ފެނަކަ ކޯޕަރޭޝަނުން ކުދި ވިޔަފާރިތަކަށް ދައްކަން ޖެހޭ ފައިސާ ނުދައްކައިގެން އެ ކުންފުނިތަކުން ފެނަކަ ކޯޕަރޭޝަންގެ މައި އޮފީސް ކުރިމަތީ މުޒާހަރާ ކުރީ އެ ކޯރަޕޭޝަން މެނޭޖިން ޑިރެކްޓަރު ސައީދު އަންގައިގެން ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުޙައްމަދު ނަޝީދު އަބްދުالله (މޮސްޓާ) ވިދާޅުވެއްޖެ އެވެ.
މޮސްޓާ މިފަދައިން ވިދާޅުވެފައިވަނީ ފެނަކައިން ކުދި ވިޔަފާރިތަކަށް ދައްކަން ޖެހޭ ފައިސާ ދެއްކުމަށާއި، އެކުންފުނީގެ މެނޭޖުމަންޓު އަދި ފައިނޭންސް އޮޑިޓެއް ހެދުމަށް ގޮވާލާ މަޖިލީހަށް ހުށައެޅި ކުއްލި މައްސަލައަށް ބަހުސް ކުރައްވަމުން ނެވެ.
އޭނާ ވިދާޅުވީ ފެނަކަ މައި އޮފީސް ކުރިމަތީ ފެނަކައިން ފައިސާ ދޭން ޖެހޭ ކުދި ވިޔަފާރިވެރިން ލައްވާ، ކުންފުނީގެ މެނޭޖިން ޑިރެކްޓަރު މުޒާހަރާ ކުރުވީ ފިނޭންސްއިން ފައިސާ ހޯދުމަށް ކަމަށެވެ.
"މިހާރު ވެސް ފެނަކައިން ކުދި ވިޔަފާރިތަކަށް 2.8 ބިލިއަން ރުފިޔާ ދަރާފައިވާއިރު، އެ ކުންފުންޏަށް ވަންނަ ފައިސާއަށް ހަދާ ނުހަދާއެއް ނޭނގޭ" މޮސްޓާ ވިދާޅުވި އެވެ.
އޭގެ އިތުރުން މޮސްޓާ ވަނީ ފެނަކަ މެނޭޖިން ޑިރެކްޓަރު ސައީދަށް ކޮރަޕްޝަންގެ ގިނަ ތުހުމަތުތަކެއް ކުރައްވާފަ އެވެ.
އެގޮތުން ވާދޫގައި ސައީދު އަމިއްލަ ގެކޮޅު ގަނޑުވަރެއް ފެންވަރަށް ހަދާފައިވާ ކަމަށާއި، އޭގެ އިތުރުން ސްރީލަންކާގައިވެސް ގެއެއް ހަދާފައިވާކަމަށް މޮސްޓާ ވިދާޅުވި އެވެ. އަދި ހަމައެހެންމެ އެ މަގާމުގައި ހުންނަވައިގެން މިހާރު ސައީދު ގެންދަވަނީ ރިސޯޓެއް ތަރައްގީކުރުމުގެ މަސައްކަތް ވެސް ކުރައްވަމުން ކަމަށް މޮސްޓާ ވިދާޅުވި އެވެ.
މި ހުރިހާ ޚަރަދެއް ކުރައްވަމުންދާއިރު، ފެނަކައަށް ފިނޭންސްއިން ފައިސާ ނުލިބޭކަމަށް ބުނެ ވިޔަފާރިވެރިން ލައްވާ މުޒާހަރާ ކުރުވުމަކީ ދެކޮޅު ޖެހޭ ކަމެއް ނޫންކަމަށް މޮސްޓާ ވިދާޅުވި އެވެ.
ވައްކަމާއި ކޮރަޕްޝަނާއި ދެކޮޅުކަމަށް ބުނެ އައި ސަރުކާރު މިއަދު ކޮރަޕްޝަންގެ ހާއްޔަކަށް ބަދަލުވެފައިވާ މިންވަރު ހަމައެކަނި ފެނަކަ ކުންފުންޏަށް ބަލާލުމުން ހާމަވެގެންދާކަމަށް މޮސްޓާ ވަނީ ވިދާޅުވެފަ އެވެ.
ފެނަކައިން ކުދި ވިޔަފާރިތަކަށް ދޭން ޖެހޭ ފައިސާ ދިނުމަށާއި މެނޭޖްމަންޓުގެ އޮޑިޓެއް ހަދަން ގޮވާލައި ރައްޔިތުންގެ މަޖިލީހަށް މިއަދު ހުށަހެޅި ގަރާރާއި އެކު އެ ކުންފުނީގެ ދިފާއުގައި އެމްޑީޕީގެ ގިނަ މެމްބަރުން ތަކެއް ވަނީ ވާހަކަ ދައްކަވާފަ އެވެ.
