ޖުޑިޝަލް ސާވިސް ކޮމިޝަން، ޖޭއެސްސީ އިސްލާހު ކުރުމުގެ އެއްވެސް ނިޔަތެއް މިސަރުކާރުގައި ނެތްކަމަށް ރައްޔިތުންގެ މަޖިލީހުގެ މަހިބަދޫ ދާއިރަގެ މެމްބަރު އަހުމަދު ތޯރިގު ވިދާޅުވެއްޖެއެވެ.

އޭނާ މިހެން ވިދާޅުވީ މިސަރުކާރުގެ ވެރިކަމުގެ އެންމެ ފަހު ދައުރުގައި ކުރިއަށްދާ މަޖިލީހުގެ މިއަހަރުގެ ދެވަނަ ދައުރަށް ސަރުކާރުން ހުށަހެޅުއްވި ބިއްލަތަކުގެ ތެރޭގައިވެސް ޖޭއެސްސީ އިސްލާހު ކުރުމުގެ ބިލު ނެތުމުންނެވެ.

ތޯރިގު ވިދާޅުވީ ޤާނޫނު އަސާސީއަށް 3 ފަހަރެއްގެ މަތީން އިސްލާހު ހުށަހެޅުމުންވެސް މަޖިލީހުން އެއިސްލާހުތައް ބޭރުކޮށްލީކަމަށެވެ. ޖޭއެސްސީ އިސްލާހު ކުރުމަށް މިސަރުކާރުން ވައުދުވި ނަމަވެސް އެކަން ކުރުމުގެ އެއްވެސް ނިޔަތެއް މިސަރުގައި ނެތްކަމަށް ތޯރިގު ވިދާޅުވިއެވެ.

ޖޭއެސްސީ އިސްލާޙްކުރުމުގެ ނިޔަތެއް ރައީސް އިބްރާހިމްގެ ނެތްކަމަށް ޤަބޫލްކުރެވި، 3 ފަހަރު މަޖިލީހަށް ޤާނޫނު އަސާސީ އިސްލާހްކުރުމުގެ ބިލް ހުށަހެޅީމަ ފެއިލްކޮށްލީއެވެ. ސަރުކާރުން ހުށަހަޅާ ބިލްގެ ތެރޭގައި ޖޭއެސްސީ އިސްލާހުކުރުން ނެތުނީ، ރައީސް އިބްރާހިމްގެ އެ ވައުދު ފުދި އަވަދިވީތޯއެވެ.

– ތޯރިގު ވިދާޅުވިއެވެ.

ރައްޔިތުންގެ މަޖިލީހުގެ މިއަހަރުގެ ދެވަނަ ދައުރަށް ފޮނުވަން ނިންމާފައިވާ ބިލްތަކުގެ ލިސްޓް ބަންޑާރަނައިބްގެ އޮފީހުން މިއަދު އާންމުކުރިއިރު އެންމެ ބޮޑަށް ފާހަގަކުރެވުނީ ޖޭއެސްސީ އަލުން އެކުލަވާލުމާ ގުޅޭ ބިލް ލިސްޓްގައި ނެތް ކަމެވެ. ނަމަވެސް މަޖިލީހުގެ މިއަހަރުގެ ފުރަތަމަ ދައުރަށް ފޮނުވަން ނިންމި ބިލްތަކުގެ ތެރޭގައި ޖޭއެސްސީގެ ގާނޫނު އިސްލާހު ކުރުމުގެ ބިލް ހިމެނި އެވެ. އެކަމަކު އެ ބިލް ނިމިގެން ދިޔަ ދައުރަށް ފޮނުވާފައެއް ނުވެ އެވެ.

ޖޭއެސްސީ އަލުން އެކުލަވާލުމަކީ ރައީސް އިބްރާހީމް މުހައްމަދު ސޯލިހްގެ ރިޔާސީ ވައުދެކެވެ. އެކަމަކު ޖޭއެސްސީ އަލުން އެކުލަވާލެވޭނީ ގާނޫނުއަސާސީއާއި ޖޭއެސްސީގެ ގާނޫނު އިސްލާހުކޮށްގެންނެވެ.

ވެެރިކަން ކުރާ އެމްޑީޕީގައި ކުރިން ތިބި 67 މެންބަރުންގެ ތެރެއިން 13 މެންބަރަކު އެ ޕާޓީން ވަކިވެފައިވާތީ މިހާރު ގާނޫނުއަސާސީ އިސްލާހުކުރެވޭނީ މަޖިލީހުގައި ތިއްބެވި އިދިކޮޅު މެންބަރުންގެ ތާއީދު ލިބިގެންނެވެ. މިވަގުތު ސިޔާސީ މަސްރަހު އޮތް ގޮތުން އެއީ ކުރަން ފަސޭހަ ކަމަކަށް ވެދާނެ ކަމަކަށް ނުބެލެވެ އެވެ.