ރައީސުލްޖުމްހޫރިއްޔާ އިބުރާހިމް މުހައްމަދު ސާލިހުގެ ނޯ ކޮންފިޑެންސް މޯޝަން ރައްޔިތުންގެ މަޖިލީހަށް ވައްދައިފިނަމަ، ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ މަޖިލިސް ރައީސްކަމުން ވަކިކުރުމަށް ހަމަޖައްސާފައިވާކަމަށް "ޚަބަރު އޮންލައިން"އަށް މައުލޫމާތު ލިބިއްޖެއެވެ.
އެމްޑީޕީގެ ޕާލަމެންޓްރީ ގުރޫޕުގެ މެމްބަރަކު "ޚަބަރު އޮންލައިން"އަށް މައުލޫމާތު ދެމުން ވިދާޅުވެފައިވާ ގޮތުގައި، ރައީސް ސާލިހު އަޒުލް ކުރުމަށް ރައްޔިތުންގެ މަޖިލީހަށް އެމަނިކުފާނުގެ ނޯ ކޮންފިޑެންސް މޯޝަންއެއް ވައްދައިފިނަމަ، ނަޝީދު މަގާމުން ވަކި ކުރާނޭކަން ނަޝީދަށް މިހާރު އޮންނާނީ ސާފުވެފައި ކަމުގަައެވެ.
ނަޝީދު މަޖިލިސް ރައީސްކަމުގެ މަގާމުން ދުރުކުރުމަށް ބޭނުންވާ އަދަދަށް ސޮއި ހަމަކޮށްފައި އޮންނަތާ ދުވަސްތަކެއް ވެއްޖެ. ނޯކޮންފިޑެންސް މޯޝަން މަޖިލީހަށް ވައްދާފައި ނުވަނީ ރައީސް ސާލިހު އާބަސް ވިދާޅު ނުވާތީ. އެހެންނަމަވެސް ރައީސްގެ ނޯކޮންފިޑެންސް މޯޝަނެއް މަޖިލީހަށް، ފިކުރެއް ދިރުމަށް ތާއީދުކުރާ މެމްބަރުންގެ ސޮޔާއެކު ވައްދައިފިނަމަ، ނަޝީދު މަޖިލިސް ރައީސްކަމުން ވަކި ކުރާނެ.
"ޚަބަރު އޮންލައިން"އާއި ވާހަކަ ދެއްކި އެމްޑީޕީގެ ޕާލަމެންޓްރީ ގުރޫޕްގެ މެމްބަރު ވިދާޅުވެފައި ވެއެވެ.
ނަޝީދު މަޖިލިސް ރައީސްކަމުން ދުރުކުރުމަށް ސޮއި ހަމަކޮށްފައިވާއިރު، ބައެއް ފަރާތްތަކުން ތުހުމަތު ކުރާގޮތުގައި، ނަޝީދު އުފައްދަވަން މިއަދު އިއުލާން ކުރެއްވި "ފިކުރެއްގެ ދިރުން" ސިޔާސީ ޕާޓީ އުފައްދާނެކަން އިއުލާން ކުރުމަށްފަހުވެސް އަދިވެސް ނަޝީދު އެމްޑީޕީން އިސްތިއުފާ ނުދެއްވާ ހުންނަވަނީ މަޖިލިސް ރައީސްކަން ގެއްލިދާނެތީއެވެ.
މަޖިލިސް ރައީސް ނުވަތަ ނައިބު ރައީސްގެ އިތުބާރު ނެތްކަމަށް ފާސް ވާނީ މަޖިލީހުގެ ޖުމްލަ މެންބަރުންގެ އަޣުލަބިއްޔަތު ލިބިގެންނެވެ.
މިހާރުގެ މަޖިލީހުގައި ހިމެނޭ 87 މެމްބަރުންގެ ތެރެއިން، އަޢުލަބިއްޔަތަކީ 43 މެމްބަރުންގެ ވޯޓެވެ. ނަޝީދަށް ތާއީދުކުރާ މެމްބަރުންނާ ނުލާވެސް، ސަރުކާރަށް ތާއިދު ކުރާ މަޖިލިސް މެންބަރުންގެ އަދަދު އަދިވެސް 50 އަށް ވުރެ ގިނައެވެ. އެހެންކަމުން، މަޖިލިސް ރައީސް އަދި ނާއިބު ރައީސްގެ މަގާމުން ވަކިކުރުމުގެ ބާރު އަދިވެސް އޮތީ ރައީސް ސާލިހުގެ އަތްޕުޅުގައެވެ.
ރައީސުލްޖުމުހޫރިއްޔާ މަގާމުން އަޒުލް ކުރުމަށް ނޯ ކޮންފިޑެންސް މޯޝަންއެއް ރައްޔިތުންގެ މަޖިލީހަށް ވެއްދޭނީ މެމްބަރުން 1/3 މެމްބަރުންގެ ސޮޔާއެކުއެވެ.
