ނަޝީދު ފެކްޝަންގެ 12 މެމްބަރުން ހިމެނޭ ގޮތުން، ފިކުރެއްގެ ދިރުމުގެ އިސްބޭފުޅު އެންޑީޕީން ވަކިވާން ނިންމައިފިއެވެ.

މައުލޫމާތު ލިބިފައިވާ ގޮތުގައި މި 12 މެމްބަރުންގެ އިތުރުން ޕާޓީން ވަކިވާން ނިންމާފައިވާ އިސް ބޭފުޅުންގެ ތެރޭގައި އެމްޑީޕީގެ ނައިބު ރައީސް މުހައްމަދު ޝިފާޒްއާއި އާއި އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިންވެސް ހިމެނިވަޑައިގަންނަވައެވެ.

ފިކުރެއްގެ ދިރުމަށް ނިސްބަތްވާ އިސް މެންބަރުން ޕާޓީން ވަކިވާން ނިންމާފައިވާއިރު، ފިކުރެއްގެ ދިރުން ސިޔާސީ ހަރަކާތުން ޚާއްސަ ނިއުސް ކޮންފަރެންސެއް މިއަދު ހަވީރު 5:00 ގައި ބޭއްވުމަށްވެސް ވަނީ ހަމަޖެހިފައެވެ. އަދި އެމްޑީޕީގެ ފިޔަވަޅުއަޅާ ކޮމިޓީންވަނީ ނަޝީދު ފެކްޝަނަށް ނިސްބަތްވާ މެދު ހެންވޭރު ދާއިރާގެ މަޖިލިސް މެމްބަރު އަލީ އާޒިމްއަށް ފިޔަވަޅުއަޅާ ޕާޓީން ވަކިކޮށްފައެވެ.

އަލީ އާޒިމް އެމްޑީޕީން ވަކިކުރަން ނިންމާފައިވަނީ އެ ޕާޓީގެ ފިޔަވަޅު އަޅާ ކޮމިޓީއަށް ޕާޓީގެ ޕާލަމެންޓަރީ ގްރޫޕުގެ ފަރާތުން ހުށަހެޅި މައްސަލައެއް ބެލުމަށްފަހުއެވެ. ޕީޖީ ގްރޫޕުން ހުށަހެޅި މައްސަލައިގައި ބުނެފައިވަނީ އާޒިމް އެމްޑީޕީގެ މެމްބަރެއްގެ ގޮތުގައި ހުންނަވައިގެން ޕާޓީގެ އަަސާސީ ޤަވާއިދާއި ހިލާފަށް ކުރައްވާފައިވާ ކަންތައްތަކެއް ފާހަގަވެފައިވާތީ، އެކަންކަން ބެލުމަށްފަހު ފިޔަވަޅު އަޅައިދިނުމަށެވެ.

އަލި އާޒިމް އެމްޑީޕީން ވަކިކޮށް، އެޕާޓީގެ ދަފްތަރުން އާޒިމުގެ ނަން އުނިކުރުމަށް އިލެކްޝަންސް ކޮމިޝަނަށް ހުށަހެޅުމާ ގުޅިގެން އިއްޔެގެ ވަގުތެއްގައި އާޒިމުގެ ނަން އެމްޑީޕީގެ ދަފްތަރުން އުނިކޮށްފައިވާ ކަމަށް ކޮމިޝަނުން ޔަގީންކޮށްދެއެވެ.

އެމްޑީޕީގެ ދަފްތަރުން އާޒިމްގެ ނަން އުނިކުރީ، އޭނާ ވަކިކުރި ކަން އީސީއަށް އެ ޕާޓީން އެންގުމުންނެވެ. އާޒިމް ވަކިކުރީ، އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމުގެ މައްސަލާގައި ސޮއިކުރެއްވުމާއި ޗާގޮސް މައްސަލާގައި އިދިކޮޅު ފަރާތްތަކުން ބޭއްވި ޕްރެސް ކޮންފަރެންސްގައި ބައިވެރިވެވަޑައިގަތް މައްސަލައިގައެވެ.

އާޒިމް ވަކިވެފައިވާ ކަން އީސީން ރައްޔިތުންގެ މަޖިލީހަށް އެންގުމުން ތަޅުމުގައި އެކަން އިއުލާންކުރުމާ އެކު އޭނާ ވާނީ އަމިއްލަ މެމްބަރަކަށެވެ. އޭނާއަށް ފިޔަވަޅު އަޅައިދޭން ޕާޓީގައި އެދުނީ އެމްޑީޕީގެ ޕާލަމަންޓްރީ ގްރޫޕުންނެވެ.

އެމްޑީޕީގެ ފުކުރެއްގެ ދިރުން ސިޔާސީ ހަރަކާތުގެ އިސްބޭފުޅުން ޕާޓީން ވަކިވަމުން ދިޔަނަމަވެސް، އެ ސިޔާސީ ހަރަކާތުގެ އިސް ލީޑަރު އަދި އެމްޑީޕީގެ ރައީސް މުހައްމަދު ނަޝީދު ޕާޓީން ވަކިވާން ނިންމިކަމުގެ މައުލޫމާތު އަދި ލިބިފައެއް ނުވެއެވެ.