ގުރޫޕް އޮފް 7 ގެ ނަމުގައި އެކުލަވާލާފައި އޮންނަ "ޖީ7″ ގެ ގުރޫޕުގެ ސަމިޓް މިއަދު ހެދުނު ޖަޕާންގެ ހީރޯޝީމާގައި ފެށިގެން ކުރިޔަށް ދާނެއެވެ.
މި ސަމިޓް، ޖަޕާންގެ ބޮޑުވަޒީރު ފުމިއޯ ކިޝިޑާގެ އުފަން ސިޓީ ކަމުގައިވާ ހީރޯޝީމާގައި ފެށިގެން ކުރިޔަށް ދާނީ މިމަހުގެ 19 އިން 21 އަށެވެ. މި ބައްދަލުވުމަށް ކެނެޑާ، ފްރާންސް، ޖާމަނީ، އިޓަލީގެ އިތުރުން އިނގިރޭސިވިލާތާއި އެމެރިކާގެ ލީޑަރުން މިހާރުވަނީ ހީރޯޝީމާއަށް ވަޑައިގެންފައެވެ. އޭގެ އިތުރުން، ޖީ7 ގައި ނުހިމެނޭ މެމްބަރެއްގެ ހައިސިއްޔަތުން ޔޫރަޕިއަން ޔޫނިއަންވެސް މި ސަމިޓްގައި ބައިވެރިވާނެއެވެ.
މި ސަމިޓް ހުކުރުދުވަހު ހެދުނު ފެށިގެންދާނީ ޖަޕާނުގެ ބޮޑުވަޒީރު ކިޝީޑާ ސަމިޓްގެ ބައިވެރިންނަށް ހީރޯޝީމާ މެމޯރިއަލް ޕާކުގައި މަރުހަބާ ދެންނެވުމާއެކުއެވެ. މިގޮތުން މިއަދުގެ ހެނދުނު ސަމިޓަށް ވަޑައިގެންނެވި ލީޑަރުން، 1945 ވަނަ އަހަރު އެމެރިކާއިން ހީރޯޝީމާއަށް ވައްޓާލި އެޓޮމިކް ބޮމުގައި މަރުވި މީހުންގެ ހަނދާނުގައި، ހީރޯޝީމާ މެމޯރިއަލް ޕާރކުގައި މާބޮޑިތައް ބާއްވާނެއެވެ.
އެއަށްފަހު މިއަދުގެ މެދުރު ސަމިޓްގެ މަޝްވަރާރައް ފެށުމަށް ހަމަޖެހިފައިވަނީ ރަޝިއާއިން ޔޫކުރެއިންގައި ކުރަމުންދާ ހަނގުރާމައަށް ގައުމުތައް އެކުވެގެން ރައްދު ދޭނެ ގޮތްތަތާއި ގުޅޭގޮތުންނެވެ. ސަމިޓްގެ ވަކި ހިސާބަކުން ޔޫކުރެއިންގެ ރައީސް ވޮލޮޑިމިރު ޒެލެންސްކީވެސް ސަމިޓްގެ ބައިވެރިންނާ ވީޑިއޯ ލިންކު މެދުވެރިކޮށް މުޚާތަބް ކުރެއްވުމަށް ވަނީ ހަމަޖެހިފައެވެ.
މި ސަމިޓާއި ދެކޮޅަށް ހީރޯޝީމާގައި މުޒާހިރާ ކުރުމަށްވެސް ބައެއް ފަރާތްތަކުން ދަނީ ތައްޔާރު ވަމުންނެވެ.
"ޖީ7″ ސަމިޓްއަކީ މި ގުރޫޕްގެ 7 ގައުމުގެ ތެރެއިން ކޮންމެވެސް އެއް ގައުމުއްގައި ކޮންމެ އަހަރަކުވެސް ބާއްވާ ސަމިޓެކެވެ. މި ސަމިޓްގައި މަޝްވަރާ ކުރެވެނީ ދުނިޔޭ އިގްތިސާދީ ބޮޑެތި މައްސަލަތަކާއި އަދި އޭގެ އިތުރުން ދޭދޭ ގައުމުތަކުގެ މެދުގައި ކުރިމަތިވާ ބޮޑެތި މައްސަލަތަކާއި ގުޅޭގޮތުންނެވެ.
