޓްސްގެ ރިޔާސީ ކެންޑިޑޭޓަކީ އަދި މިވަގުތު އެމްޑީޕީގެ ރައީސްގެ ގޮތުގައި ހުންނެވި ރައީސް މުހައްމަދު ނަޝީދު ކަމަށް އާންމުން ބުނަމުން ދިޔަ ނަމަވެސް ދަ ޑިމޮކްރެޓްސް އިން ބުނެފައިވަނީ އެ ޕާަޓީއަކީ ވަކި މީހެއްގެ ޕާޓީއެއް ވަށައިގެން އެނބުރޭ ޕާޓީއެއް ނޫން ކަމަށެވެ. ޕާޓީގެ ރިޔާސީ ޓިކެޓް ބޭނުންވާ ކޮންމެ ބޭފުޅަކުވެސް ވާދަކޮށްގެން ޓިކެޓް ހޯދުމުގެ ފުރުސަތު އޮންނާނެ ކަމަށްވެސް އެ ޕާޓީން ބުނެއެވެ.
މީގެ ދުވަސްތަކެއް ކުރިން ނަޝީދު ވަނީ އެމްޑީޕީއާ ވަރަށް ބޮޑަށް ފެއަށް ޖެހިވަޑައިގެން، ގާސިމްއާ އެކުގައި ސިޔާސީ މަޝްވަރާތައް ބާއްވައިފައެވެ. އަދި ރިޔާސީ މެނިފެސްޓޯ އެކުލަވާލުމާއި ގުޅިގެން މަސައްކަތް ކުރުމާ ގުޅޭ ގޮތުން މަޝްވަރާ ކުރެއްވިއެވެ. އެ މަޝްވަރާތަކުގައި ނަޝީދާއި އެމަނިކުފާނުގެ އަރިސް ބޭފުޅުން ވެސް ބައިވެރިވެވަޑައިގެންނެވިއެވެ.
ޖޭޕީގެ ލީޑަޝިޕްގެ ބޭފުޅުން އެއްބަސްވެވަޑައިގަންނަވާ ގޮތުގައި މިފަހަރު ރިޔާސީ އިންތިހާބު ކާމިޔާބު ކުރުމަށް އެންމެ ފަހި ފުރުސަތެއް އޮތީ ގާސިމަށެވެ.
