މެޗުގެ ފަހު މިނިޓްގައި ފިރްމީނިއޯ ޖެހި ލަނޑުން އެއްވަރުވެ, ގަދަ ހަތަރެއްގެ ޖާގައަކަށް ލިވަޕޫލުން ކުރަމުން އަންނަ އުއްމީދަށް ނިމުން ނައިސް، ކުޑަ ހިތްވަރެއް ލިބިއްޖެއެވެ.
ޗެމްޕިއަންސް ލީގުގެ ޖާގައެއް އެންމެ ބޮޑަށް ފަހިވެފައި އޮތީ ޔުނައިޓެޑަށާއި ތިން ވަނައިގައި ނިއުކާސަލް ޔުނައިޓެޑަށެވެ. ޔުނައިޓެޑް ކުޅުނު 36 މެޗުން ލިބިފައި ވަނީ 69 ޕޮއިންޓެވެ.
ލީގުގައި ލިވަޕޫލް އަށް ބާކީ އޮތީ އެންމެ މެޗެކެވެ. އެއީ ތާވަލްގެ އެންމެ ފުލުގައި އޮތް ސައުތެމްޓަންއާ ދެކޮޅަށް މި މަހުގެ 28 ވަނަ ދުވަހު ކުޅޭ މެޗު އެކަންޏެވެ. ޔުނައިޓެޑާއި ނިއުކާސަލް އަށް ބާކީ ދެ މެޗު އެބައޮތެވެ. ޔުނައިޓެޑް ނުކުންނާނީ ޗެލްސީ އާއި ފުލަމް އާ ދެކޮޅަށެވެ. އަދި ނިއުކާސަލް ނުކުންނާނީ ލެސްޓާ ސިޓީ އާއި ޗެލްސީއާ ދެކޮޅަށެވެ.
ޔުނައިޓެޑާއި ނިއުކާސަލް ކުޅޭ ދެ މެޗުގެ ތެރެއިން އެއް މެޗު އެއްވަރުކޮށްލައިގެން ވެސް ދެ ޓީމަށް 70 ޕޮއިންޓް ލިބި، ޗެމްޕިއަންސް ލީގުގެ ޖާގައެއް ކަށަވަރުވާނެއެވެ. އަދި ސައުތެމްޓަން އަތުން ލިވަޕޫލް މޮޅުވިޔަސް، ލިވަޕޫލަށް ގިނަވެގެން ލިބޭނީ 69 ޕޮއިންޓެވެ. ލިވަޕޫލަށް ޗެމްޕިއަންސް ލީގުގެ ޖާގައެއް ކިރިޔާ ވެސް އޮތީ، ނިއުކާސަލް އާއި ޔުނައިޓެޑް ކުޅޭ ދެ މެޗުން ވެސް ބަލިވެގެންނެވެ.
ލިވަޕޫލް ދަނޑުގައި ކުޅުނު މެޗުގައި ފުރަތަމަ ލަނޑު ޖަހައި ކުރި ހޯދީ އެސްޓަންވިލާއެވެ. މި މެޗުގެ 27 ވަނަ މިނެޓުގައި ކާމިޔާބުކޮށް ދިނީ ޖާކޮބް ރަމްސޭއެވެ. ދެވަނަ ލަނޑު މެޗުގެ 89 ވަނަ މިނެޓުގައި ކާމިޔާބުކޮށް ދިނީ ރޮބާޓޯ ފާމިނިއޯއެވެ. މެޗުގައި ލިވަޕޫލް އިން އެސްޓަން ވިލާގެ ގޯލަށް ނުރައްކާތެރި ހަމަލާތަކެއް ފޮނުވާލިއެވެ. އެކަމަކު، ލިވަޕޫލްގެ ކުޅުންތެރިން އުފެއްދި ހަމަލާތަކުގެ ބޭނުން ހިފިފައެއް ނުވެއެވެ.
މި މެޗުގައި ލިވަޕޫލްގެ ކޯޑި ގަޕޯ އެ ޓީމަށް ގޯލެއް ޖެހި ނަމަވެސް ވީއޭއާރު ބަލާފައި ނިންމާފައި ވަނީ އެ ލަނޑު ގަބޫލު ނުކުރުމަށެވެ.
