އިނގިރޭސި ޕްރިމިއާ ލީގުގައި ރޭ ޗެލްސީ އަތުން 1-0 އިން ހޯދި މޮޅަށް ފަހު މެންޗެސްޓާ ސިޓީން ޖެހިޖެހިގެން ތިން ވަނަ ފަހަރަށް ލީގުގެ ތަށި އުފުލާލައިފިއެވެ.
ޗެލްސީއާ ދެކޮޅަށް ކުޅުނު މެޗުގެ 12 ވަނަ މިނިޓުގައި ސިޓީގެ ހަމައެކަނި ގޯލު ޖަހައިދިނީ އާޖެންޓީނާއާ އެކު، މިދިޔަ އަހަރުގެ ވޯލްޑް ކަޕް ކާމިޔާބު ކުރި ފޯވާޑް ހޫލިއަން އަލްވަރޭޒްއެވެ. ޗެމްޕިއަންސް ލީގު ފައިނަލްގައި 2021 ވަނަ އަހަރު ޗެލްސީ އިން ސިޓީ ބަލި ކުރި ފަހުން، މިހާތަނަށް ސިޓީއާ ދެކޮޅަށް ޗެލްސީ ކުޅުނު ހަ މެޗުން ވެސް ވަނީ ގޯލެއް ނުޖެހި ބަލިވެފައެވެ. ލީގުގައި ޗެލްސީ އަށް ބާކީ ދެ މެޗު އޮތް އިރު އެ ޓީމު އޮތީ ތާވަލްގެ 12 ވަނައިގައެވެ.
ރޭގެ މެޗަށް ފަހު ސިޓީގެ ސަޕޯޓަރުން ކުރިމަތީގައި ވަނީ ޓީމުގެ ކުޅުންތެރިންނަށް ރަން މެޑަލާ އެކު ޓްރޮފީ ހަވާލު ކޮށްފައެވެ. ސިޓީން އަންނަނީ މި ސީޒަނުގެ ތިން ތަށްޓަށް ވާދަކުރަމުންނެވެ. އެ ގޮތުން، ޕްރިމިއާ ލީގުގެ ޗެމްޕިއަންކަމަށް ފަހު، ދެން ސިޓީން ތަށްޓަށް ވާދަކުރަނީ އެފްއޭ ކަޕް ފައިނަލާއި ޗެމްޕިއަންސް ލީގުގެ ފައިނަލުގައެވެ. އެފްއޭ ކަޕްގެ ފައިނަލުގައި މެންޗެސްޓާ ޔުނައިޓެޑާ ކުޅޭއިރު، ޗެމްޕިއަންސް ލީގުގެ ފައިނަލުގައި އިންޓަ މިލާނާ ބައްދަލުކުރާނެއެވެ.
ރޭގެ މެޗަށް ސިޓީން ނުކުތްއިރު ވެސް އޮތީ ލީގު ޔަގީންވެފައެވެ. އެއީ ހޮނިހިރު ދުވަހުގެރޭ އާސެނަލް ކުޅުނު މެޗުން ނޮޓިންހަމް ފޮރެސްޓް އަތުން ބަލިވުމުންނެވެ. ލީގު ތާވަލަށް ބަލާއިރު، ސިޓީން ވަނީ 36 މެޗުން 88 ޕޮއިންޓް ހޯދައިފައެވެ. ދެ ވަނައިގައި އޮތް އާސެނަލްގެ އޮތީ 37 މެޗުން 81 ޕޮއިންޓެވެ.
