އަންނަ އޮގަސްޓު މަހު ދިރާސީ އައު އަހަރު ކިޔެވުން ފެށުމަށް ހަމަޖެހިފައިވާއިރު، ދަރުމަވަންތަ ސްކޫލުގެ މަލްޓި ޕާޕަސް ހޯލް އެޅުމަށް، އެ ތަނާ އިންވެގެން އިންނަ މާލެ ޖަލުން ގައިދީން އެހެން ތަންތަނަށް ބަދަލުކުރަން ފެށިއަސް ޖަލު ހުސްކުރެވޭނެ ސީދާ ތާރީހެއް ނޭނގޭ ކަމަށް ކަރެކްޝަނަލް ސާވިސް އިން މިއަދު ބުނެފި އެވެ.
ކަރެކްޝަންސްއިން ހާމަކޮށްފައިވާ ގޮތުގައި މާލޭ ޖަލުގައި ތިބި ގައިދީން އެހެން ތަންތަނަށް ބަދަލުކުރުމުގެ މަސައްކަތް ކުރަމުން އަންނަ ކަމަށް ބުނެފައިވެއެވެ. ނަމަވެސް، އެ ތަން އެއްކޮށް ހުސްކޮށް، މިނިސްޓްރީއާ ހަވާލުކުރެވޭނެ ތާރީހެއް ނޭނގޭ ކަމަށް ބުނެފައިވެ އެވެ.
މާލެ ޖަލު މިހާތަނަށް މައިގަނޑު ގޮތެއްގައި ބޭނުންކުރަމުން އަންނަނީ ވަގުތީ ގޮތުން ގައިދީން ބައިތިއްވާ ތަނެއްގެ ގޮތުގައެވެ. ނަމަވެސް، ހުކުމް ތަންފީޒުކުރާ ބައެއް ގައިދީން އަދި ޝަރީއަތް ނިމެންދެން ބަންދުގައި ތިބި މީހުން ވެސް މާލޭ ޖަލުގައި ތިބެ އެވެ.
ވިލާ ކޮލެޖު ކުރިމަތީގައި އޮތް ހުސް ބިމުގައި އަޅާ ދަރުމަވަންތަ ސްކޫލްގެ އައު އިމާރާތުގައި މިހާރު ކުރަމުން އަންނަނީ ފިނިޝިންގެ މަސައްކަތެވެ.
ދަރުމަވަންތަ ސްކޫލުގެ އައު އިމާރާތުގައި 41 ކްލާސްރޫމް ހުންނާނެކަމަށާއި ސްކޫލްގައި ޕްރައިމަރީ އާއި ސެކަންޑަރީއަށް ހާއްސަކޮށްގެން ދެ ފަންގިފިލާގެ ލައިބްރަރީއެއް ވެސް ހުންނާނެ އެވެ.
